Capitol 2

1. Pos tre dias la rituos de sposi ia es selebrada en Canan de Galilea, e la madre de Jesus ia es ala.
2. Jesus ance ia es invitada con sua disiplos.
3. E car vino ia manca, la madre de Jesus ia dise a el: “Los no ave vino.”
4. Jesus ia responde: “Fem, como esta conserna nos? Mea ora ancora no ia ariva.”
5. Ma sua madre ia dise a la servores: “Fa tota cual el dise a vos.”
6. On ia ave ala ses carafas de petra destinada a la rituos de puri de la iudis, e cada de los ia conteni sirca sento litres.
7. Jesus ia dise a la servores: “Pleni esta carafas con acua.” E los ia pleni los asta la borda.
8. “Estrae aora alga,” Jesus ia ajunta, “e porta a la servor xef.” E tal los ia fa lo.
9. La servor xef ia proba la acua cambiada a vino e car el no ia sabe sua orijina, an si la servores ci ia estrae la acua ia sabe lo, el ia clama a la sposo
10. e ia dise a los: “On servi sempre prima la bon vino e cuando totas ia bevi bon, on trae la vino de cualia inferior. Tu, an tal, ia garda la bon vino asta esta momento.”
11. Esta ia es la prima de la sinias de Jesus, e el ia fa lo en Canaan de Galilea. Tal el ia mostra sua gloria, e sua disiplos ia crede a el.
12. Pos esta, el ia desende a Cafarnaun con sua madre, sua frates e sua disiplos, e los ia resta ala per alga dias.
13. La Pesah de la iudis ia prosimi. Jesus ia asende a Ieruxalim
14. e el ia trova en la templo la vendores de boves, oveas e pijones e la intercambiores sentante ante sua tables.
15. El ia fa un flajelo de cordas e el ia espulsa totas de la Templo, con sua oveas e boves; el ia sperde la monetas de la intercambiores, ia inversa sua tables
16. e ia dise a la vendores de pijones: “Prende estas estra asi e no fa de la casa de mea Padre un casa de comersia.”
17. E sua disiplos ia recorda la parolas de la Scrivedas Santa: “La zelo per Tua Casa va consuma me.”
18. Alora la iudis ia demanda: “Cual sinia tu dona a nos per ata tal?”
19. Jesus ia responde a los: “Destrui esta templo e en tre dias me va construi lo denova.”
20. La iudis ia dise a el: “On ia nesesa cuatrodes-ses anios por construi esta Templo, e tu va construi lo en tre dias?”
21. Ma el ia refere a la templo de sua corpo.
22. Par esta, cuando Jesus ia revive, sua disiplos ia recorda ce el ia dise esta, e los ia crede a la Scrivedas Santa e a la parolas cual el ia dise.
23. Cuando el ia es en Ieruxalim, en la Festa de Pesah, multes ia crede a Sua Nom cuando los ia vide la sinias cual el ia fa.
24. Ma Jesus no ia fida los, car el ia conose totas
25. e el no ia nesesa es informada de la umanas: el ia sabe lo cual es a interna de cada person.