GRASIAS, AMI!
Capitol 1 · Capitol 2 · Capitol 3 · Capitol 4 · Capitol 5 · Capitol 6 · Capitol 7 · Capitol 8 · Capitol 9 · Capitol 10 · Capitol 11 · Capitol 12 · Capitol 13 · Capitol 14 · Capitol 15 · Capitol 16 · Capitol 17 · Capitol 18 · Capitol 19 · Capitol 20

Capitol 7

“Ma me es un stranjer e me no ave un permete de labora,” Ricardo cria, restante forte a la razona final, cual ta justi se refusa de labora.

“Acel no es un problem,” Catarina, la sempre pratical, responde calma, e el abri sua saco.

“Vide,” el dise, sortinte paperes con un aspeta de ofisia. “Nos nesesa sola tua foto. Me mesma va organiza la segue. On ave serta asi un macina de scrive, no vera?”

“Ma… Como es posible?” Ricardo es stonada.

“Vide, ance me es stranjer. Ja a la anio pasada me ia veni asi en estate, e me ia demanda en la ofisia consernada esce labora tempora es posible. Me ia reseta un permete de labora per tre menses. En cuando me ia es ala, on ia clama la ofisior per un otra loca. Me ia usa se asentia de du minutos per propri a me alga de acel documentos. Los pote sempre es usosa, no vera? Ci sabe, cuando similes pote aida? Saisi tal acasos cuando la destina presenta los, acel es mea prinsipe. En fato, me ia razona bon. A esta anio la stato ia deside no plu furni un permete de labora tempora a la studiantes stranjer, par causa de la nonemplea en la pais”.

“Ma la marca e la…”

   

“Lasa me fa. Me conose la metodo nesesada. Me va move fasil la marca de un documento a un otra par un remedia de me, multe simple, cual va stona tu cuando tu va vide me fa. Lo va es fasil; tota cual me nesesa es ja en esta cosina. Me ia persepi acel cuando me ia es xercante per prepara la cafe. E me va refa perfeta la suscrives. Me es un spesialiste de la documentos falsa. Esce tu ave un foto?”

“No.”

“Donce, vade pronto.”

“Ma si tu dise ce on ia deside no furni un permete de labora a jovenes stranjer, tua documento, an si perfeta, va valua no cosa!”

“Tu no ia atende bon me! Me ia parla sola sur studiantes. Tu no va es un studiante. Tu va es un stranjer joven ci vive en esta pais ja tra anios con sua jenitores, e ci vole cambia se labora, car de la enfantia el desira deveni un gardor. La fato, ce tu parla perfeta la lingua, va aida ce los crede tota esta. Fa rapida me sabe tua data de nase e la loca, e… alora, ta ce nos vide cual informas los vole. Pos acel, vade pronto per fotografi tu.”

Esta paje es presentada con la lisensa CC Attribution-Share Alike 4.0 International.
Lo ia es automatada jenerada de la paje corespondente en la Vici de Elefen a 4 april 2024 (17:36 UTC).