Capitol 8

1. Jesus ia vade a la monte de la Olivos.
2. Con la leva de sol el ia reveni a la Templo, e tota la popla ia veni a el. A pos, el ia senta e ia comensa instrui los.
3. La scrivistes e fariseos ia trae a el un fem ci ia es surprendeda en adultera, e situante el en la media de tota de los,
4. los ia dise a Jesus: “Mestre, esta fem ia es surprendeda en la ata de adultera.
5. Moxe, en la Lege, ia comanda lansa petras a esta clase de femes. E tu, cua tu dise?”
6. Los ia dise esta per proba el, afin los ta pote acusa el. Ma Jesus, curvinte se, ia comensa scrive en la solo con la dito.
7. Cuando los ia insiste, el ia reti e ia dise a los: “Si cualcun no ave peca, ta ce el lansa la petra prima.”
8. E curvinte se denova, el ia continua scrive en la solo.
9. Pos escuta esta parolas, totas ia retira se, pos lunlotra, comensante con la plu veas. Jesus ia resta solitar con la fem, ci ia resta ala,
10. e, retinte se, el ia demanda a el: “Fem, do es tua acusores? Algun ia condena tu?”
11. El ia responde: “Nun, Senior.” “Ance me no condena tu,” Jesus ia dise a el. “Vade, e no peca plu.”
12. Jesus ia parla denova con los, disente: “Me es la lus de la mundo. Cualcun ci segue me no va pasea en oscuria, ma va ave la lus de Vive.”
13. La fariseos ia dise a el: “Tu atesta sur tu mesma: tua atesta es sin valua.”
14. Jesus ia responde a los: “An si me atesta sur me, mea atesta ave valua car me sabe de do me veni e a do me vade; ma vos no sabe de do me veni, no a do me vade.
15. Vos judi seguente la carne; me judi nun,
16. e si me fa lo, mea judi ave valua car el ci judi no es me, ma me e la Padre ci ia envia me.
17. En vosa Lege lo es scriveda ce la atesta de du persones ave valua.
18. Me atesta sur me mesma, e ance la Padre ci ia envia me atesta sur me.”
19. Los ia demanda a el: “Do es tua Padre?” Jesus ia responde: “Vos no conose me o mea Padre; si vos ta conose me, vos ta conose ance mea Padre.”
20. El ia pronunsia esta parolas en la sala de Tesoro, cuando el ia ensenia en la Templo. E nun ia deteni el, car ancora sua ora no ia ariva ja.
21. Jesus ia dise ance: “Me vade, e vos va xerca me e va mori en vosa peca. Do me vade, vos no pote vade.”
22. La iudis ia demanda se: “Esce el va mata se? Esce tal el dise: ‘Do me vade, vos no pote vade’?”
23. Jesus ia continua: “Vos es de la basa, me es de la alta. Vos es de esta mundo, me no es de esta mundo.
24. Par esta me ia dise a vos: ‘Vos va mori en vosa pecas.’ Car si vos no crede ce me es el, vos va mori en vosa pecas.”
25. La iudis ia demanda a el: “Ci es tu?” Jesus ia responde: “Esta es esata lo cual me dise de la comensa.
26. De vos, me ave multe per dise, multe per judi. Ma el ci ia envia me es onesta, e lo cual me ia prende de el es lo cual me dise a la mundo.”
27. Los no ia comprende ce Jesus refere a la Padre.
28. A pos el ia dise a los: “Cuando vos alti la Fio de la Om, alora vos va reali ce me es el, e ce me fa no cosa par me mesma, ma me dise sola lo cual mea Padre ia ensenia a me.
29. El ci ia envia me es con me. El no ia abandona me, car me fa sempre lo cual plase a el.”
30. Car el ia parla tal, multe ia crede a el.
31. A pos Jesus ia dise a acel iudis ci ia crede a el: “Si vos resta en mea parola, vos va es vera mea disiplos,
32. e vos va conose la veria, e la veria va libri vos.”
33. Los ia responde a el: “Nos es desendentes de Abraham e ia es nunca sclavida par cualcun. Como tu pote dise: ‘Vos va es libre’?”
34. Jesus ia responde a los: “Me serti vos ce cualcun ci peca es un sclavo de peca.
35. Un sclavo no resta en un casa per sempre, ma un fio resta per sempre.
36. Donce, si la Fio libri vos, vos va es vera libre.
37. Me sabe ce vos es la desendentes de Abraham. Ma vos atenta mata me, car mea parola no ave spasio entre vos.
38. Me dise a vos lo cual me ia vide en la presentia de mea Padre; pos alora, fa lo cual vos ia escuta de la Padre.”
39. Los ia responde e ia dise a el: “Nosa padre es Abraham.” Jesus ia dise a los: “Si vos ta es la enfantes de Abraham, vos ta ata como el.
40. Ma aora vos es atentante mata me, un om ci ia dise la veria a vos cual me ia escuta de Dio; Abraham no ia fa esta.
41. Vos fa la atas de vosa padre!” Los ia dise a el: “Nos no ia nase estra sposia. Nos ave un sola Padre, Dio.”
42. Jesus ia dise a los: “Si Dio ta es vosa Padre, vos ta ama me, car me veni de Dio e es asi; me no ia veni par me mesma, ma el ia envia me.
43. Perce vos no comprende lo cual me dise? Car vos no pote escuta mea parolas.
44. Vos parteni a vosa padre, la diablo, e vos vole reali la desiras de vosa padre. El ia es un asasinor de la comensa e no suporta la veria, car on ave no veria en el. Cuando el menti, el parla sua propre lingua, car el es un mentor e un padre de mentis.
45. Ma car me dise la veria, vos no crede me.
46. Esce algun de vos pote acusa me de peca? Si me dise la veria, perce vos no crede me?
47. Cualcun ci parteni a Dio escuta la parolas de Dio; par esta causa vos no escuta, car vos no parteni a Dio.”
48. La iudis ia responde disente a el: “Esce nos no fa coreta cuando nos dise ce tu es samarian e ce tu es poseseda par un demon?”
49. Jesus ia responde: “Me no es poseseda; me onora la Padre, ma vos desonora me.
50. Me no xerca mea propre gloria; ma on ave un person ci xerca lo e el es la judor.
51. Me serti vos ce cualcun ci es fidosa a mea parola va mori nunca.”
52. La iudis ia demanda a el: “Aora nos es serta ce tu es poseseda. Abraham ia mori, como lo ia aveni con la profetas, e an tal tu dise: ‘Cualcun ci es fidosa a mea parola va mori nunca.’
53. Esce tu es plu grande ca nosa padre Abraham, ci ia mori? O la profetas, ci ia mori? Ci tu finje es?”
54. Jesus ia responde: “Si me glori me mesma, mea gloria valua no cosa; ma el ci glori me es mea Padre, sur ci vos dise: ‘El es nosa Dio.’
55. Vos no conose el, ma me conose el. E si me ta dise ce me no conose el, me ta es como vos un mentor. Ma me conose el e es fidosa a sua parola.
56. Vosa padre Abraham ia joia esperante vide mea dia; el ia vide lo e el ia es contente.”
57. La iudis ia dise a el: “Tu ancora no ave sincodes anios e tu ia vide ja Abraham?”
58. Jesus ia dise a los: “Me serti vos, ce ante la nase de Abraham, Me Es.”
59. Alora los ia prende petras per lansa los a el; ma Jesus ia asconde e ia vade estra la area de la Templo.