Capitol 4

1. Cuando Jesus ia consensi ce la fariseos ia escuta dise ce el ave plu disiplos e batiza plu ca Joan
2. (an si el no ia batiza, ma sua disiplos)
3. el ia abandona Judea e ia reveni a Galilea.
4. Per esta el ia debe traversa Samaria.
5. El ia ariva a un site de Samaria nomida Sica, prosima a la teras cual Jacob ia dona a sua fio Jose.
6. Ala ia es la poso de Jacob. Jesus, fatigada de la via, ia senta prosima a la poso. Lo ia es mediadia.
7. Un fem de Samaria ia vade per estrae acua, e Jesus ia dise: “Dona a me per bevi.”
8. Sua disiplos ia vade ja a la site per compra comables.
9. La fem samarian ia responde: “Como tu, un iudi, pote demanda per bevi a me, un samarian?” La iudis ia ave no cosa comun con la samarianes.
10. Jesus ia responde: “Si tu ta conose la donada de Dio e ci es el ci demanda a tu ‘Dona a me per bevi’, tu mem ta demanda a el, e el ta dona acua vivente a tu.”
11. El ia responde: “Senior, tu ave no util per estrae acua e la poso es profonda. De do tu estrae acel acua vivente?
12. Esce tu es plu grande ca nosa padre Jacob, ci ia dona esta poso a nos, do el ia bevi como ance sua fios e sua animales?”
13. Jesus ia responde a el: “El ci bevi de esta acua va sidi denova,
14. ma el ci bevi la acua cual me va dona a el, va sidi nunca denova. La acua cual me va dona a el, va deveni en el un fonte cual va fonti asta la Vive eterna.”
15. La fem ia dise: “Senior, dona a me acel acua afin me no va sidi plu e me no va nesesa veni a asi per estrae lo.”
16. Jesus ia responde a el: “Vade, clama a tua sposo e reveni asi.”
17. La fem ia responde: “Me ave no sposo.” Jesus ia continua: “Tu parla coreta cuando tu dise ce tu ave no sposo,
18. car tu ia ave sinco e el ci tu ave aora no es tua sposo; en esta tu ia dise la veria.”
19. La fem ia dise a el: “Senior, me vide ce tu es un profeta.
20. Nosa padres ia adora sur esta monte, e vos dise ce lo es en Ieruxalim ce on debe adora.”
21. Jesus ia responde: “Crede me, fem, un tempo ariva en cual no sur esta monte, no en Ieruxalim, la Padre va es adorada.
22. Vos samarianes adora lo cual vos no conose; nos adora lo cual nos conose, car la salva veni de la iudis.
23. Ma la tempo prosimi, e ia ariva ja, en cual la adorores vera va adora la Padre en spirito e en veria, car los es la adorores ci la Padre vole.
24. Dio es spirito, e el ci adora el debe fa lo en spirito e en veria.”
25. La fem ia dise: “Me sabe ce la Maxia, nomida Cristo, debe veni. Cuando el veni, el va anunsia tota a nos.”
26. Jesus ia responde a el: “Me es el, ci parla con tu.”
27. En acel momento, sua disiplos ia ariva e ia es surprendeda cuando los ia vide el parlante con un fem. An tal, nun ia demanda: “Cua tu vole de el?” o “Perce tu parla con el?”
28. La fem, lasante ala sua carafa, ia core a la site e ia dise a la persones:
29. “Veni per vide un om ci ia dise a me tota cual me ia fa. Esce esta no ta es la Maxia?”
30. Alora los ia sorti de la site e ia vade a el.
31. Entretempo, la disiplos ia insiste a Jesus, disente: “Come, Mestre.”
32. Ma el ia dise a los: “Me ave per come un comable cual vos no conose.”
33. La disiplos ia demanda lunlotra: “Esce algun ia trae a el alga cosa per come?”
34. Jesus ia responde a los: “Mea comable es ce me fa la vole de el ci ia envia me e ce me fini sua labora.
35. Vos dise ce cuatro menses resta ancora ante la recolie. Ma me dise a vos: Leva la oios e regarda la campos: los es ja matur per la recolie.
36. Ja la falxor reseta sua salario e recolie la gran per la vive eterna, afin la semor e la falxor comparti un mesma joia.
37. Car tal on reali la proverbo: ‘Algun semi e un otra recolie.’
38. Me ia envia los a recolie do vos no ia labora ja; otras ia labora, e vos recolie la frutas de sua laboras.”
39. Multe samarianes de esta site ia crede a el par causa de la parolas de la fem, ci ia atesta: “El ia dise a me tota cual me ia fa.”
40. Par esta, cuando la samarianes ia prosimi a Jesus, los ia suplica el a resta con los, e el ia resta ala tra du dias.
41. Multe plu ia crede a el, par causa de sua parolas.
42. E los ia dise a la fem: “Aora nos no crede sola par causa de lo cual tu ia dise a nos; nos mesma ia escuta e sabe ce el es vera la Salvor de la mundo.”
43. Pos du dias, Jesus ia vade en dirije a Galilea.
44. El mesma ia declara ce un profeta no ave prestijia en sua loca nativa.
45. Ma cuando el ia ariva, la galileanes ia reseta bon el, car los ia vide ja tota cual el ia fa en Ieruxalim en Pascua; ance los ia vade a la festa.
46. E el ia vade denova a Canaan de Galilea, do el ia converti ja la acua en vino. On ia ave ala un ofisior reial, ci ia ave un fio malada en Cafarnaum.
47. Cuando el ia sabe ce Jesus ia ariva a Judea e ce el es en Galilea, el ia vade per vide el e ia suplica el a desende per remedia sua fio morinte.
48. Jesus ia dise a el: “Si vos no vide sinias, vos no va crede.”
49. La ofisior ia responde a el: “Senior, veni ante ce mea fio mori.”
50. “Revade a tua casa, tua fio va vive,” Jesus ia dise a el. La om ia fida la dise de Jesus a el, e ia comensa sua via.
51. En cuando el ia vade, sua servores ia encontra el e ia anunsia a el ce sua fio vive.
52. El ia demanda a los cuando sua fio ia comensa recovre. “Ier, a la ora prima de posmedia, la febre ia abandona el,” los ia responde a el.
53. La padre ia recorda ce esta es la mesma ora en cual Jesus ia dise a el: “Tua fio vive.” E alora el e tota sua familia ia crede.
54. Esta ia es la sinia du cual Jesus ia fa cuando el ia reveni de Judea a Galilea.