Capitol 4

1. A un otra tempo el ia comensa ensenia a lado de la mar. Un fola grande ia asembla sirca el e donce el ia entra a un barco sur la mar e ia senta se. E tota la fola ia es sur la costa.
2. E el ia instrui los par parables, e esta ia es lo cual el ia ensenia:
3. “Escuta! Un semor ia vade per semi.
4. E cuando el ia es seminte, alga semes ia cade sur la via, e la avias ia veni per come los.
5. Otra semes ia cade sur tera rocosa, do on ia ave poca tera fertil. Los ia jerme tro temprana car la tera no ia es profonda.
6. E cuando la sol ia leva, los ia negri e seci par manca de radises.
7. Alga semes ia cade entre spinas, e la spinas ia crese e sofoca los e los no ia produi gran.
8. E alga semes ia cade sur tera fertil e ia produi frutas. Los ia crese e e ia furni a tredes, sesdes e sento veses.”
9. El ia ajunta: “El ci ave oreas debe oia!”
10. E cuando el ia es solitar, los presente con la Des-du ia demanda a el sur la parable.
11. El ia responde: “La misterio de la rena de Dio ia es donada a vos. Ma a los a estra, tota veni en parables,
12. afin
    ‘los ta vide ma no persepi,
    e oia e escuta ma no comprende,
    con intende ce los no ta converti e es pardonada’.”
13. Jesus ia dise a los: “Esce vos comprende esta parable? Donce, como vos va comprende tota la otras?
14. La semor semi la parola.
15. Estas es los ci es sur la via do parola es semida. Direta cuando los oia los, Satan veni direta e sutrae la parola semida en los.
16. E estas es los ci ia semi sur la tera rocosa ci, cuando los oia la parola, reseta direta lo con joia.
17. Ma los no ave radises, ma es tempora. A pos, cuando turba o persegue ia veni par causa de la parola, los sede rapida.
18. E otras es semida entre spinas. Los es persones ci escuta la parola,
19. ma la angusa mundal, la tenta de ricia e la anela de otra cosas intrui e sofoca la parola, e no fruti.
20. Ma los semida sur tera fertil es los ci escuta la parola e aseta lo e fruti a tredes e sesdes e sento veses.”
21. El ia dise a los: “Esce un candela es traeda per es poneda su la sesto o su la leto? Esce lo no es per pone lo sur la portacandela?
22. Car on ave no cosa cual no va es fada vidable; no cosa secreta cual no va es revelada.
23. Cualcun ci ave oreas debe oia.”
24. El ia dise a los: “Atende lo cual vos oia. La mesura con cual vos mesura va es usada per mesura vos, e an plu va es donada a vos.
25. A el ci ave, plu va es donada; de el ci no ave, an cual el ave va es sutraeda.”
26. El ia dise: “La Rena de Dio es como un om ci sperde semes sur la tera
27. e ta dormi e velia tra note e dia, la sema jerme e crese, el no sabe como.
28. La tera en sua propre modo furni fruta, prima la folia, pos la spiga, pos la gran abundante sur la spiga.
29. E cuando la gran es matur, el brandi direta la falxeta, car la recolie ia veni.”
30. El ia dise: “A cual on va compara la rena de Dio, o cual parable on pote usa per lo?
31. Lo es como un seme de mostarda cual, cuando semida sur la tera, es la plu peti de tota la semes sur la tera.
32. Ma cuando lo ia es semida, lo jerme e deveni la plu grande de la plantas e estende tan sua ramos ce la avias de la sielo pote abita en sua ombra.”
33. E con multe parabolas como esta el ia anunsia la Parola, cuando los ia pote comprende.
34. Sola en parabolas el ia parla a los, ma a sua propre disiplos el ia esplica tota en privata.
35. En acel dia, a la reposa de sol, el ia dise a los: “On vade traversa a la otra costa.”
36. Los, abandonante la fola, ia porta el en la barco a la otra costa. E otra barcos ia es con el.
37. Un tempesta violente ia aveni e la ondas ia entra en la barco, cual ia comensa es plenida de acua.
38. Jesus ia es en la popa, dorminte sur un cuxin. Los ia velia el e ia dise a el: “Mestre, esce tu no cura ce nos va mori?”
39. El ia velia, ia reproxa la vento e ia dise a la mar: “Silenti! Es cuieta!” La venta ia sesa e on ia ave calmia.
40. A pos, el ia demanda a los: “Perce vos es asustada? Esce vos ave ancora no fida?”
41. Los ia es plenida con stona temosa grande e ia dise a lunlotra: “Ci es esta ci an la vento e la mar obedi?”