Traduida par Chabi
Capitol 16
- Cuando la dia santa ia fini, Maria Magdalena, Maria, la madre de Jacobo, e Salome ia compra spises per vade e unje el.
- Multe temprana cuando la sol ia leva, en la dia prima de la semana, los ia vade a la tomba.
- Lo ia es disente a lunlotra: “Ci va move la petra de la entra de la tomba per nos?”
- Cuando los ia ariva, los ia vide ce la petra ia es ja moveda; lo ia es multe grande.
- Pos entra a la tomba, los ia vide un om joven sentante a la lado destra, vesteda en un roba blanca, e los ia es completa stonada.
- El ia dise a los: “No es stonada! Vos xerca Jesus de Nazaret, la crusida. El ia revive, el no es asi. Regarda la loca do los ia pone el.
- Ma vade e dise a sua disiples e a Pedro: “El vade ante vos a Galilea; ala el va vide vos, como el ia dise a vos.”
- Alora los ia sorti corente de la tomba, car los ia es tremante e confondeda. Los ia parla a nun, car los ia es temosa.
- Jesus, ci ia revive ja temprana en la dia prima de la semana, ia apare prima a Maria Magdalena, de ci el ia espulsa sete demones.
- Ela ia vade e ia dise a los ci ia acompania sempre el, e ci ia es lamentante e plorante.
- Cuando los ia oia ce el vive e ia es videda par ela, los no ia crede.
- Pos esta, el ia apare en otra forma a du de los paseante longo sua via a un vileta.
- Los ia reveni e ia nara a la otras; ma ance los no ia crede los.
- Ma plu tarda, el ia apare a la des-un cuando los ia es comente, e el ia reproxa los sur sua noncredosia e sua ostina car los no ia crede un person ci ia vide el reviveda.
- El ia dise a los: “Vade a tota la mundo e proclama la evanjelio a tota ci vive.
- Cualcun ci crede e es batizada va es salvada; cualcun ci no crede va es condenada.
- Esta sinias va acompania los ci crede: en mea nom los va espulsa demones, los va parla linguas nova.
- Los va pote prende serpentes con sua manos, e si los bevi cualce cosa matante, lo no va feri los. Los va pone sua manos sur la maladas, e los va sani los.”
- Alora la Senior Jesus, pos parla con los, ia es portada a la sielo e ia prende sua seja a la destra de Dio.
- E los ia sorti per predica en tota locas, e la Senior ia aida los e ia confirma sua parola con la miracles cual ia acompania lo.