Ata 3, Sena 4.

La campo. Ante un cabana bruta. Ancora la tempesta.

[Lear, Kent, e la Fol entra.]

Kent. Asi es la cabana, mea senior. Per favore, mea senior, entra.
La tirania de la note abrida es tro sever
per la tolera de natur.

Lear. Lasa me solitar.

Kent. Per favore, mea senior, entra asi.

Lear. Esce lo ta rompe mea cor?

Kent. Me ta prefere rompe la mea. Per favore, me senior, entra.

Lear. Tu pensa ce lo es dur ce esta tempesta intensa
invade nos a la pel. Lo es tal a tu;
ma do la maladia plu grande es afisada,
la min grande es apena sentida. Tu debe evita un urso;
ma si tu fuji asta un mar furiosa,
tu ta encontra la urso e se boca. Cuando la mente es libre,
la corpo es plu delicata. La tempesta en me mente
sutrae de mea sensas tota senti
estra lo cual es colpante ala. Nongrasia fial!
Esce lo no es como esta boca ta lasera esta mano
per la leva de comes per el? Ma me va puni tota!
No, me no va plora plu. Esclui me en un tal note!
Pluve plu; me va dura.
En un tal note! O Regan, Goneril!
Tua padre vea e amante, de ci sua cor onesta ia dona tota!
O, sur acel via es dementia; me ta evita acel!
No plu de acel.

Kent. Per favore, mea senior, entra asi.

Lear. Per favore, ta ce tu entra par tu mesma; xerca tua comforta.
Esta tempesta no va dona a me la tempo per pensa
de cosas cual dole me plu. Ma me va entra.
[A la fol] A en, xico, entra prima. – Povre sin casa –
No, entra. Me va prea, e alora me va dormi.
[La fol sorti.]
Miseras povre e nuda, a cualce loca tu vade,
ci sufri de la colpas de esta tempesta sin compatia,
como tua testas sin casa e ventres sin comeda,
tua trapas laserada e bucosa, defende tu
de saisones como estas? O, me ia cura
tro min de esta! Aseta tua medisin, la ostentosa;
esposa tu mesma per senti lo cual la miseras senti,
afin tu ta pote pluve la suprapasa a los
e mostra un sielo plu justa.

Edg. [a en] Un metre e un dui, un metre e un dui! Povre Tom!

[La fol entra de la cabana.]

Fol. No veni en asi, tio; lo ave un fantasma. Aida me, aida me!

Kent. Dona tua mano a me. Ci es ala?

Fol. Un fantasma, un fantasma! El dise ce se nom es povre Tom.

Kent. Cual es tu ci ronca ala en la palia?
Veni a estra.

[Edgar entra, desemblada como un loco.]

Edg. A via! la demon vil segue me!
Tra la spinablanca agu, la venta fria sofla.
Ha! Vade a tua leto fria, e caldi tu.

Lear. Esce tu ia dona tota a tua du fias,
e tu ia deveni esta?

Edg. Ci dona cualce cosa a povre Tom?
el ci la demon vil ia gida tra foco e tra flama,
tra rios basa e tra vortises, tra pantanes e fango;
ci ia resta coteles su sua cuxin e lasos sur sua banca,
pone venena asta sua gaxa, fa ce el deveni orgulosa en sua cor
e monta un cavalo trotante supra un ponte de cuatro ditos de largia,
e xasa sua ombra propre per un trador. Bondise tu sinco inteletos!
Tom es fria. O, du di, du di, du di, du.
Bondise tu de vortises de venta, colpas de la stelas, e pestas!
Dona a Tom alga carita, el ci la demon vil frustra.
Ala me vide el – e ala – e ala denova – e ala!

[Tempesta continua.]

Lear. Cual, esce sua fias trae el a esta state?
Tu no ia pote salva alga cosa? Tu ia dona tota a los?

Fol. No, el ia salva un covre, o nos ta es embarasada.

Lear. Aora tota la pestas cual pende en la aira,
e cual pende condenada supra la falis de omes, desende sur tua fias!

Kent. El no ave fias, senior.

Lear. Moria, trador! no cosa ta pote vinse un natur
a tal basia estra sua fias sin compatia.
Esce lo es la moda, cual padres desprendeda
ta reseta tan poca compatia per sua carne?
Puni justa! Lo es esta carne cual ia jenita
acel fias pelicanin.

Edg. Pilicoc senta sur Monte Pilicoc. Alo, alo, lu, lu!

Fol. Esta note fria va cambia tota de nos a foles e locos.

Edg. Proteje tu mesma contra la demon vil;
obedi tua jenitores; manteni justa tua prometes;
no blasfema; no adultera con la sposa de un otra om;
no dirije tua cor dulse a vestes orgulosa. Tom es fria.

Lear. Cual tu ia es?

