Capitol 5

1. Pos esta, on ia ave un festa de la iudis e Jesus ia vade a Ieruxalim.
2. Prosima a la Porte de la Oveas, en Ieruxalim, on ave un stange nomida en ivri Betsata, cual ave sinco porticos.
3. Su esta porticos multe maladas, siecas, paraliticas e descapasidas ia reposa, espetante la move de la acua.
4. [Car de ves a ves la Anjel de la Senior ia desende e ia move la acua. La prima ci ia entra en la stange, pos la move de la acua, ia resta remediada, sin depende de lo cual ia es sua maladia.]
5. On ia ave ala un om ci ia es malada tra tredes-oto anios.
6. Cuando el ia vide el reposante ala, e ia descovre ce el es ala tra tan multe tempo, Jesus ia demanda a el: “Esce tu vole es remediada?”
7. El ia responde: “Senior, me ave nun per sumerji me en la stange cuando la acua comensa move. En cuando me vade, un otra desende ante me.”
8. Jesus ia dise: “Leva te, prende tua tapeteta e pasea.”
9. Direta la om ia sani, ia prende sua tapeteta e ia comensa pasea. Lo ia es saturdi,
10. e la iudis ia dise alora a la om ci ia veni de es sanida: “Lo es saturdi. Lo no es permeteda ce tu porta tua tapeteta.”
11. El ia responde a los: “El ci ia sani me ia dise: ‘Prende tua tapeteta e pasea’.”
12. Los ia demanda a el: “Ci es acel om ci ia dise a tu: ‘Prende tua tapeteta e pasea?’”
13. Ma la malada no ia sabe, car Jesus ia desapare ja entre la fola ci ia es ala.
14. A pos, Jesus ia trova el en la templo e ia dise a el: “Tu ia es sanida, no peca denova, o cosas plu mal va aveni a tu.”
15. La om ia vade a la iudis per dise a los ce Jesus es la person ci ia sani el.
16. Los ia persegue el, car el ia fa esta cosas en saturdi.
17. El ia responde lo: “Mea Padre labora sempre, e ance me labora.”
18. Ma per la iudis esta ia es un plu causa per mata el, car no sola el ia viole la saturdi, ma el ia egali se a Dio, nominte el como sua propre Padre.
19. Alora Jesus ia responde e ia dise a los: “Me serti vos ce la Fio pote fa no cosa par se mesma, ma sola lo cual el vide fada par la Padre, car sin depende de lo cual la Padre fa, la Fio fa lo ance.
20. Car la Padre ama la Fio e mostra tota cual el fa. E el va mostra atas plu grande ancora, afin vos resta merveliada.
21. Tal como la Padre revive la mores e dona vive a los, en la mesma modo la Fio dona vive a los a ci el vole dona lo.
22. Car la Padre judi nun: el ia confida tota sua judi a sua Fio,
23. afin totas onora la Fio como los onora la Padre. El ci no onora la Fio, no onora la Padre ci ia envia el.
24. Me serti vos ce los ci escuta mea parola e crede a el ci ia envia me, ave Vive eterna e no es judida, ma ia pasa ja de la moria a la Vive.
25. Me serti vos ce la ora prosimi, e ia ariva ja, en cual la mores va escuta la vose de Fio de Dio; e el ci escuta lo, va vive.
26. Tal como la Padre dispone la Vive, en la mesma modo el ia permete ce sua Fio dispone lo,
27. e ia dona autoria per judi car el es la Fio de la Om.
28. No es stonada car la ora es veninte en cual totas cual es en la tomba va escuta sua vose
29. e los va sorti: los ci ia fa bon atas, va revive; los ci ia fa mal atas, va revive per es condenada.
30. Me pote fa no cosa par me mesma. Me judi seguente lo cual me oia, e mea judi es justa, car me no xerca reali mea vole, ma lo de el ci ia envia me.
31. Si me atesta sur me mesma, mea atesta no es vera.
32. Ma on ave un otra ci atesta sur me, e me sabe ce esta atesta es vera.
33. Vos mesma ia comanda a demanda Joan, e el ia atesta sur la veria.
34. Me no aseta atestas de persones; ma me dise esta per vosa salva.
35. Joan ia es la lampa cual arde e brilia, e vos ia vole joia un instante de sua lus.
36. Ma la atesta cual me ave es plu grande ca acel de Joan: lo es la atas cual me es comandada par la Padre a reali. Esta atas cual me fa atesta ce mea Padre ia envia me.
37. E la Padre mesma ci ia envia me ia atesta sur me. Vos ia escuta nunca sua vose, no ia vide sua fas,
38. e sua parola no resta en vos, car vos no crede a el ci el ia envia.
39. Vos esamina la Scrivedas Santa, car en los vos pensa ce vos trova la Vive eterna: los atesta sur me,
40. e, an tal, vos no vole veni a me per ave Vive.
41. Mea gloria no veni de la persones.
42. Plu, me conose vos: la ama de Dio no es en vos.
43. Me ia veni par autoria de mea Padre e vos no reseta me, ma si un otra veni par sua propre autoria, vos reseta el.
44. Como vos pote crede, si vos aseta loda de lunlotra e no xerca la loda cual veni de la sola Dio?
45. No pensa ce me es el ci va acusa vos ante la Padre; el ci va acusa vos va es Moxe, a ci vos ia pone vosa espera.
46. Si vos ta crede a Moxe, vos ta crede a me, car el ia scrive sur me.
47. Ma si vos no crede lo cual el ia scrive, como vos va crede lo cual me dise a vos?