Capitol 5

1. Los ia veni a la otra lado de la mar, a la teritorio de la Gerasenas.
2. Cuando el ia sorti de la barco, direta un om de la tombas ci ia ave un spirito nonpur ia encontra el.
3. La om ia abita entre la tombas, e nun ia pote freni el plu, an con un cadena.
4. En fato, el ia es frecuente liada con securitalos e cadenas, ma la cadenas ia es rompeda par el e la securitalos craseda, e nun ia es bastante forte per domina el.
5. Tra dia e note entre la tombas e en la montes el ia vaga criante e ferinte se con petras.
6. Cuando el ia vide Jesus a distantia, el ia core e ia proni ante el,
7. criante forte: “Cua tu vole de me, Jesus, Fio de Dio, la Plu Alta? Me recomenda forte tu par Dio, no tormenta me!”
8. (Car Jesus ia dise a el: “Sorti de esta om, spirito nonpur!”)
9. El ia demanda a el: “Cual es tua nom?” El ia responde: “Lejion es mea nom. On ave multe de nos.”
10. E el ia demanda insistente ce el no espulsa el de acel teritorio.
11. Aora un manada grande de porcos ia es comente ala sur la monte.
12. E los ia suplica el: “Envia nos a la porcos afin nos entra en los.”
13. E el ia lasa los, e la spiritos nonpur ia sorti e ia entra en la porcos. La manada de sirca du mil animales ia freta de la presipe a la mar e ia afoca.
14. La porcores ia fuji e ia reporta la aveni en la vileta e tra la campania. E la popla ia sorti per vide cua ia aveni.
15. E los ia prosimi a Jesus, los ia vide la om ci ia es poseseda par Lejion, sentante ala, vestida e con mente sana. E los ia es asustada.
16. Los ci ia atesta la aveni ia esplica a los cua ia aveni a la om poseseda e a la porcos.
17. Los ia comensa suplica el a abandona lor distrito.
18. En cuando el ia es embarcante, la om ci ia es poseseda ia suplica el a resta con el.
19. Ma el no ia permete el, ma en loca ia dise a el: “Vade a casa a tua familia e anunsia a los tota cual la Senior ia fa per tu cuando el ia compatia tu.”
20. La om ia vade e ia comensa proclama en la rejion de Decapoli cua Jesus ia fa per el, e tota ia mervelia.
21. Cuando Jesus ia traversa denova (en la barco) a la otra lado, un fola grande ia reuni ensircante el, e el ia resta prosima a la mar.
22. Un de la ofisiores de la sinagoga, nomida Jairo, ia veni e, vidente el, ia cade a sua pedes
23. e ia suplica el, disente: “Mea fia es morinte. Per favore, veni e pone tua manos sur el afin el sani e vive.”
24. El ia vade con el, e un fola grande ia segue el e ia presa sur el.
25. On ia ave un fem con emoraje tra des-du anios.
26. El ia sufri multe en la manos de multe dotores medical e ia spende tota cual el ia ave sin resulta, ma ancora el ia mali sola.
27. El ia oia sur Jesus e el ia veni a retro de el en la fola e ia toca sua capa.
28. El ia dise: “Si me toca sola sua vestes, me va es sanida.”
29. Direta sua emoraje ia sesa e el ia senti en sua corpo ce el es sanida de sua dole.
30. Jesus, sentinte aora ce un potia ia sorti de el, ia turna en la fola e ia demanda: “Ci ia toca mea vestes?”
31. Ma sua disiplos ia dise a el: “Tu vide como la fola es presante sur tu, e ancora tu demanda ‘Ci ia toca me?’”
32. E el ia regarda a sirca per vide ci ia fa lo.
33. La fem, comprendente cua ia aveni a el, ia prosimi temosa e tremante. El ia cade ante Jesus e ia raconta a el tota la veria.
34. El ia dise a el: “Fia, tua fida ia salva tu. Vade en pas e es sanida de tua dole.”
35. En cuando el ia es ancora parlante, persones de la casa de la ofisior de la sinagoga ia ariva e ia dise: “Tua fia ia mori, perce tu ajita plu la Mestre?”
36. Iniorante la mesaje, Jesus ia dise a la ofisior de la sinagoga: “No teme, ave sola fida.”
37. El no ia permete algun a acompania el a interna, con eseta de Petro, Jacobo e Joan, la frato de Jacobo.
38. Cuando los ia ariva a la casa de la ofisior de la sinagoga, el ia vide la disturba, persones plorante e ululante forte.
39. E el ia entra e ia dise a los: “Perce vos plora e ulula? La xica no es mor, ma dorminte.”
40. Los ia burla el. Alora el ia espulsa tota e ia prende la padre e la madre de la xica e los ci ia es con el, e ia entra en la sala do la xica ia es.
41. El ia prende la mano de la xica el ia dise a el: “Talita cum”, cual sinifia “Xica peti, me dise a tu, leva!”
42. La xica, un enfante de des-du, ia leva direta e ia comensa pasea. Alora los ia es asoluta stonada.
43. El ia dona comandas sever ce nun debe sabe esta, e ia dise ce los debe dona alga cosa a la xica per come.