Capitol 8

1. En acel dias cuando ance on ia ave un fola con no cosa per come, el ia clama sua disiplos e ia dise:
2. “Mea cor es moveda con compatia per la fola, car los ia es aora con me tra tre dias e ave no cosa per come.
3. Si me envia los fame a via a sua casas, los va colasa en via, e alga de los ia veni de distantia.”
4. Sua disiplos ia responde a el: “Do algun pote trova pan per los en esta deserto?”
5. El ia demanda los: “Cuanto panes vos ave?” “Sete,” los ia responde.
6. A pos el ia comanda la fola a senta se sur la tera. Poi, prendente la sete panes, el ia dona grasias, ia divide los e ia dona los a sua disiplos per distribui, e los ia distribui los a la fola.
7. Los ia ave ance alga pexes. El ia bondise los e ia comanda ance distribui los.
8. Los ia come e ia es sasiada. Los ia colie sete sestos de lo cual ia resta.
9. Los ia es sirca cuatro mil persones.
   El ia envia los a via
10. e ia entra a un barco con sua disiplos e ia veni a la rejion de Dalmanuta.
11. La fariseos ia veni e ia comensa disputa con el, xercante un sinia de la sielo per proba el.
12. El ia suspira de la profonda de sua spirito el ia dise: “Perce esta jenera xerca un sinia? Me dise a vos ce no sinia va es donada a esta jenera.”
13. E abandonante los, el ia entra a la barco denova, e ia vade a la otra costa.
14. Los ia oblida trae pan e los ia ave sola un pan con los en la barco.
15. Jesus ia recomenda a los: “Es vijilante e garda vos contra la fermento de la fariseos e la fermento de Herode.”
16. Los ia conclui entre se ce esta es car los no ia ave pan.
17. Cuando el ia comprende esta, el ia dise a los: “Perce vos conclui ce lo es car vos no ave pan? Esce vos no comprende? Esce vosa cores es durida?
18. Esce vos ave oios e no vide, oreas e no oia? E esce vos no recorda,
19. cuando me ia rompe la sinco panes per la sinco mil, cuanto sestos de bastetas plenida con restas vos ia recolie?” Los ia responde a el: “Des-du.”
20. “Cuando me ia rompe la sete panes per la cuatro mil, cuanto sestos plenida de restas vos ia recolie?” Los ia responde: “Sete.”
21. El ia dise a los: “Esce vos an no comprende?”
22. Cuando los ia ariva a Betsaida, los ia trae a el un om sieca e ia suplica el a toca el.
23. El ia prende la sieca par la mano e ia gida el estra la vileta. Poi el ia pone saliva en sua oios e ia pone sua manos sur el, el ia demanda: “Esce tu vide alga cosa?”
24. La sieca, ci ia comensa vide, ia responde: “Me vide omes, como si los es arbores paseante.”
25. Poi el ia pone sua manos sur sua oios a un ves du e el ia vide clar; sua vide ia es restorada e el ia pote vide tota con claria.
26. Pos esta, el ia envia el a casa e ia dise: “No vade an a la vileta.”
27. Aora Jesus e sua disiplos ia sorti a la viletas de Sesarea de Filipo. Longo la via, el ia demanda a sua disiplos: “La popla dise ce me es ci?”
28. Los ia responde: “Joan la Batiste, otras Elija, an otras un de la profetas.”
29. E el demanda los: “Ma vos dise ce me es ci?” Pedro ia responde: “Tu es la Maxia.”
30. Poi el ia averti los a parla a nun sur el.
31. El ia comensa instrui los ce la Fio de la Om debe sufri multe e es rejetada par la veas, la pretes xef, e la scrivistes, e es matada, e revive pos tre dias.
32. El ia dise esta sin asconde. Poi Pedro ia prende el a lado e ia comensa reproxa el.
33. Ma Jesus, turnante e regardante a sua disiplos, ia reproxa Pedro e ia dise: “Vade a retro de me, Satan. Tu no pensa como Dio fa, ma como la omes.”
34. El ia clama la fola con sua disiplos e ia dise a los: “Cualcun ci vole segue me, debe nega se, prende sua crus e segue me.
35. Car cualcun ci desira salva sua vive va perde lo, ma cualcun ci perde sua vive per me e la Bon Nova va salva lo.
36. Cual profita el ave ci per gania tota la mundo va perde sua vive?
37. Cual on ta pote dona par intercambia per sua vive?
38. Car si cualcun vergonia de me o de mea parolas en esta jenera adulterante e pecosa, la Fio de Om va vergonia de los cuando el va veni en la gloria de sua Padre con la anjeles santa.”