Capitol 8

Lo es la ora un de la note. En sua uniforma de gardor, Ricardo senti se es strana, como si el ta jua en un teatro, e como si, par un causa noncomprendable, el ta aseta un rol cual tota no conveni a el.

Per parla sinsera, cuando el ia deside proposa se a Securix - car el no plu ia tolera la insiste en junta de Milan e Catarina - el ia es serta ce esta compania va refusa el. Sua eda tro joven, sua aspeta timida, sua manca vidable de capasias pratical va fa los persepi pronto - el ia opina - ce el no conveni per un tal emplea con un obliga alta.

Ma acel no ia aveni tal. La ofisior ia regarda apena el. Securix ia nesesa gardores, un gardor ia presenta se, un om joven, sana, sufisinte alta, normal forte, cual plu on ta desira? Plu, un letera de un gardor pasada ci sempre ia labora la plu sasiante, descrive zelosa la bon cualias de esta nova. Nos proposa un tal paia, tu va fa esta e acel, esce tu pote comensa ja a esta note? Alora bon, perfeta, un gardor ia es mancante a nos, e nos ta nesesa obliga otras longi sua oras de labora, an si los no gusta acel, e an si ance nos no gusta, en ajunta, car alora nos debe paia plu multe… La conserna ia deveni rapida organizada. Ante cuando el ia ave la tempo per deveni consensa sur cual aveni, Ricardo trova se con un uniforma e indicas esata sur acel cual el debe fa a esta note.

   

  En fato, la labora no es vera desplasente. Desecuri portes, resecuri los, pasea sur stradas sin persones su la regarda amin de la luna madrin,  entra denova en un casa, siniali sua pasa a la aparato sur la mur per esta gol, no cosa entre tota estas es asustante. Cisa Catarina e Milan ia razona bon. Cisa esta labora es la modo la plu bon per paia a sua reveni a casa, o an - ci sabe? - un otra reposa de vacanse en un otra pais ancora nonconoseda, do Catarina ta aseta segue el. Ricardo comensa considera la vive con un filosofia plu calma.


  El regarda la paper cual conteni la serie de sua taxes. “Aora a Plunova” el leje. Plunova es un vendetota, un boteca enorme con mil departes, do on pote compra cualce cosa. Ricardo debe pasa seguente un curso definida sur cada nivel e en locas diversa per marca sua presentia con la aparato per scrive la ora.


  La paper informa ce el debe fa la esamina en la oscuria, con sola un torxa, per pote pronto vide un foco comensante. Es strana pasa tra acel niveles vasta a note, en oscuria, sin encontra cualcun, en cuando a dia la personas xama asi.


  Arivante sur la nivel sinco, la joven oia un ruido cual no pare tota normal. El estingui sua torxa e el sta nonmovente, atentante comprende cual es la causa. Si, el no ia oia mal, acel no es la jua de sua imajina, ma un ruido real, e supra la loca de do la sona veni, un lus debil es vidable: ala algun usa un torxa.
  Ricardo senti sua cor bateta con un fortia nonabitual. El prosimi la plu silente, cauta, lenta per no risca fa conose sua veni par un toca torpe contra alga cosa nonvidable. El vide la ombra de un individua ci fa alga cosa en modo ascondeda, como un furor. El comensa teme.


  Ance sin ruido, como el ia veni, el pasea a retro e vade a la nivel a su, do el pote telefoni sin turba. El sabe bon ce Milan e Catarina es en un restorante danseria. Per coraji el, ante se parti temosa a la labora de note, los ia dise a el ce los va es ala, en media de la parte de la urbe cual el debe sonda, e ce los va resta ala tarda pos medianote.
  

  “Milan? Grasias a Dio, tu es ancora presente!”


  “Cual aveni? Tu sona como si tu ia persepi la diablo.”


  “Escuta, Milan, tu debe aida me. Me teme. Me es en Plunova. Cuando me ia ariva a la nivel sinco, me ia oia un ruido anomal. A pos, me ia prosimi me e me ia vide… Me ia vide un ombra, ma un duta no es posible. On ave ala un individua ci fa alga cosa en un modo ascondeda. Cisa el fura, cisa… Como me ta pote sabe? Aida me, Milan, cual me debe fa?”


