Capitol 9

1. En pasea, el ia vide un om sieca de nase.
2. Sua disiplos ia demanda a el: “Mestre, ci ia peca, el o sua jenitores, afin el ia nase sieca?”
3. “No el no sua jenitores ia peca”, Jesus ia responde. “El ia nase tal afin la atas de Dio pote es vidable tra el.
4. Nos debe fa la atas de el ci ia envia me, en cuando lo es la dia. La note ariva, cuando nun pote labora.
5. En cuando me es en la mundo, me es la lus de la mundo.”
6. Pos dise esta, el ia sputa a tera, ia fa arjila con la saliva e ia pone lo sur la oios de la sieca,
7. disente a el: “Vade per lava en la stange de Siloam” (cual sinifia ‘Enviada’). La sieca ia vade, ia lava se e, pos reveni, el ia pote vide.
8. La visinas e los ci ia vide el mendicante a ante, ia demanda a se: “Esce esta no es el ci ia senta per demanda carita?”
9. Algun ia opina: “El es la mesma.” “No,” otras ia responde, “el es algun ci es simil a el.” El ia dise: “El es vera me.”
10. Los ia dise a el: “Como tua oios ia es abrida?”
11. El ia responde: “Acel om ci nomi se Jesus ia fa arjila, ia pone lo sur mea oios, e ia dise a me: ‘Vade a lava en Siloam.’ Me ia vade, me ia lava e me ia pote vide.”
12. E los ia demanda a el: “Do el es?” El ia responde: “Me no sabe lo.”
13. La om ci ia es sieca ia es portada a ante la fariseos.
14. Lo ia es saturdi cuando Jesus ia fa arjila e ia abri la oios a el.
15. Pos alora la fariseos ia demanda como el ia pote vide. El ia dise a los: “El ia pone arjila sur mea oios, me ia lava me e me pote vide.”
16. Alga fariseos ia dise: “Acel om no veni de Dio, car el no manteni la saturdi.” Otras ia responde: “Como un pecor pote fa tal cosas?” E on ia ave un divide entre los.
17. A pos los ia dise denova a la sieca: “E tu, cua tu dise sur el ci ia abri tua oios?” La om ia responde: “El es un profeta.”
18. An tal, la iudis no ia vole crede ce acel om ia es sieca e ce el pote vide, asta ce los ia clama a sua jenitores
19. e ia demanda a los: “Es esta vosa fio, de ci on dise ce el ia nase sieca? Como el pote vide aora?”
20. Sua jenitores ia responde: “Nos sabe ce el es nosa fio e ce el ia nase sieca,
21. ma como el pote vide aora e ci ia abri sua oios, nos no sabe lo. Demanda a el: el ave la eda per responde mesma.”
22. Sua jenitores ia dise esta par teme a la iudis, ci ia acorda entre los per esclui de la sinagoga cualcun ci ta reconose Jesus como la Maxia.
23. Par esta los ia dise: “El ave la eda per responde mesma, demanda a el.”
24. La iudis ia clama a un ves du la om ci ia es sieca e ia dise a el: “Glori Dio. Nos sabe ce acel om es un pecor.”
25. “Me no sabe ce el es un pecor,” el ia responde. “Lo cual me sabe es ce a ante me ia es sieca e aora me vide.”
26. Los ia demanda el: “Cua el ia fa a tu? Como el ia abri tua oios?”
27. El ia responde a los: “Me ia dise a vos e vos no ia escuta me. Perce vos vole oia lo denova? Esce ance vos vole deveni sua disiplos?”
28. Los ia insulta el e ia dise a el: “Tu es disiplo de acel om; nos es disiplos de Moxe!
29. Nos sabe ce Dio ia parla a Moxe, ma nos no sabe de do esta veni.”
30. La om ia responde: “Esta es stonante: ce vos no sabe de do esta om veni, an si el ia abri ja mea oios.
31. Nos sabe ce Dio no escuta la pecores, ma el escuta los ci onora e fa sua vole.
32. Nunca on ia oia dise ce algun ia abri la oios a un sieca de nase.
33. Si esta om no ta veni de Dio, el ta pote fa no cosa.”
34. Los ia responde a el: “Tu ia nase plen de peca, e tu vole instrui nos?” E los ia espulsa el.
35. Cuando Jesus ia escuta ce los ia espulsa el, el ia trova el e ia demanda a el: “Esce tu crede a la Fio de la Om?”
36. El ia responde: “Ci el es, Senior, afin me pote crede a el?”
37. Jesus ia dise a el: “Tu ia vide el: el es el ci es parlante con tu.”
38. Alora el ia esclama: “Me crede, Senior,” e el ia proni ante el.
39. A pos Jesus ia ajunta: “Me ia veni a esta mundo per un judi: afin los ci no vide pote vide, e los ci vide, deveni sieca.”
40. La fariseos ci ia es con el ia oia esta e ia dise a el: “Esce ance nos es sieca?”
41. Jesus ia responde a los: “Si vos ta es sieca, vos no ta ave peca, ma car vos dise ‘Nos vide’, vosa peca resta.”