Capitol 13

1. Cuando el ia es sortinte de la templo un de sua disiplos ia dise a el: “Regarda, mestre, cual petras e cual construerias!”
2. Jesus ia dise a el: “Esce tu vide construerias grande? No petra va es lasada sur un otra; tota va es destruida.”
3. E a pos, cuando el ia es sentante sur la Monte de Olivos a fas de la templo, Pedro, Jacobo, Joan e Andres ia demanda privata a el:
4. “Dise a nos, cuando esta va aveni, e cual sinia on va ave cuando tota esta cosas va es a punto de aveni?”
5. Jesus ia comensa dise a los: “Vide ce nun engana vos,
6. Multe va veni en mea nom disente ‘Me es el’, e los va engana multe.
7. Cuando vos oia sur geras e reportas, no es alarmada; tal cosas debe aveni, ma lo ancora no va es la fini.
8. Nasion va leva contra nasion e rena contra rena. On va ave tremateras en locas diversa e on va ave famiones. Esta es la comensa de la doles de pari.
9. Es vijilante per vos mesma. Los va envia vos a cortes. Vos va es bateda en la sinagogas. Vos va es acusada ante governores e res par causa de me, como atestores ante los.
10. Ma la evanjelio debe es prima predicada a tota la nasiones.
11. Cuando los porta e trae vos, no es preocupada a ante sur cua vos va dise. Ma dise cualce cosa cual va es donada a vos en acel ora. Car lo no va es vos ci parla, ma la Spirito Santa.
12. Frate va trae sua frate a mori, e la padre sua fio, enfantes va revolta contra sua jenitores e va envia los a mori.
13. Vos va es odiada par tota par causa de mea nom. Ma el ci persiste asta la fin va es salvada.
14. Cuando vos vide la odiable de ruina stante do lo no debe (ta ce la lejor comprende), alora los en Judea debe fuji a la montes,
15. (e) un person sur un teto no debe desende o entra per prende cosas de sua casa,
16. e un person en la campo no debe reveni per prende sua capa.
17. Ai a la femes ensinta e la madres tetinte en acel dias.
18. Prea afin esta no aveni en inverno.
19. Car acel tempos va ave turba como lo no ia aveni de la comensa de la crea de Dio asta aora, e nunca va aveni.
20. Si la Senior no ia corti acel dias, nun va es salvada, ma per la benefica de la elejedas ci el ia eleje, el va corti la dias.
21. Si cualcun dise a vos alora: ‘Regarda, asi es la Maxia! Regarda, ala es el!’ no crede el.
22. Maxias falsa e profetas falsa va apare e va fa mervelias e miracles per malgida la elejedas, si lo ta es posible.
23. Es vijilante! Me ia dise tota a vos a ante.
24. Ma en acel dias pos acel turba
    la sol va es oscurida,
    e la luna no va dona sua lus,
25. e la stelas va es cadente de la sielo,
    e la potias de la sielos va es secuteda.
26. E alora on va vide “la Fio de la Om veninte de la nubes,” con potia e gloria grande,
27. e alora el va envia la anjeles e asembla (sua) elejedas de la cuatro ventas, de la fini de la tera a la fini de la sielo.
28. Aprende un leson de la figo. Cuando sua ramo deveni mol e jerme folias, vos sabe ce la estate es prosima:
29. En la mesma modo, cuando vos vide esta cosas aveninte, sabe ce el es prosima, a la porte.
30. Me serti vos, esta jenera no va pasa ante ce tota esta cosas va aveni.
31. Sielo e tera va pasa, ma mea parolas no va pasa.
32. Ma la dia o ora, nun sabe lo, no la anjeles en la sielo, no la Fio, ma sola la Padre.
33. Es vijilante! Es atendente! Vos no sabe cuando la tempo va veni.
34. Lo es como un om viajante estra la pais. El abandona sua casa e lasa sua servores encargada, cada con sua labora, e comanda la gardaporte a es vijilante.
35. Es vijilante, donce, vos no sabe cuando la senior de la casa va veni, si en la sera o a medianote, o a la leva de sol, o en la matina.
36. Ta ce el no veni subita e trova vos dorminte.
37. Cual me dise a vos, me dise a tota: “Es vijilante!”