Capitol 14

Sur la stradas sin persones a esta ora de note, un taxi, reveninte de un curso distante, para subita. Sur la paseria un om joven reclina, parente en un mal state. La gidor sorti de la auto, vade a la om reclinante.

“Bateda! Vidable acel ia deveni atacada e bateda! El es sin consensia, ma el vive.”

La gidor regarda a sirca, esperante vide algun ci ta pote aida. En cuando el vade per telefoni a la polisia, el es desplaseda par lasa la joven es solitar sur la paseria. Ma la strada es ancora sin persones.

Felis, un telefon es no multe distante. Pos no longa, la polisia es informada. Alga minutos pasa ancora, e lo ave asi un auto de polisia, con un lus jirante sur lo, cual ariva multe rapida a la loca do la gidor de taxi espeta.

Milan es sortinte de se state nonconsensa. El susede senta se.

Pos un controla rapida, un de la du polisiores ci veni de ariva, dise: “No cosa seria, no cosa pare rompeda. Los ia ateni tu en modo sola surfasal.”

“Surfasal, vera?” Milan responde. “La dole cual me sensa no pare surfasal a me. Lo pare como si me testa va esplode pronto.”

“Esce tu senti ce tu es capas de raconta lo cual ia aveni?”

“Bon, me ia atenta para acel teroriste, el ia lansa me a tera, an tal me ia sta denova me, ia core pos el, ma alora otras ia ataca me de pos, me no ia vide los, me an no sabe cuanto los ia es. Los ia fa multe rapida, me ave un bate multe dolente - an si seguente alga persones acel bate ia es sola surfasal - cual ia fa me deveni nonconsensa.”

“Un teroriste, si? Ci?”

“Bon, me no sabe la nom, ma sua foto es trovable a cada loca en la site, en fato en tota la pais. La polisia xerca el.”

“Esce tu es serta? Do tu ia atenta para el?”

“Si me sola ta vide el pasa corente cuando el ia sorti de la boteca, cisa me no ta es serta, ma pos la bates cual me ia reseta, no plu ave un duta. Ta es vera la plu stonante si otra despetables ta ave un fas simil.”

“El ia sorti de la boteca, tu ia dise. De cual un?”

“Plunova. Me ia es ala con un xica. Cuando nos ia ariva a un porte, la teroriste ia sorti cuasi corente. Me ia reconose pronto el. Me ia atenta para el, ma me no ia susede, e…”

“Con un xica? Do aora esta xica es?”

“Me no sabe. Cisa el ia entra a la vendetota. Nos ia vade per aida un gardor de Securix ci, parente, ia es encluida ala.”

“Encluida? Un gardor de Securix? Cual tu raconta?”

La polisior du comunica multe cuieta sua opina a la orea de la un:

“La bate ci ia ateni el, ia mali probable sua testa…”

“Bon,” la polisior un reparla, “esce tu es capas de sta? Si? Bon! Ta ce nos vade a Plunova per vide esce on pote fa ce la conserna es plu clar, e cisa per ance trova tua camerada. Veni con nos.”