Capitol 7

1. Pos esta, Jesus ia pasea sur la vias de Galilea. El no ia vole viaja tra Judea car la iudis ia atenta mata el.
2. La festa iudi de la Baldacines ia prosimi,
3. e sua frates ia dise a el: “No resta asi, vade a Judea, afin la disiplos de ala vide ance la atas cual tu fa.
4. Cuando on vole deveni conoseda, on no ata en secreta; car tu fa esta cosas, mostra tu a la mundo.”
5. Vera an sua propre frates no ia crede a el.
6. Jesus ia dise: “Mea tempo no ariva ancora, contra ce per vos cualce tempo es bon.
7. La mundo no pote odia vos, ma lo odia me, car me atesta ce sua atas es mal.
8. Ta ce vos vade a la festa. Me no vade a esta festa, car mea tempo no es ancora completida.”
9. Pos dise esta, el ia resta en Galilea.
10. Ma cuando sua frates ia vade a la festa, ance el ia vade, no publica, ma en secreta.
11. La iudis ia xerca el en la festa e ia dise: “Do el es?”
12. Jesus ia es la comenta de la fola. Algas ia opina: “El es un om bon.” Otras, an tal, ia dise: “No, el ia engana la popla.”
13. An tal, nun ia parla publica de el, temente la iudis.
14. Cuando la festa ia es en sua media, Jesus ia asende a la area de la templo e ia comensa ensenia.
15. La iudis ia es stonada e ia dise: “Como el conose la Scrivedas Santa sin studia los?”
16. Jesus ia responde a los e ia dise: “Mea ensenia no parteni a me ma a el ci ia envia me.
17. Cualcun ci eleje fa la vole de Dio va sabe esce mea ensenia es de Dio o esce me parla par mea propre conta.
18. Cualcun ci parla par sua propre conta xerca sua propre gloria, ma cualcun ci xerca la gloria de acel ci ia envia el es onesta, e on ave no falsia en el.
19. Esce Moxe no ia dona la lege a vos? An tal, nun de vos respeta la lege. Perce vos atenta mata me?”
20. La fola ia responde: “Tu es poseseda! Ci atenta mata tu?”
21. Jesus ia responde e ia dise a los: “Me ia fa un sola ata e tota de vos es stonada
22. par causa de lo. Moxe ia dona a vos la sircoside – an si lo no ia veni de Moxe, ma de la patriarcas – e vos sircoside un om en la dia santa.
23. Si un om pote es sircosideda en la dia santa afin la lege de Moxe no es rompeda, perce vos es coler con me cuando me ia sani completa un om en la dia santa?
24. No judi par aspeta, ma judi justa.”
25. Alora, alga de la abitores de Ieruxalim ia dise: “Esce esta no es el ci los atenta mata?
26. E regarda, el parla publica e los dise no cosa a el. Esce la autoriosas ia comprende ce el es la Maxia?
27. Ma nos sabe de do el veni. Cuando la Maxia veni, nun va sabe de do el veni.”
28. A pos Jesus, enseniante en la area de la templo, ia esclama: “Vos conose me e sabe ance de do me veni. An tal, me no ia veni par mea propre conta, ma el ci ia envia me dise la veria, e vos no conose el.
29. Me conose el, car me es de el, e el ia envia me.”
30. Alora, los ia atenta aresta el, ma nun ia pone sua manos sur el, car ancora sua ora no ia ariva.
31. Ma multe de la fola ia comensa crede a el, e ia dise: “Cuando la Maxia veni, esce el va fa plu sinias ca esta om ia fa?”
32. La fariseos ia escuta la fola xuxante sur el, e la pretes xef e la fariseos ia envia gardores per aresta el.
33. Donce Jesus ia dise: “Me va es con vos sola pico plu, e a pos me va vade con el ci ia envia me.
34. Vos va xerca me ma no va trova me, e do me es, vos no pote veni.”
35. Donce la iudis ia dise a lunlotra: “A do el va vade, do nos no va trova el? Serta el no va vade a la iudis sperdeda entre la paganes, per ensenia la paganes, vera?
36. Cua es la sinifia de esta dise: ‘Vos va xerca me ma no va trova me, e do me es, vos no pote veni’?”
37. En la dia ultima e plu grande de la festa, Jesus ia sta se e ia cria: “Ta ce cualcun side veni a me e bevi.
38. Per cualcun ci crede a me, como la Scrivedas Santa dise: ‘De sua peto rios de acua vivente va flue.’”
39. El ia dise esta en refere a la Spirito cual los ci ia veni a crede a el va reseta. On ia ave, comprendable, ancora no Spirito, car Jesus no ia es ancora glorida.
40. Algun de la fola ci ia escuta acel parolas ia dise: “Esta es vera la Profeta.”
41. Otras ia dise: “Esta es la Maxia.” Ma otras ia dise: “La Maxia no va veni de Galilea, no?”
42. Esce la Scrivedas Santa no dise ce la Maxia va es de la familia de David e va veni de Bethlehem, la vileta do David ia vive?”
43. Donce un divide ia aveni en la fola par causa de el.
44. Alga de los ia vole an aresta el, ma nun ia pone sua manos sur el.
45. Donce la gardores ia vade a la pretes xef e la fariseos, ci ia demanda a los: “Perce vos no ia trae el?”
46. La gardores ia responde: “Nunca a ante algun ia parla tal.”
47. Donce la fariseos ia responde a los: “Esce ance vos ia es enganada?
48. Esce algun de la autoriosas o de la fariseos ia crede a el?
49. Ma esta fola, ci no conose la leje, es maldiseda.”
50. Nicodemo, un de lor membros ci ia vade per vide Jesus, ia dise a los:
51. “Esce nosa lege condena un person ante escuta el e trova cua el fa?”
52. Los ia responde e ia dise a el: “Esce ance tu es galilean? Esamina la Scrivedas Santa e tu va vide ce de Galilea no profeta surje.”
53. E cada ia vade a sua propre casa.