Capitol 3

1. El ia entra denova en la sinagoga. On ia ave un om ci ia ave un mano atrofiada.
2. Los ia regarda el per vide esce el va sani el en la dia santa, afin los ta pote acusa el.
3. El ia dise a la om con la mano atrofiada: “Veni asi ante nos.”
4. Alora el ia dise a los: “Esce lo es legal ce on fa bon o mal en la dia santa, salva un vive en loca de destrui lo?” Ma los ia resta cuieta.
5. Alora, regardante coler los e lamentante la calosia de lora cores, el ia dise a la om: “Estende tua mano.” El ia estende lo e sua mano ia es sanida.
6. La fariseos ia sorti e direta ia consulta la herodianes contra el per destrui el.
7. Jesus ia retira a la mar con sua disiplos. Multe persones ia segue de Galilea e de Judea.
8. Escutante cua el fa, un cuantia grande de persones ia veni a el ance de Ieruxalim, de Idumea, de ultra la Rio Jordan, e de la visineria de Tiro e Sidon.
9. El ia comanda ce sua disiplos ave un barco preparada per el par causa de la fola, afin los no crase el.
10. El ia sani multe e, como resulta, los ci ia es malada ia es presante el per toca el.
11. E sempre cuando spiritos nonpur ia vide el, los ia cade ante el, clamante: “Tu es la Fio de Dio.”
12. El ia avisa sever los a no revela el.
13. El ia asende la monte e ia comanda los ci el ia vole, e los veni a el.
14. El ia nomi des-du (ci el ia nomi apostoles) per es con el e per envia los a predica,
15. e per ave autoria per espulsa demones:
16. (el ia nomi la des-du): Simon, ci el ia nomi Petro;
17. Jacobo, fio de Zebedeo, e Joan la frate de Jacobo, ci el ia nomi Boanerges, per dise: fios de la tona;
18. Andres, Felipe, Bartolome, Mateo, Tomas, Jacobo la fio de Alfeo, Tadeo, Simon la cananean,
19. e Juda Iscariote, ci ia tradi el.
20. Jesus ia reveni a casa. Denova la fola ia asembla, tal ce an come ia es nonposible a los.
21. Cuando sua relatadas ia oia esta, los ia sorti per prende el, car los ia dise: “El es un demente.”
22. La scrivistes ci ia veni de Ieruxalim ia dise: “El es poseseda par Beelzebul!” e “Par la prinse de la demones el espulsa demones.”
23. Clamante los, Jesus ia comensa parla a los con parabolas: “Como pote Satan espulsa Satan?
24. Si un rena es divideda contra se mesma, acel rena no pote survive.
25. E si un casa es divideda contra se mesma, acel casa va pote sta.
26. E si Satan ia es divideda contra se mesma, el no pote survive, esta es sua fini.
27. Ma nun pote entra a la casa de un om forte per saca sua propria, si el no lia prima la om forte. Alora, el pote saca sua casa.
28. Me serti vos ce tota pecas e blasfemas cual la popla dise va es pardonada a los.
29. Ma cualcun ci blasfema contra la Spirito Santa va es nunca pardonada, car el es culpable de peca eterna.”
30. Jesus ia dise esta car los ia dise ja: “El es poseseda par un spirito nonpur.”
31. Sua madre e sua frates ia ariva e, stante a estra, los ia comanda clama el.
32. Un fola sentante sirca el ia dise a el: “Tua madre e tua frates es a estra, demandante per tu.”
33. Ma el ia responde los: “Ci es mea madre e mea frates?”
34. E regardante sirca los sentante en la sirculo, el ia dise: “Asi es mea madre e mea frates.
35. Car cualcun ci fa la vole de Dio es mea frate e mea sore e mea madre.”