Capitol 1

1. La comensa de la evanjelio de Jesus Cristo (la Fio de Dio).
2. Como lo es scriveda en Isaia la profeta:
   “Regarda, me es enviante mea mesajor ante tu;
   el va prepara tua via.
3. Un vose de un person clamante en la deserto:
   ‘Prepara la via de la Senior,
   fa reta sua ruetas’.”
4. Joan la Batiste ia apare en la deserto proclamante un batiza de repenti per la pardona de pecas.
5. Tota la popla de Judea e tota la abitores de Ieruxalim ia vade a el e ia es batizada par el en la Rio Jordan, confesante sua pecas.
6. Joan ia vesti se con pelo de camel e un sintur de cuoro ensircante sua taie. El ia come locustas e miel savaje.
7. E esta es lo cual el ia proclama: “Pos me veni un ci es plu potiosa ca me. Me no merita curvi per laxi la corea de sua sandales.
8. Me ia batiza ja vos con acua; el va batiza vos con la Spirito Santa.”
9. Lo ia aveni en acel dias ce Jesus ia veni de Nazaret a Galilea e ia es batizada en la Jordan par Joan.
10. Sortinte de la acua el ia vide la sielos abrinte e la Spirito, como un pijon, desendente sur el.
11. E un vose ia veni de la sielos: “Tu es mea Fio amada; par tu me es plaseda.”
12. E direta la spirito ia porta el a la deserto,
13. e el ia resta en la deserto per cuatrodes dias, tentada par Satan. El ia es entre animales savaje, e la anjeles ia servi el.
14. Pos la aresta de Joan, Jesus ia veni a Galilea proclamante la evanjelio de Dio:
15. “Esta es la tempo de completi: la Rena de Dio es prosima. Repenti, e crede a la evanjelio.”
16. Cuando el ia vade sirca la Mar de Galilea, el ia vide Simon e sua frate Andres lansante sua redes; los ia es pexores.
17. Jesus ia dise a los: “Segue me, e me va fa de vos pexores de omes.”
18. Alora los ia abandona sua redes e ia segue el.
19. E pos continua pico el ia vide Jacobo, la fio de Zebedeo, e sua frate Joan. Los ia es ance en un barco reparante sua rede.
20. Alora el ia clama los. Donce los ia abandona sua padre Zebedeo en sua barco con la laborores e ia segue el.
21. Alora los ia veni a Capernaum, e en la dia santa el ia entra en la sinagoga e ia comensa ensenia.
22. La popla ia es stonada par sua ensenias, car el ia instrui los como avente autoria e no como la scrivistes.
23. E on ia ave en sua sinagoga un om con un spirito nonpur, ci ia comensa clama:
24. “Cua tu vole de nos, Jesus de Nazaret? Esce tu ia veni per destrui nos? Me sabe ci tu es – la Santa de Dio!”
25. Jesus ia reproxa el e ia dise: “Silenti! Sorti de el!”
26. La spirito nonpur ia convulsa el e con un xilia forte ia sorti de el.
27. Totas ia mervelia e ia demanda a lunlotra: “Cua es esta? Un ensenia nova con autoria. El comanda an la spiritos nonpur e los obedi el.”
28. Sua fama ia estende en tota locas tra la tota rejion de Galilea.
29. Sortinte de la sinagoga el ia entra en la casa de Jacobo e Joan.
30. La madre par sposi de Simon ia es reclinante, malada con febre. Los ia dise direta a el.
31. El ia prosimi, ia saisi sua mano e ia aida el a sta se. Alora la febre ia abandona el e el ia comensa servi los.
32. A la sera, pos la reposa de sol, los ia trae a el tota la persones malada o poseseda par demones.
33. Tota la site ia es asemblada ante la porte.
34. El ia sani multe ci ia es malada con maladias diversa, e el ia espulsa multe demones, no lasante ce los parla car los ia reconose el.
35. A la matina, ante la leva de Sol, Jesus ia leva e ia vade a un loca de deserto, do el ia prea.
36. Simon e sua acompaniores ia sorti per segue el,
37. e trovante el, ia dise: “Tota es xercante tu.”
38. El ia dise los: “On vade a la viletas prosima per predica ala ance car per esta me ia veni.”
39. E el ia vade a sua sinagogas, predicante e espulsante demones tra tota Galilea.
40. Un leprosa ia veni a el e (cadente a jenos) ia suplica el, disente: “Se tu vole, tu pote limpi me.”
41. Sentinte compatia per el, Jesus ia estende sua mano, tocante el, e ia dise: “Me vole. Es limpida.”
42. La leprosia ia abandona el sin retarda, e el ia es limpida.
43. Alora, el ia envia el a via con averti sever:
44. “Dise no cosa a nun, ma vade, presenta a la prete e ofre per tua limpi lo cual Moxe ia prescrive; acel va es un demostra per los.”
45. La om ia vade e ia comensa anunsia lo cual ia aveni. El ia estende la reporta e donce Jesus no ia pote entra sin asconde a un site, ma ia debe resta a estra en locas de deserto. E la popla ia veni a el de tota partes.