Capitol 10: La table morfolojial
La importa de morfolojia es un cualia grande de kotava. On defini clar la categorias sintatical en modo morfolojial, e governa los esata con un sistem de ierarcia. Kotava ave multe posibles de cambia un categoria sintatical a un otra, cual composa un bon parte de la ricia de la lingua, ma los es rigorosa regulada. Esta table morfolojial resoma tota categorias sintatical de kotava:
| 1. | Sustantivos | Verbos | |
|---|---|---|---|
| 2. | Determinantes | ||
| 3. | Averbos derivada | ||
| 4. | Pronomes | Preposadas | Averbos orijinal |
| 5. | Paroletas | Juntas | Esclamas |
Donce la table morfolojial es composada de 5 niveles ierarcial:
- nivel prima: sustantivos e verbos. Los es marcada par sua relatas bidirijal con lunlotra, con la determinantes, e con se mesma.
- nivel du: determinantes. Los es morfolojial relatada con cuasi cada categoria sintatical, ance con se mesma.
- nivel tre: averbos derivada de determinantes.
- nivel cuatro: averbos, pronomes e preposadas “orijinal” e nonderivada.
- nivel sinco: juntas, paroletas e esclamas. Esta categorias es separada e ave no relata morfolojial con la otras.
La tre niveles prima es nomida estendables, per dise, on pote crea neolojismes de esta niveles con un metodo interna. Par contrasta, la du niveles final es “fisada” car sua cuantia pote es aumentada sola en modo esterna; on debe crea los de zero.