1 La decano a la Dama elejeda e a la fios a ci me ama en veria (e no sola me ma ance tota ci conose la veria) 2 par causa de la veria cual resta en nos e cual va es con nos per sempre. 3 Ance va es con nos la grasia, la pardona e la pas de Dio Padre e sua Fio Jesus Cristo, en veria e ama.

4 Me ia selebra multe trova alga de tua fios ci vive en la veria, como ia es comandada par la Padre. 5 Ma aora, Dama, me demanda a tu, no como me ta es scrivente un comanda nova a tu ma cual nos ia ave de la comensa: ta ce nos ama lunlotra. 6 Car esta es ama, ce nos vive seguente la comandas de Dio. E la comanda ce vos ia aprende de la comensa es vive en ama.

7 Car ia invade la mundo multe frodores ci no reconose Jesus Cristo como mostrada en la carne: los es la Frodor e la Anticristo! 8 Atende per no perde acel per lo cual vos ia labora con intende ce vos reseta un recompensa completa. 9 Cualcun ci es tan “progresiste” per no resta en la crede de Cristo no es unida a Dio, cualcun ci resta en la crede es unida a la Padre e a la Fio. 10 Si cualcun veni a tu e no trae esta crede, no reseta el en vosa casa no saluta el; 11 car ci saluta el comparti sua obras malvolente.

12 An si me ave multe per scrive a tu, me no intende usa paper e inca. En loca, me espera visita vos e parla personal con vos, afin nosa joia ta es completa. 13 Ance saluta a tu la fios de tua sore elejeda.