Capitol 3

1. On ia ave entre la fariseos un om nomida Nicodemo, ci ia es un de la gidores entre la iudis.
2. El ia vade a note per vide Jesus e ia dise a el: “Mestre, nos sabe ce tu ia veni de Dio per ensenia, car nun pote fa la sinias cual tu fa, si Dio no es con el.”
3. Jesus ia responde: “Me serti tu ce nun pote vide la Rena de Dio estra si el renase.”
4. Nicodemo ia demanda a el: “Como un om pote nase cuando el es vea? Esce el pote entra a un ves du en la utero de sua madre e nase denova?”
5. Jesus ia responde a el: “Me serti ce el ci no nase de la acua e de la Spirito no pote entra en la Rena de Dio.
6. Lo cual nase de la carne es carne, lo cual nase de la Spirito es spirito.
7. No es stonada ce me ia dise a tu: “Vos debe nase denova.”
8. La venta sofla do lo vole: tu oia sua vose, ma tu no sabe de do lo veni, no a do lo vade. La mesma aveni con tota ci ia nase de la Spirito.”
9. “Como tota esta es posible?” Nicodemo ia demanda denova.
10. Jesus ia responde: “Tu, ci es mestre en Israel, no sabe esta cosas?
11. Me serti tu ce nos parla de lo cual nos sabe e nos atesta lo cual nos ia vide, ma vos no aseta nosa atesta.
12. Si vos no crede cuando me parla de la cosas de la tera, como vos va crede si me parla de la cosas de la sielo?
13. Nun ia asende a la sielo, estra el ci ia desende de la sielo, la Fio de la Om ci es en la sielo.
14. En la mesma modo como Moxe ia leva la serpente en la deserto, ance lo es nesesada ce la Fio de la Om es levada,
15. afin totas ci crede a el ave vive eterna.
16. Si, Dio ia ama tan multe la mundo, ce el ia dona sua sola fio afin tota ci crede a el no mori, ma pote ave vive eterna.
17. Car Dio no ia envia sua Fio per judi la mundo, ma afin la mundo es salvada tra el.
18. El ci crede a el, no es condenada; el ci no crede, es ja condenada, car el no ia crede a la nom de la sola Fio de Dio.
19. E esta es la judi: la lus ia veni a la mundo, e la omes ia prefere la oscuria a la lus, car sua atas ia es mal.
20. Tota ci fa mal odia la lus e no prosimi a lo, temente ce sua atas va es descovreda.
21. Ma cualcun ci ata seguente la veria prosimi a la lus, afin on pote vide clar ce sua atas ia es fada en Dio.”
22. Pos esta, Jesus ia vade con sua disiplos a Judea. El ia resta ala con los e ia batiza.
23. Joan ia segue batizante en Enos, prosima a Salim, car on ia ave multe acua en acel loca e la persones ia vade per es batizada.
24. Joan ancora no ia es prisonida.
25. Alora un disputa ia comensa entre la disiplos de Joan e un iudi, sur puri.
26. Los ia vade per xerca Joan e los ia dise a el: “Mestre, el ci ia es con tu en la otra lado de la Urdun e sur ci tu ia atesta, batiza ance e tota vade a el.”
27. Joan ia responde: “On pote reseta sola lo cual on reseta de la sielo.
28. Vos atesta ce me ia dise: ‘Me no es la Maxia, ma me no ia es enviada ante el.’
29. En la rituos de sposi, el ci sposi es la spos; ma la ami de la spos, ci es ala e escuta el, es plenida de joia cuando el escuta sua vose. Par esta mea joia es aora perfeta.
30. Lo es nesesada ce el crese e me diminui.”
31. El ci veni de la alta es supra totas. El ci es de la tera parteni a la tera e parla de la tera. El ci ia veni de la sielo
32. atesta cua el ia vide e escuta, ma nun reseta sua atesta.
33. El ci reseta sua atesta autentici ce Dio es fidable.
34. El ci ia es enviada par Dio dise la parolas de Dio, car Dio dona a el la Spirito sin mesura.
35. La Padre ama la Fio e ia lasa tota en sua manos.
36. El ci crede a la Fio ave vive eterna. El ci refusa crede a la Fio no va vide la Vive, ma la coleria de Dio resta sur el.