Capitol 17

En la abitada de la teroristes, tri omes lansa resiproca insultas.

“Basta!” la Un dise con autoria. “Me va porta ancora la uniforma.”

“De longa tu ta debe ja es a via,” la Du dise con desacorda. “Me no comprende tua ideas strana. Normal vestida, en auto, tu ta es ja estra cualce peril ce la polisia catura tu…”

“Con un uniforma de gardor, tu va es pronto reconosable,” la om tre ajunta con la mesma mal vose.

“Esata no. Un person en uniforma sur un bisicle es videda par tota persones, ma nun memora. Bon, me es la xef, e basta con esta discute.

Lo apare ce vos no pote comprende, ma acel cambia no cosa. Me no aseta continua la discute.”

“Un uniforma! Los no pote comprende”, el pensa ancora en cuando un silentia comensa es pesosa en la sala. De sempre el ave un ama forte a la uniformas. Ja cuando el ia ave des anios, e se frate de dudes anios ia reveni a casa, con sua veste de soldato, el ia senti un amira grande cual no vera ia es impedida par la fato ce esta frate parla constante sur el con multe despeta. E cuando esta frate ia deveni un polisior, el ia aspeta tan bela en sua uniforma! El ia adirije ancora se parla a el de alta, como si sua frate ia es alga cosa falida par la natur, e acel fato ia coleri la xico, ma un tan multe amira ia es miscante se en la coleria! E con la amira, el ia veni un desira forte de mostra a veses a la frate sua valua. La plu vea ia trova constante un plaser en la arte cual el ia perfeti plu e plu, de riabli la frate peti, ma esta fato sola ia forti en la xico la vole de segue la via de sua frate per pote dise a alga dia: “Regarda. Me no es un falida. Ance me ave un uniforma. E on trova ce me es plu bon ca tu.”

Ma par causa de alga fali, cual un dotor de testa ia descrive nononesta, la frate plu joven no ia resta longa un soldato. La polisia ia refusa el, car el ia es alga tro basa. En la esamina per deveni controlor de fero-via el ia fali. La servi de duana ia refusa nonjusta el, pos reseta de un reporta sur se condui cuando el ia es soldato. E alora se frate polisior ia deveni matada par un vil… Aora, cuando el porta un uniforma bela, e reali constante atas famosa, cual fa la mundo parla sur el, e fa ce el senti sua importante, on debe no prende de el la plaser de traversa sur bisicle la area en uniforma!

Es stonante cuanto cosas on pote espresa sin parla. En cuando la om un perde se en se recordas e consideras sur la uniformas, la om du e la om tre regarda resiproca se, e los intercambia con la oios, a veses aidada par un move discreta de mano, ideas la plu interesante.

Cuando la xef sorti vidable de sua bani dulse-amarga en pensa silente, la om du parla:

“Me ia pensa tra cuando tu ia resta longa sin parla, e a la fini me ia cambia la me opina. Aora lo apare a me ce tu razona bon. Sur un bisicle, con un uniforma de gardor, tu va es min persepable.”

“Si,” la om tre ajunta, “aora ance me opina la mesma. Plu, la fato ce tu no ia fuji pronto va aida. An la polisia, xercante tu, no va preocupa sur un gardor ci vade lenta sur bisicle a un tempo tan tarda pos la avenis. Aora, cuando tu fas es tota sin barba, tu no plu sembla tua fotos. E car nun pote suspeta ce tu porta un uniforma…”

“Vos es serta ce vos ia mata acel individua ci ia atenta para me a la sorti de Plunova?”

“Si, tota serta. No ave preocupas sur acel un.”

“Bon. Aora cada cosa es en ordina. Me va vade pronto sur bisicle. Vos conose vos debes sur la segue. Ta ce vos ata esata seguente los. Me fida vos. Txau!”

No tempo multe longa pasa, cuando la om du telefoni:

“La polisia? Me ia vide la teroriste de ci sua foto es trovable a cada loca en la pais. El porta un uniforma de gardor e el vade calma sur bisicle. En dirije de la mar, lo pare a me. Ante alga minutos el ia pasa longo la Teatro Sentral. Atende, el no plu ave an sola un capeleta sur sua fas, ma an tal el es plen reconosable.”

“Bon,” la om tre dise. “Aora ta ce nos vade a la loca ascondeda cual el no conose. A la fini nos va es desembarasada de acel individua, ci deveni plu e plu perilosa par se insiste de porta un uniforma e par se noncapasia de considera la realia.”

En la mesma tempo, en la polisieria, la om joven ci veni de reclui la telefon, declara ce el es sin comprende:

“Imajina! Si se informa es esata, el ave la direto de reseta un cuantia grande de mone, e el an no ia dise sua nom, o de do el telefoni. La popla deveni strana cuando el relata con la polisia.”