Capitol 16

1. “Me ia dise esta a vos afin vos no es ofendeda.
2. Vos va es espulsada de la sinagogas; an plu, la ora va ariva en cual los ci mata vos va crede ce los ofre adora a Dio.
3. E los va trata tal vos car los ia conose no mea Padre, no me.
4. Me ia averti vos afin cuando la ora ariva, vos va recorda ce me ia dise lo. Me no ia dise esta cosas de la comensa, car me ia es con vos.
5. Aora me vade a el ci ia envia me, e nun de vos demanda me: ‘Do tu vade?’
6. Ma cuando me dise esta, vos deveni triste.
7. An tal, me dise la veria a vos: lo conveni a vos ce me vade, car si me no vade, la Conselor no va veni a vos. Ma si me vade, me va envia el a vos.
8. E cuando el veni, el va mostra a la mundo do es peca, do es justia e cual es la judi.
9. Peca es en no crede a me.
10. Justia, car me vade a la Padre e vos no va vide me.
11. E la judi, car la Prinse de esta mundo es ja condenada.
12. Me ave ancora cosas per dise a vos, ma vos no pote comprende los aora.
13. Cuando la Spirito de Veria veni, el va introdui vos en tota la veria, car el no va parla par se mesma, ma el va dise lo cual el ia oia e va anunsia lo cual va segue.
14. El va glori me, car el va reseta de me e va anunsia lo a vos.
15. Tota cual es de la Padre es mea. Par esta me dise a vos: ‘El va reseta de me e va anunsia lo a vos.’
16. Pos poca, vos no va vide me, e poca a pos, vos va vide me denova.”
17. Alora alga de sua disiplos ia comenta entre se: “Cua esta sinifia cual el dise a nos: ‘Pos poca, vos no va vide me, e poca a pos, vos va vide me denova’?”
18. Los ia dise: “Cua es esta poca tempo? Nos no comprende lo cual el vole dise.”
19. Jesus ia comprende ce los vole demanda a el e el ia dise a los: “Vos demanda sur la sinifia de mea parolas: ‘Pos poca, vos no va vide me, e poca a pos, vos va vide me denova.’
20. Me serti vos ce vos va plora e va lamenta; la mundo, an tal, va joia. Vos va es triste, ma acel tristia va deveni joia.
21. La fem, cuando el va pari, senti angusa car la ora ia ariva; ma cuando la enfante nase, el oblida sua dole, par la joia cual el senti pos vide ce un enfante ia veni a la mundo.
22. Ance vos es aora triste, ma me va vide vos denova, e vos va ave un joia cual nun va pote prende de vos.
23. En acel dia vos no va fa plu demandas a me. Me serti vos ce per tota cual vos demanda a la Padre, el va dona esta a vos par mea nom.
24. Asta aora, vos ia demanda per no cosa par mea nom. Demanda e vos va reseta, e vosa joia va es perfeta.
25. Me ia dise tota esta en parabolas. La ora ariva en cual me no va parla en parabolas, ma me va parla clar de la Padre.
26. En acel dia vos va demanda par mea nom; e lo no va es nesesada ce me demanda a la Padre per vos,
27. car el mesma ama vos, car vos ama me e vos crede ce me veni de Dio.
28. Me ia sorti de la Padre e me ia veni a la mundo. Aora me abandona la mundo e vade a la Padre.”
29. Sua disiplos ia dise el: “A fini tu parla clar e sin parabolas.
30. Aora nos conose ce tu sabe tota e no nesesa ce on demanda a tu. Per esta razona, nos crede ce tu ia veni de Dio.”
31. Jesus ia responde a los: “Esce vos crede aora?
32. La ora prosimi, e lo ariva ja, en cual vos va sperde, cadun a sua lado, e va lasa ce me es solitar. Ma no, me no es solitar, car la Padre es con me.
33. Me dise esta afin vos trova en me la pas. En la mundo vos va debe sufri; ma ave coraje: me ia vinse la mundo.”