Capitol 10

1. “Me serti vos ce cualcun ci no entra a la ensirca de oveas tra la porte, ma a un otra lado, es un furor e un rubor.
2. El ci entra tra la porte es la pastor de oveas.
3. La gardor abri a el e la oveas escuta sua vose. El clama a cadun per sua nom e sorti los.
4. Cuando el ia estrae tota de los, el vade ante los, e la oveas segue el, car los conose sua vose.
5. Los va segue nunca un nonconoseda, ma los va fuji de el, car los no conose sua vose.”
6. Jesus ia fa esta compara a los, ma los no ia comprende lo cual el vole dise a los.
7. Alora Jesus ia continua: “Me serti vos ce me es la porte de la oveas.
8. Totas ci ia veni ante me es furores e rubores, ma la oveas no ia escuta los.
9. Me es la porte. Cualcun ci entra tra me va es salvada; el va pote entra e sorti, e va trova sua pasto.
10. La furor veni sola per fura, mata e destrui. Ma me ia veni afin la oveas ave Vive, e ave lo en abunda.
11. Me es la bon pastor. La bon pastor dona sua vive per la oveas.
12. La empleada, an tal, ci no es la pastor, e a ci la oveas no parteni, cuando el vide ce la lupo veni, abandona los e fuji, e la lupo catura e sperde los.
13. Car el es empleada, el no cura per la oveas.
14. Me es la bon pastor: me conose mea oveas, e mea oveas conose me
15. – como la Padre conose me e me conose la Padre – e me dona mea vive per la oveas.
16. Me ave otra oveas cual no es de esta manada ci me debe gida: los va escuta mea vose, e tal on va ave un sola manada e un sola pastor.
17. La Padre ama me car me dona mea vive per reateni el.
18. Nun prende lo de me, ma me mesma dona lo. Me ave la potia de dona el e reateni lo: esta es la comanda cual me ia reseta de mea Padre.”
19. Par causa de esta parolas, on ia ave un divide nova entre la iudis.
20. Multe de los ia dise: “El es poseseda par un demon e parla deliriosa. Perce vos escuta el?”
21. Otras ia opina: “Esta parolas no es de un poseseda. Esce un demon ta pote abri la oculos a la siecas?”
22. La festa de Dedica ia es aveninte en acel tempo en Ieruxalim. Lo ia es inverno,
23. e Jesus ia pasea en la Templo, en la Portico de Solomon.
24. La iudis ia ensirca e ia demanda el: “Asta cuando tu va lasa nos suspendeda? Si tu es la Maxia, dise clar lo a nos.”
25. Jesus ia dise a los: “Me ia dise a vos, ma vos no crede. La atas cual me fa par autoria de mea Padre atesta sur me,
26. ma vos no crede, car vos no es entre mea oveas.
27. Mea oveas escuta mea vose, me conose los e los segue me.
28. Me dona Vive eterna a los: los va mori nunca e nun va prende los de mea manos.
29. Mea Padre, ci ia dona los a me, es superior a totas e nun pote prende los de la manos de mea Padre.
30. La Padre e me es un sola cosa.”
31. La iudis ia prende petras per lansa los a el.
32. Alora Jesus ia dise: “Me ia mostra a vos bon atas cual veni de mea Padre. Per cual de los vos vole lansa petras a me?”
33. La iudis ia responde: “Nos no vole lansa petras a tu par un bon ata, ma car tu blasfema, car esente om, tu declara ce tu es Dio.”
34. Jesus ia responde: “Esce lo no es scriveda en la Lege: ‘Me ia dise: Vos es dios’?
35. Si la Lege nomi dios los a ci la Parola de Dio ia veni – e la Scrivedas Santa no pote es canselada –
36. perce vos dise ‘Tu blasfema’ a el ci la Padre ia santi e ia envia a la mundo, car el ia dise: ‘Me es la Fio de Dio?
37. Si me no fa la atas de mea Padre, no crede me;
38. ma si me fa los, crede la atas, an si vos no crede me. Tal vos va reconose e sabe ce la Padre es en me e me en la Padre.”
39. Los ia atenta deteni el denova, ma el ia evade los.
40. Jesus ia vade denova a la otra lado de Ieruxalim, a la loca do Joan ia batiza en la dias temprana, e ia resta ala.
41. Multes ia vade per vide el, e la popla ia dise: “Joan ia fa no sinia, ma tota cual el ia dise sur esta om ia es vera.”
42. E en acel loca multes ia crede a el.