Leson 1: Pronunsia e spele
Tocipona ave mera 14 fonemes: 9 consonantes e 5 vocales. On scrive los en modo fonetical, usante la alfabeta latina reduida a la des-cuatro leteras seguente:
- j k l m n p s t w
- a e i o u
On pronunsia la leteras plu o min como en elefen, con la esetas seguente: j ave la sona de “i” en “ia”, e w sona como “u” en “acua”.
Cada silaba ave la forma jeneral seguente: consonante + vocal + (cisa) n.
Un consonante inisial no es obligada cuando la silaba es la prima de un parola. Un silaba cual fini con n no pote es segueda par un silaba cual comensa con n o m. La cuatro combinas *ji, *ti, *wo e *wu es proibida car los es difisil per pronunsia.
La asentua es sempre a la silaba prima de un parola.
On vide asi esemplos de parolas con sua sinifias e – do los difere de elefen – sua pronunsias:
- a — (un esclama)
- mu — muu, cualce cria de animal
- len — veste
- waso (dise “uaso”) — avia
- linja (dise “linia”) — filo, corda, capel, etc
- anpa — basa, a su, etc
En fato, car on ave vera poca fonemes e donce poca risca de confusa, la regulas de pronunsia es alga jenerosa. Un p pote es egal bon pronunsiada como “b”, e simil per k como “g”, s como “z”, e t como “d”. On pote pronunsia waso como “uazo”, anpa como “amba”, e tal plu.
Leteras major e puntua
La parolas ofisial de tocipona (pd. la 120 parolas de la disionario) es nunca scriveda con leteras major. On usa sempre leteras minor, an a comensa de frase. Par contrasta, nomes propre de persones o paises – e jeneral tota nomes cual no apare en la disionario – debe comensa con letera major.
On usa la sinias seguente de puntua a fini de frases: punto (.), sinia de esclama (!), sinia de demanda (?), e dupunto (:). Tocipona usa no punto-virgulas, e no multe virgulas. (Ma un caso esiste do un virgula es obligada, pos un nom vocativa: vide leson 8.) Esemplos:
- jan Emili li pona lukin. — Emilia es bela.
- seme li lon? — Cual cosa aveni?
- o kama sona e toki pona! — Aprende tocipona!
- mi pilin e ni: toki pona li pona. — Me pensa esta: tocipona es bon. (Me pensa ce tocipona es bon.)
On no ave un regula sur sinias de sita. Testos simple no usa tal sinias, ma alga persones ajunta los an sin regula desideda.