Capitol 9

1. El ia dise ance a los: “Me pote garantia a vos ce algun ci es asi no va mori ante vide ce la Rena de Dio veni con potia.”
2. Pos ses dias Jesus ia prende Pedro, Jacobo e Joan e ia gida los solitar a un monte alta. Ala el ia muta ante los,
3. e sua vestes ia deveni stonante blanca, como nun sur la tera ta pote blanci los.
4. Alora Elija ia apare a los con Moxe, e los ia es conversante con Jesus.
5. Aora Pedro ia dise a Jesus: “Mestre, lo es bon ce nos es asi! Ta ce nos fa tre tendas: un per tu, un per Moxe e un per Elija.”
6. Pedro no ia sabe cua dise, car los ia es tan asustada.
7. Alora un nube ia veni, ombrinte los; e de lo un vose ia sorti: “Esta es me fio amada. Escuta el.”
8. Subita, regardante a sirca, los no ia vide plu algun, ma sola Jesus con los.
9. En cuando los ia desende de la monte, el ia proibi los de nara cua los ia vide, asta cuando la Fio de Om va revive de moria.
10. Los ia fa lo, demandante cua “revive de la moria” sinifia.
11. Los ia demanda a el: “Perce la scrivistes dise ce Elija debe veni prima?”
12. El ia dise a los: “Elija va veni vera prima e repone ordina en tota, ma esce lo no es scriveda ce la Fio de Om debe sufri multe e es tradida e despetada?
13. Ma me dise a vos ce Elija ia veni ja e on ia fa a el cualce cosa cual los ia vole, como lo ia es scriveda.”
14. Cuando los ia reveni a do la disiplos ia es, los ia vide un fola grande sirca los e scrivistes disputante con los.
15. La plu pronto cuando los ia vide el, la fola completa ia mervelia completa. Los ia core a el e ia saluta el.
16. El ia demanda a los: “Sur cua vos es disputante con los?”
17. Algun de la fola ia responde a el: “Mestre, me ia trae a tu mea fio, poseseda par un spirito muda.
18. Cuando el saisi el, el lansa el a su, el espulsa spuma de la boca, raspa sua dentes e deveni rijida. Me ia demanda a tua disiplos ce los espulsa el, ma los no ia pote.”
19. El ia responde a los: “O jenera noncredente, per cuanto tempo me va es con vos? Como longa me va tolera vos? Trae el a me.”
20. E los ia trae la xico a el. E cuando el ia vide Jesus, la spirito ia secute violente la xico, ci ia cade a tera e ia rola, espulsante spuma de la boca.
21. Jesus ia demanda a sua padre: “Como longa el es ja tal?” “De enfantia,” el ia responde:
22. “e frecuente lo ia lansa el a foco o a en acua per mata el. Ma si tu pote fa alga cosa, ave compatia sur nos e aida nos.”
23. Jesus ia dise a el: “‘Si tu pote!’ Tota es posible per algun ci ave fida.”
24. Alora la padre de la xico ia esclama: “Me crede, aida me car me ave poca fida.”
25. Jesus, vidente la fola rapida asemblante, ia reproxa la spirito nonpur e ia dise a el: “Spirito muda e sorda, me comanda tu: sorti de el e no reveni plu a el.”
26. La demon ia cria, ia secute violente la xico e ia sorti de el, lansante el como mor, tan multe ce multe ia dise: “El ia mori.”
27. Ma Jesus ia prende el par la mano, ia alti el, e el ia sta se.
28. Cuando el ia entra a la casa, sua disiplos ia demanda privata a el: “Perce nos no ia pote espulsa lo?”
29. El ia dise a los: “Esta tipo de demon es espulsada sola par prea.”
30. Los ia parti de ala e ia comensa un viaja tra Galilea, ma el no ia vole ce cualcun sabe sur lo.
31. El ia instrui los e ia dise a los: “La Fio de Om va es traeda a manos de omes e los va mata el, e a tre dias pos sua mori el va revive.”
32. Ma los no ia comprende cua el ia dise, e los ia teme demanda a el.
33. Los ia veni a Capernaum e, cuando en la casa, el ia comensa demanda a los: “Sur cua vos ia es discutente en via?”
34. Ma los ia resta silente. Los ia es discutente ci es la plu grande.
35. Alora los ia senta, e el ia clama la Des-du, e ia dise a los: “Si cualcun desira es la prima, el debe es la ultima de tota e la servor de tota.”
36. Prendente un enfante, el ia pone el a media de los, e ponente sua brasos sirca el, el ia dise a los:
37. “Cualcun ci reseta un enfante como esta en mea nom, reseta me; e cualcun ci reseta me, reseta no me ma el ci ia envia me.”
38. Joan ia dise a el: “Mestre, nos ia vide algun espulsante demones en tua nom, e nos ia atenta impedi el car el no segue nos.”
39. Jesus ia responde: “No impedi el car nun pote fa un bon ata en mea nom e, pos acel, parla mal sur me.
40. Car cualcun ci no es contra nos es con nos.
41. Cualcun ci dona a vos un copa de acua per bevi car vos parteni a Cristo, me dise a vos, serta el no va perde sua recompensa.
42. Cualcun ci fa ce esta petis peca ci crede en me, lo ta es plu bon per el ce un petra de molin ta es liada a sua colo e ce el ta es lansada a la mar.
43. Si vosa mano fa ce vos peca, talia lo. Lo es plu bon ce on entra ferida a vive ca con du manos on vade a Gehena, a la foca nonestinguable.
44. []
45. E si vosa pede fa ce vos peca, talia lo. Lo es plu bon ce on entra descapasida a vive ca con du pedes on es lansada a Gehena.
46. []
47. E si vosa oios fa ce vos peca, estrae los car lo es plu bon ce on entra a la rena de Dio con un sola oio ca con du oios on es lansada a Gehena,
48. do ‘la verme no mori, e la foco no es estinguida’.
49. Car cadun va es salida con foco.
50. Sal es bon, ma si sal deveni blanda, con cua vos va restora sua sabor? Ta ce vos ave sal en vos mesma e vos va ave pas con lunlotra.”