GRASIAS, AMI!
Capitol 1 · Capitol 2 · Capitol 3 · Capitol 4 · Capitol 5 · Capitol 6 · Capitol 7 · Capitol 8 · Capitol 9 · Capitol 10 · Capitol 11 · Capitol 12 · Capitol 13 · Capitol 14 · Capitol 15 · Capitol 16 · Capitol 17 · Capitol 18 · Capitol 19 · Capitol 20

Capitol 2

“Donce tu an no conose sua nom de familia?”

“No. Me sabe sola ce sua nom es Joan.”

  

“Capeles negra e alga longa, oios brun. Evidente. Si tu ta sabe cuanto persones es tal…! Alta, tu ia dise. Cuanto alta?”

Esatia nunca ia es entre la cualias xef con cual on pote descrive la carater de Ricardo. El esita. Per contenti la polisior el responde cualce cosa:

“185 sentimetres.”

“E cuanto el pesa, seguente tu opina? Tu ia dise ce el es magra.”

“Si, el es multe magra, ma me ave no idea sur sua pesa. Como me ta pote sabe?”

La regarda desplasente de la polisior no es fasil tolerable. Denova la xico dise cualce cosa:

“Cisa 70 cilogrames.”

“Aora, bon. Es multe dutosa ce nos va trova el, ma … ci sabe?” la polisior dise. E como si acel, par se mesma, no ta elimina ja sufisinte la espera, el ajunta: “En tota modos, con la encontra prosima de la xefes de stato en nos site, nos no va pote ata plu temprana ce pos alga dias.”

Ricardo tota no gusta la situa. El ia veni per reseta un aida, e on trata el cuasi con nonjentilia. En cuando el nesesa un compati, acel polisior es cuasi sin cor. Ricardo senti ce el mesma es spesial, ma per la person ci es a fronte, el es sola un entre mil similes. La encontra de la xefes de stato no aida. Tota la nervos de la polisia es tensada par esta aveni.

“Cual me debe fa aora?” el demanda. “Me no ave mone per revade a mea casa, o an per telefoni.”

“Aora, mea xico peti, esta no es mea problem. Me no sabe. Vade a tua consuleria, cisa.”

Esta paje es presentada con la lisensa CC Attribution-Share Alike 4.0 International.
Lo ia es automatada jenerada de la paje corespondente en la Vici de Elefen a 4 april 2024 (17:36 UTC).