Capitol 11

1. On ia ave un om malada, Lazaro de Betania, la vileta de Maria e sua sore Marta.
2. Maria ia es la mesma ci ia unje la Senior con la olio parfumida, e ia seci sua pedes con sua capeles. Sua frate Lazaro ia es el ci ia es malada.
3. La sores ia envia per dise a Jesus: “Senior, el ci tu ama, es malada.”
4. Pos oia esta, Jesus ia dise: “Esta maladia no es matante; lo es per la gloria de Dio, afin la Fio de Dio es glorida par el.”
5. Jesus ia ama multe Marta, sua sore e Lazaro.
6. An tal, cuando el ia oia ce el es malada, el ia resta per du dias plu en la loca do el ia es.
7. Pos esta, el ia dise a sua disiplos: “Ta ce nos reveni a Judea.”
8. La disiplos ia dise: “Mestre, resente la iudis ia vole lansa petras a tu, e tu vole reveni ala?”
9. Jesus ia responde: “Esce on no ave des-du oras de dia? El ci pasea en la dia no tropeza, car el vide la lus de esta mundo;
10. an tal, el ci pasea en la note tropeza, car la lus no es con el.”
11. A pos el ia ajunta: “Nosa ami Lazaro dormi, ma me va velia el.”
12. Sua disiplos ia dise: “Senior, si el dormi, el va sani.”
13. Los ia pensa ce el parla sur sonia, ma Jesus ia refere a moria.
14. Alora el ia dise clar a los: “Lazaro ia mori,
15. e me joia per vos ce me no ia es ala, afin vos crede. Ta ce nos vade per vide el.”
16. Tomas, nomida la Jemelo, ia dise a la otra disiplos: “Ta ce ance nos vade per mori con el.”
17. Cuando Jesus ia ariva, el ia trova ce Lazaro es ja en la tomba per cuatro dias.
18. Betania ia es a tre cilometres de Ieruxalim.
19. Multe iudis ia vade per consola Marta e Maria pos la mori de sua frate.
20. Pos oia ce Jesus ia veni, Marta ia sorti per encontra el, en cuando Maria ia resta en la casa.
21. Marta ia dise a Jesus: “Senior, si tu ta es asi, mea frate no ia ta mori
22. ma me sabe ce ancora aora, Dio va dona a tu tota per cual tu demanda a El.”
23. Jesus ia dise: “Tua frate va revive.”
24. Marta ia responde a el: “Me sabe ce el va revive en la revive de la dia ultima.”
25. Jesus ia dise: “Me es la Revive e la Vive. Cualcun ci crede en me, an si el mori, va vive:
26. e tota ci vive e crede a me, va mori nunca. Esce tu crede esta?”
27. El ia responde: “Si, Senior, me crede ce tu es la Maxia, la Fio de Dio, ci ia debe veni a la mundo.”
28. Pos esta el ia vade per clama Maria, sua sore, e ia dise en vose basa: “La Mestre es asi e clama tu.”
29. Pos oia esta, el ia leva rapida se e ia vade per encontra el.
30. Jesus no ia ariva ancora a la vileta, ma el ia es en la loca do Marta ia encontra el a ante.
31. La iudis ci ia es consolante el en la casa, pos vide ce el ia leva rapida se e ia sorti, ia segue el, pensante ce el vade a la tomba per plora ala.
32. Maria ia ariva do Jesus es e, pos vide el, el ia proni a sua pedes e ia dise: “Senior, si tu ta es asi, mea frate no ia ta mori.”
33. Pos vide el plorante, e ance la iudis acompaniante el, Jesus ia es disturbada e turbada,
34. e ia demanda: “Do vos ia pone el?” Los ia responde: “Senior, veni e vide.”
35. E Jesus ia plora.
36. La iudis ia dise a el: “Tan el ia ama el!”
37. Ma algun ia dise: “Esta ci ia abri la oios a la sieca de nase, esce el no ia ta pote impedi la mori de Lazaro?”
38. Jesus, denova emosiada, ia ariva a la tomba, cual ia es un cava con un petra sur la entra,
39. e ia dise: “Sutrae la petra.” Marta, la sore de la mor, ia responde: “Senior, lo odori mal; el es ja mor tra cuatro dias.”
40. Jesus ia dise: “Esce me no ia dise ce si tu crede, tu va vide la gloria de Dio?”
41. Alora los ia sutrae la petra e Jesus, levante sua oios a la sielo, ia dise: “Padre, me grasia tu car tu ia oia me.
42. Me sabe ce tu oia sempre me, ma par causa de la fola ci ensirca me, me ia dise esta, afin los crede ce tu ia envia me.”
43. Pos dise esta, el ia cria con vose forte: “Lazaro, veni a estra.”
44. La mor ia sorti con pedes e manos liada con bandas de lino, e con fas covreda par un velo. Jesus ia dise a los: “Deslia el afin el pote pasea.”
45. Pos vide cual el ia fa, multe de la iudis ci ia vade ja a la casa de Maria ia crede a el.
46. Ma otras ia vade per vide la fariseos e raconta a los cua Jesus ia fa.
47. La pretes alta e la fariseos ia clama un consenta e ia dise: “Cua nos fa? Car esta om fa multe sinias,
48. si nos lasa el continua tal, totas va crede a el, e la romanes va veni e destrui nosa Loca Santa e nosa nasion.”
49. Un de los, nomida Caifas, ci ia es la Prete Alta de acel anio, ia dise a los: “Vos no comprende.
50. Esce vos no prefere ce un sola om mori per la popla e no tota la nasion?”
51. El no ia dise solitar esta, ma como Prete Alta el ia predise ce Jesus va mori per la nasion iudi,
52. e no sola per acel nasion, ma ance per uni la fios de Dio ci ia es sperdeda.
53. De acel dia, los ia scemi per mata Jesus.
54. Donce Jesus no ia mostra plu se en publica entre la popla de Judea, ma el ia vade a un rejion prosima a la deserto, a un site nomida Efraim, e el ia resta ala con sua disiplos.
55. Cuando la Pascua de la iudis ia prosimi, multe persones de la rejion ia vade a Ieruxalim per puri se.
56. Los ia xerca Jesus e ia dise a lunlotra en la Templo: “Cua vos pensa? Esce el va veni a la festa o no?”
57. La pretes alta e la fariseos ia comanda ce si algun descovre do Jesus es, el ta reporta lo afin on ta aresta el.