Leteras e sonas
Tocipona usa sola 14 leteras de la alfabeta.
a e i j k l m n o p s t u w
Vocales
On ave sinco vocales, cual pote es pronunsiada esata como en elefen. On pote oia ce multes pronunsia e como en la parola engles bet o como ai en la parola franses aime, ma lo no es tan importante ce cadun parla en esata la mesma modo.
Consonantes
Tocipona ave nove consonantes. La leteras p t k m n s l w sona esata como en elefen. La letera tocipona j sona como la i en la parola elefen ia.
Tocipona es un lingua pardonosa. Car lo ave tan poca sonas, tua lingua ave plu libria. Per esemplo, si tu dise dogi en loca de toki, tua pronunsia ta es ancora asetable.
La asentua cade a la silaba prima de un parola. Pronunsia lo alga plu forte, alga plu longa o con tono alga plu alta. Per esemplo, la parola toki es pronunsiada ‘TO-ci’ e no ‘to-CI’.
Parolas en tocipona es scriveda en caxa minor, an a la comensa de un frase.
Pratica
Leje esta parolas a vose. Los ta debe sona como parolas elefen.
- linja linia
- pan pan
- tenpo tempo
- mute multe
- pini fini
- kulupu club
Nota de la traduor
En esta libro, multe pajes ave notas de la autor a sua fini. Estas veni de un colie de notas en engles cual la autor ia libri a pos, en la Disionario de tocipona (lipu ku) e ance par sua site web.