  “Aresta el. Serta, si el labora en boteca sin persones con un tal lus, el fa alga cosa cual el no ave la direto de fa. Si el ta ave la direto, Securix ta informa tu a ante. Vade per aresta el!”


  “Aresta! Me, aresta un umana! Como on fa? Nunca me ta es capas.”


  “Ricardo, no es un enfante, tu es un om o no? Es la plu simple. Pasea, prima sin ruido, asta la plu prosima a el, e a pos rapida a ante con la lus de tu torxa orientada en tal modo per sieci el. Alora dise con un vose autoriosa: ‘Cual tu fa asi? Me aresta tu.’”


  “Ma si el ave un arma, cisa el va mata me!”


  “Esce Securix no ia esplica a tu como ata en un tal aveni?”


  “Si, ma acel person ia parla tan rapida e ia dise tan multe detalias sur tan multe cosas en mesma tempo, ce me no es capas de recorda. En fato, me no ia escuta vera. Me ia es asustada par la fato ce, contra me espeta, los aseta me.”
  

  “Esce tu mesma no ave un arma?”


  “Si, los ia dona un a me. Ma me no sabe como usa el, e, si me recorda bon, en pratica me no ave la direto de usa el. Cisa an no cosa es en el, me no ia regarda. Acel cosas asusta me.”
  

  “Alora, sorti tua arma. Teni el par la mano destra. Prosimi tu como me ia dise. E cuando tu va es tota prosima, orienta la torxa a sua oios, e dise: me es armida, tu no pote fuji, me colaborores oserva tu…”


  “Colaborores! Esce vos aseta veni per aida me?”


  “No, no, acel no es nesesada. Dise acel sola per asusta el. El no pote sabe esce tu dise la veria o no, ma an si el va duta alga, el no va risca sua vive par causa de un idea erante. Coraje, Ricardo, me es serta, ce tu va fa eselente tua debe.”


  La aparato de telefon fa oia “clic”: Milan no lasa a Ricardo la tempo per responde.


  Revadente a supra, la gardor joven espera ce la ator ci asconde se va es a via. En fato, acel es partinte: un torxa lumina pico un via cual un ombra segue cauta. El tende ateni la loca do Ricardo sta per desende longo esta mesma scalera, cual la xico veni de usa.  Fria par teme, la xico no es capas de fa alga move. El sola sta asi, con la boca abrida, con la cor rapida batetante, e la pensas volante a sirca en un desordina nonorganizable.


  Contra esta, a la fini, un idea susede deveni clar supra la desordina de la pensa: “Me debe lumina la torxa e orienta el a sua oios.”


  Ai! Ante cuando Ricardo fa la jesti nesesada, el deveni atenida par la lus de la otra portor de torxa ci dise pronto con un vose plen de autoria perilosa:


  “Ci tu es? Cual tu fa asi?”


  Sola alora Ricardo lumina se lampa. La otra porta la mesma uniforma como el! Un membro de Securix!


  “Me aresta tu!” acel dise. El es alga min alta ce Ricardo e sua corpo no es plu forte, ma el ave un tal autoria natural, ce, tota serta, nosa ami no ta pote domina el. La idea de colpa el, o de dise simple alga cosa, an no traversa la testa de Ricardo.


  “Leva la manos!” la otra dise. E en cuando Ricardo alti se duple de manos, como un fio peti fa cual se padre dise, an no dutante sur la razona bon de acel, la individua prende rapida la arma de la xico.


  “A su!” El dise ancora, mostrante con la arma ce cualce refusa ta ave segues perilosa.


  Como un oveta, Ricardo lasa la om en uniforma gida el a la parte su tera de la construida.


  “Aora me va clama la polisia,” la individua dise con un surie strana e dominante. “Los va es interesada de sabe cual tu ia intende fa asi, como gardor falsa.”


  La individua sorti e securi la porte. Solitar, la xico senti un desira forte de plora, ma se oios deveni apena umida. Par alga causa, no plora veni.