Capitol 11: Sustantivos

A: Sesos de sustantivos

La gramatica de kotava no indica sesos, pd. masia, femia e otras. Tota sustantivos ave un seso nondeterminada, e on debe usa los en esta modo. Si spesifia o insiste sur la seso natural de un umana o animal es nesesada, on pote ajunta un sufisa de seso a la sustantivo: “-ya” per femas e “-ye” per mases.

B: Regula de acorda bon sonante

An si kotava ave no conseta spesifiada per seso, la idea de “acorda bon sonante” es multe importante.

Tota determinantes¹ (ajetivos, realintes, numeros, partisipios), alga pronomes (per esemplo posesales) e sufisas jeneral es afetada par la acorda bon sonante; su la regula, la letera final de esta parolas debe es la mesma como la letera final de la sustantivo (o pronom) refereda, per dise, los debe ave un coda bon sonante simil. Tal:

• si un sustantivo ave un coda consonante o semiconsonante, sua determinantes, pronomes de posese o sufisas jeneral ta ave zero coda vocal.
• un sustantivo cual ave un coda –a → infleta –a
• un sustantivo cual ave un coda –e → infleta –e
• un sustantivo cual ave un coda –i → infleta –i
• un sustantivo cual ave un coda –o → infleta –o
• un sustantivo cual ave un coda –u → infleta –u

Pe:

• listaf patectoy (un vista bela)
• baroye blucte (tre vestes)
• bati zveri (esta avia)

C: Espresa de plural

1) Plural semantical

En kotava, la pluralia es un caso de semantica. On pote usa pronomes, determinantes e ajetivos cual ave pluralia inerente, o numeros (plu ca 1), o conjugas personal de la verbo, per espresa sustantivos plural.

Pe:

• koe kelt va aluboy bitej wí (me vide sinco stelas en la sielo)
  • aluboy (sinco) es inerente plural
• koe kelt jontik bitej jebed (multe stelas brilia en la sielo)
  • jontik (multe) es inerente plural; la verbo es en conjuga de la person tre plural (jebed)

2) La realinte plural de nondefini “yon”

Kotava ave un realinte plural de nondefini en ajunta, nomida “yon”. On usa lo cuando la numero o cuantia es no spesifiada. Vide a su (cap. 13, § I-b).

Pe:

• koe kelt va yon bitej rowí (me vide alga stelas en la sielo)
  • yon (alga) indica pluralia

3) Plural par paroletas separada (ante 2008)

Ante 2008, kotava ia usa un otra forma de plural alga nonusual. Lo asosia un paroleta separada nonmutable de plural. En fato, on ave du tal paroletas: “se” e “yo”, e los es asoluta intercambiable.

Per plurali un sustantivo (o pronom), on debe ajunta la paroleta “se” o “yo” direta pos lo, cual afeta la intera de la sintagma nomal (o pronomal).

Pe:

• in va bitej yo disuker (el regarda la stelas)
• bat listaf batakaf okol se vulted (esta cavalos blanca bela core)
• bat listaf batakaf okol yo vulted (esta cavalos blanca bela core)

La reformi de 2008 recomenda abandona esta forma, e promove la otra du regulas. Normal, on debe desusa “se” e “yo”. Contra esta, lo es tolerada ce on continua usa los ante o pos la sintagma ojetida, an si esta no es recomendada. En 2022, esta paroletas es total obsoleta.

D: Nomes propre e clasintes

Kotava regarda cada nom propre como un sustantivo, ma tal sustantivo es asoluta nonvariable e nonderivable, no como nomes normal, e en fato, los funsiona par un sistem de aposa cual apare normal con un “clasinte” cual determina la natur de la sustantivo. La clasinte es un parte de vocabulo comun, e lo porta tota afisas.

1) Clasintes

On pote usa la plu de nomes de vocabulo comun como clasintes de nomes propre, ma la clasintes xef es relatada a nomes de umanas (ayik, guazik, velik, etc), formas de cortesia (weltik, jiomik), titulos (gazik, sersik, taneagadesik), locas (kuksa, mefta, uzda, wida, widava), esentes legal (patecta, gola, dota), spesies (katca, oxi, bliind), obras o medias de arte (neva, luz, teliz, fela), grupos o organizas (lospa, veem, ja), unias de mesura (soluma, lum, lumolk), mones (tal), linguas (ava), etc.

Seguente la prinsipe fondal de cual cada nom propre en kotava es definida con un nom como determinante, on debe loca la nom propre ante sua clasinte. Inserta otra elementos entre la du es nonasetable.

Pe:

• Napoléon gindik (la Imperor Napoleon)
• Martin weltikye (Senior Martin); Martin weltik (Seniorel Martin)
• London widava (la Site London)
• Baikal uzda (la Lago Baical)
• Franca patecta (la Frans, la pais France)
• Euro tal (la mone euro)
• Monotremata veem (la ordina monotreme)

Nota: la regula de acorda bon sonante aveni a la clasinte, no la nom propre, an si lo es direta pos la determinante e ave un coda diferente.

Pe:

• cuisafa London widava (la Site London merveliosa)

Alora tota derivadas posible de la nom propre no es construida sur lo mesma, ma sur sua clasinte.

Pe:

• London widavik (un abitor de la Site London; engles: Londoner)
• Baikal uzdaxo (la teritorio de la Lago Baical)
• Euro talolk (un moneta o bileta de mone euro)
• Monotremata veemolk (un animal de la ordina monotreme)

Vide Ajuntada B per un lista noncompleta de clasintes

2) Nomes propre sin clasinte

Si la nom propre es multe comun (nom de pais, de site grande, de loca famosa, de person, etc), on ta pote omete sua clasinte. Per esemplo, nomes de paises es rara acompaniada (Franca, Espana, etc) par sua clasinte (patecta).

De ala, un tal nom propre va governa direta cualce acordas bon sonante cual es afisada a lo, e pote formi parolas derivada e composada, su du regulas asoluta:

• on ave no ambiguia posible; per dise, kotava proibi tota confusa semantical con nomes comun preesistente cual la contesto espresa ja franca.
• la nom propre conteni no leteras o sinietas nonesistente² en kotava.

Si la sinietas es conservada, lo ta debe usa un clasinte.

Pe:

• londonik (un abitor de la Site London; engles: Londoner), ance London widavik
• euroolk (un moneta o bileta de mone euro), ance Euro talolk

par contrasta:

• Québec winkik (un abitor de la Provinse Quebec), nunca Québecik
• A Coruña widavaf (relatada a la Site A Coruña), nunca A Coruñaf