Capitol 15

1. “Me es la vite vera, e mea Padre es la vitor.
2. El corti tota mea ramos cual no fruti, e el desrami cada ci fruti afin lo fruti plu.
3. Vos es ja desramida par la parola cual me ia anunsia a vos.
4. Resta en me, como me resta en vos. Como no ramo pote fruti par se mesma, ma lo debe resta en la vite, tal ance vos no va pote fruti estra cuando vos resta en me.
5. Me es la vite, vos es la ramos. Si vos resta en me e me en vos, vos va fruti multe, car sin me vos pote fa no cosa.
6. Cualcun ci no resta en me va es dejetada como un ramo e secida; la popla prende tal ramos e lansa los a la foco e los va es ardeda.
7. Si vos resta en me e mea parolas resta en vos, demanda per cualce cosa cual vos vole e lo va es fada per vos.
8. Par esta es mea Padre glorida, ce vos fruti multe e deveni mea disiplos.
9. Como la Padre ia ama me, ance me ia ama vos. Resta en mea ama.
10. Si vos oserva mea comandas, vos va resta en mea ama, como me ia oserva la comandas de mea Padre e resta en sua ama.
11. Me ia dise esta a vos afin mea joia es en vos e vosa joia es completa.
12. Esta es mea comanda: ama lunlotra como me ama vos.
13. Nun ave ama plu grande ca esta: dona sua propre vive per lo de sua amis.
14. Vos es mea amis si vos fa lo cual me comanda de vos.
15. Me no nomi plu vos sclavos, car un sclavo no conose lo cual sua mestre fa. Me ia nomi vos amis, car me ia dise a vos tota cual me ia aprende de mea Padre.
16. Vos no ia eleje me, ma me ia eleje vos e ia nomina vos per vade e produi frutas - frutas cual va dura - afin tota per cual vos demanda a la Padre par mea autoria va es donada a vos.
17. Esta es mea comanda: ama lunlotra.
18. Si la mundo odia vos, comprende ce lo ia odia me a ante.
19. Si vos ta parteni a la mundo, la mundo ta ama vos como sua propres; ma car vos no parteni a la mundo, e me ia eleje vos a estra esta mundo, la mundo odia vos.
20. Recorda la parolas cual me ia dise a vos: ‘No sclavo es plu grande ca sua mestre.’ Si los ia persegue me, los va persegue ance vos. Si los ia obedi mea instrui, los va obedi ance la vosa.
21. E los va fa tota esta cosas a vos par causa de mea nom, car los no conose el ci ia envia me.
22. Si me no ta veni per parla a los, los ta ave no peca; ma aora los ave no escusa per sua peca.
23. Cualcun ci odia me odia ance mea Padre.
24. Si me no ia ta fa entre los atas cual otras no ia fa, los no ta ave pecas. Ma aora los ia vide los, e los odia me e mea Padre.
25. Ma esta es per completi la scriveda en lora lege: ‘Los ia odia me sin razona.’
26. Cuando la Conselor veni ci me va envia a vos de la Padre, la Spirito de veria cual sorti de la Padre, el va atesta sur me.
27. E ance vos debe atesta, car vos es ja con me de la comensa.”