Capitol 6

Cuando Ricardo persepi ce el es solitar en la abitada, un senti de teme saisi el. Sua pensa prima es tota stupida: “El ia parti! Esce ance el ia fura mea mone?”, ma esta pensa no pote dura longa: nun pote prende acel cual on no ave.

La campaneta de la porte sona. Ricardo esita. Esce el es capas de responde a cual la person va demande? On sona a un ves du. No multe serta sur se mesma, an tal el vade abri.

A fronte de el un fem joven sta con un fas suriente.

“On ia dise a me ce un sala es disponable asi. Contra paia, evidente,” - el dise con un vose musical.

Ricardo roji. El no comprende perce. Cisa, car la fem es bela.

“Em, em…” el comensa, ma el no sabe vera cual responde.

La fem avansa par tre pasos, entrante a esta modo, con un “Esce tu permete?” apena oiable.

“Tu ave un abitada bela!” La fem regarda a sirca. “Un sala asi ta conveni perfeta per me.”

El verje la regarda a Ricardo.

“Esce lo costa multe?”

La om joven retrova alga la capasia de parla.

“Per dise vera, me no sabe. Me…”

“Esce tu abita asi sin costa?” el interompe. “Acel ta es an plu bela!”

“El comensa rie, e la xico opina ce nunca el ia oia un rie cual sona tan bela. Se cor bateta multe rapida.

El abri la boca, ma no un sona sorti. La fem continua regarda el. Ricardo senti turbada, e plen de sentis nonconoseda, en mesma tempo asustante e plasente. Teror e joia ocupa el en junta. Se fas cambia de roja a pal, de pal a roja, e en cuando el mostra un espresa de ansia, an tal el susede deveni luminada par un spesie de surie.

   

  “Alora, cual aveni a tu? Esce alga cosa no es en ordina?”


  A esta ves, se vose es madrin. Ricardo senti un desira forte ce la fem besa el, ce la fem teni el en sua brasos.


  “Tu es tan compatable” - la fem dise, e acel parola sona a la oreas de Ricardo con felisia.


  “El compati me, el ave un bon cor!” Ricardo pensa, “cisa an el comensa ama me?”


  Per dise vera, alga cosa simil a un comensa de ama deveni lejeda en la oios de la fem, cuando, entrante la cosina, el proposa an plu madrin:


  “Veni senta a la table. Me va prepara cafe. E tu va raconta a me.”


  La fem mesma trova rapida la cafe, la tases, la zucar. El prende an tortetas a alga loca e pone los sur la table. La om joven regarda el, con stona e amira. Cada sua move radia a sirca un capasia la plu alta per solve problemes. El es un esemplo vivente de ata pratical, pertinente, ajustada. Plu, tra tota la tempo el surie acel surie merveliosa e emosiante, acel es nonoblidable.


  E se cafe! Como el susede fa alga cosa tan divin? El ia usa la mesma cosas como Milan. Si vera, Ricardo ia gusta la cafe de Milan, ma sola asta esta momento, cuando el no ancora ia ave la acaso de proba esta…


  “Bon, fini tua torteta, bevi alga plu cafe, e raconta a me, esce tu acorda?” el dise, cuasi parlante a un enfante.


  A un ves cuatro Ricardo reporta la mal ata de Joan. El no ancora ia ariva a la momento cuando el sta a la cambiera de mone de la stasion, cuando la porte de la abitada abri.


  “Alora, cual aveni asi? Ci tu es?” Milan dise, e on oia ce sua nervos no ancora ia retrova un calmia intera.


  La xica responde par se rie musical.


  “Mea nom es Catarina”, el esplica. “On ia dise a me ce la seniora ci abita asi fa lua salas a studiantes en la anio de studia, e ance en la estate a viajores, e me veni per deveni informada.”


  “No ave un sala libre aora…” Milan comensa, e pronto el demanda a se esce el parla saja. Plu el regarda Catarina, plu la xica aspeta es bela. Ta es stupida lasa Ricardo asi e refusa un abitada a acel fem notable bela, tan multe car evidente el ave un carater cual tende a la joia, en cuando con un filosofiste  la ries no es tro frecuente. Ma la xica parla denova ante cuando Milan ave la tempo per reordina se pensas:
   

  “Sur la sala nos va reparla a pos, si tu permete. Aora me ta gusta oia asta la fini la aventuras de nos Ricardo peti.”


  Ricardo e Milan es la plu diferente en tota modos. Ma a esta momento la sentis de los comensa sembla. Ambos persepi en la otra un individua perilosa, capas de fura a via la ama cual, la plu evidente, no es destinada a acel.


  Per Ricardo, esta senti gida a no cosa pratical, ma per Milan, deveni clar ce el debe separa se de acel coabitante.  Per ateni esta, acel nesesa envia el…


  “…Labora,” Catarina dise subita, nonconsensa ce el dise esata la idea a cual Milan ia es arivante.


  “Tu debe labora. Esta es la solve la plu simple. Cual tu es capas de fa?”


  Ricardo resta a un momento con la boca abrida, como si el no comprende, ante cuando el susede responde:


  “No cosa.”


  “Alora, acel simpli la problem. Donce tu pote fa cualce cosa!” la xica dise riente.


  “Esce nunca tu ia gania mone?” Milan demanda. “An en la vacanses?”


  “No. Me jenitores es sufisinte rica, e me es capas de fa no cosa.”


  Catarina interveni:


  “Alora, Milan, tu ia labora serta ja, no vera? Dise a me cual ia es la emplea la plu bon paiada, cual tu ia ave?”


  “Me ia es un gardor.”


  “Gardor? De cual spesie?”


  “Vide, en esta pais ave un compania nomida Securix, ci usa gardores; los sirculi en la urbe per esamina cualce spesies de cosas en laborerias diversa, xef en botecas. La gardor reseta un uniforma, cual sembla alga a esta de polisia. El debe esamina esce la portes es securida, e reporta si alga cosa aspeta es anomal. Plu, el debe enscrive sua pasa a cada loca con un aparato locada en mur, cual nota la data e la ora. Tal on pote sabe ce la gardor ia pasa a la ora esata e ce el ia es vera a la loca do el ia debe. Acel es usada xef per un esamina contra un foco.”
   

  Milan repleni se tas con cafe.


  “Un labora como gardor de Securix ave multe bon lados,” el continua. “El es bon paiada, car la persones en acel compania nunca trova tan multe persones como los nesesa; me no sabe perce; cisa car multe imajina ce lo es perilosa. Ante cuatro dias los ia telefoni a me per demanda esce me ta aseta labora denova per los. Cisa acel relata a la reuni de la xefes de stato. Cualce pote es la situa, me ia responde no. Aora me es en vacanses, e me nervos nesesa un tempo de nonlabora. Donce Ricardo, tu va reseta probable la labora, si tu vade per presenta tu, xef si me va ajunta un letera de presenta cual dise ce me  conose tu, e ce tu es tota fidable. Tu va vide, acel labora conteni no problem. Par la aida de la uniforma la persones lasa tu es calma. Los opina jeneral ce tu es un polisior.”