Edg. Un servor, orgulosa en cor e mente;
ci ia risa sua capeles, ia pone sua gantos en sua xapeta;
ci ia atende la libido de la cor de mea concubina e fa la ata de oscuria con el;
ci ia jura tan multe juras como me parla parolas, e ia rompe los en la fas dulse de sielo;
on ci ia dormi en la conspira de libido, e ia velia per ata.
Me ia ama profonda la vino e la dados; e regardante femes,
me ia ave un arem plu grande ca la Turces.
Un cor falsa, un orea per mentis, un mano sanguosa;
un porco pigra, un volpe furante, un lupo avar, un can loco, un leon xasante.
No permete la grinse de sapatos o la xuxa de sedas tradi tua cor povre a un fem.
No pone un pede en un bordel, un mano en un falda,
un pen en la libro de un prestor, e defia la demon vil.
Ancora tra la spinablanca, la venta fria sofla; dise sum mum alo no nonia.
Delfin mea xico, mea xico, sesa! permete ce el trota e pasa.

[Tempesta continua.]

Lear. Ai, tu ta es plu bon en la tomba ca responde con tu corpo noncovreda
a esta estrema de la sielos. Esce un om es no plu ca esta? Considera bon el.
Tu no debe la seda a la verme, la pel a la bestia, la lana a la ovea, la parfum a la siveta.
Ha! Asi on ave tre omes sofisticada! Tu es la cosa se mesma;
un om sin furnis es no plu ca un animal duida tal povre e nuda como tu.
A via, a via, debes! Veni, desbotoni asi.

[El lasera se vestes.]

Fol. Per favore, tio, es contente! Es un note tro turbosa per nada.
Aora un foco peti en un campania larga es como la cor de un lasiva vea –
un sintil peti, e la resta de sua corpo es fria. Regarda asi, un foco paseante veni.

[Gloucester entra con un torxa.]

Edg. Esta es la demon vil nomida Flibertijibet.
El comensa a la ora de retira e pasea asta medianote.
El dona la catarata, la strabia, e la labio fendeda;
el dona mofo a la trigo blanca, e dole la vivente povre de la tera.
San Withold ia pasea la bosco a tre veses;
El ia encontra la fem Malsonia e sua nove enfantes;
  El ia demanda ce el desmonta
  e sua jura no feri,
E a via, arpia, a via!

Kent. Como tu vade, eselente?

Lear. Cual el es?

Kent. Ci es ala? Cual tu xerca?

Glou. Cual tu es, ala? Tua nomes?

Edg. Povre Tom, ci come la rana nadante, la sapo, la raneta, la triton, e la salamandra;
el ci en la furia de sua cor, cuando la demon vil coleri, come la feces de boves como saladas,
engoli la rata vea e la can mor, bevi la covre verde de la stange staniante;
el ci es flajelida de un parocia a la otra, e punida par pilori e prison;
el ci ia ave tre completas per se dorso, ses camisas per se corpo, un cavalo per monta, e armas per porta;
Ma muses e ratas e tan animales peti,
ia es la comeda per Tom per sete anios longa.
Garda tu contra mea seguor. Pas, Smulkin! pas, demon!

Glou. Ai, esce tu eselente no ave acompaniores plu bon?

Edg. La prinse de oscuria es un bon senior!
El es nomida Modo, e Mahu.

Glou. Nosa carne e sangue ia deveni tan vil, me senior,
ce el odia nos ci pari los.

Edg. Povre Tom es fria.

Glou. Vade a en con me. Mea debe no pote sufri
obedi la comandas sever de tua fias.
An si sua comanda es ce me bari mea portes
e permete ce esta note tiranin ta saisi tu,
ancora me ia osa xerca tu
e trae tu a do la foco e la comeda es preparada.

Lear. Prima, permete ce me parla con esta filosofiste.
Ce es la causa de tona?

Kent. Per favore, me senior, prende sua ofre; vade en la casa.

Lear. Me vole parla con esta Theban instruida.
Ce es tua campo de studia?

Edg. Como evade la demon e mata pestes nosiva.

Lear. Permete ce me demanda un cosa en privata.

Kent. Suplica el a un ves plu afin el vade, me senior.
Sua inteletos comensa deveni turbada.

[Tempesta ancora.]

Glou. Esce tu pote culpa el?
Sua fias desira sua mori. A, acel bon Kent!
El ia dise ce lo va es tal – om povre e escluida!
Tu dise ce la re deveni demente. Me ta dise a tu, ami,
me es cuasi loco ance. Me ia ave un fio,
aora deseritada. El desira mea mori,
ma resente, multe resente, me ia ama el, ami –
No padre ama plu sua fio. Vera, me dise a tu,
la tristia ia loci mea inteleto. Cual un note es esta!
Me suplica tua eselente –

Lear. O, demanda compatia, senior.
Filosofiste nobil, me demanda tua acompania.

Edg. Tom es fria.

Glou. A en, bonom, ala, en la cabana; tu ta no fri plu.

Lear. Veni, ta ce tota de nos entra.

Kent. Asi, mea senior.

Lear. Con el!
Me va resta ancora con mea filosofiste.

Kent. Mea bon senior, calmi el; permete ce el trae la om.

Glou. Trae el con tu.

Kent. Senior, veni; vade con nos.

Lear. Veni, bon Athenan

Glou. No parolas, no parolas! silenti.

Edg. La enfante Rolando ia veni a la tore oscur;
Sua parola ia es ancora
Fi, fo, e fom!
Me ole la sangue de un om brites.

[Tota sorti.]