Capitol 5

1 Mea fio, atende mea sajia.
Inclina tua orea a mea comprende:
2 afin tu manteni discretia,
afin tua labios conserva sabe.
3 Car la labios de la adulteror gotea miel.
Sua boca es plu lisa ca olio,
4 Ma a fini el es tan amarga como asinto,
e tan agu como un spada con du lamas.
5 Sua pedes vade a su a moria.
Sua pasos gida direta a Xeol.
6 El no considera la via de vive.
Sua vias es curvida, e el no sabe lo.
7 Aora donce, mea fios, escuta me.
No parti de la parolas de mea boca.
8 Teni tua via distante de el.
No veni prosima a la porte de sua casa,
9 afin tu no dona tua onora a otras,
e tua anios a la cruel;
10 afin stranjeres no banceta sur tua ricia,
e tua laboras rici la casa de un otra om.
11 Tu va jemi a tua fini,
cuando tua carne e tua corpo es consumada,
12 e dise: “U ce me ia odia instrui,
e mea cor ia despeta reproxa;
13 Me no ia obedi la vose de mea instruores,
e no ia inclina mea orea a los ci ia instrui me!
14 Me ia veni a la borda de ruina completa,
en la media de la asembla colieda.”
15 Bevi acua de tua propre tance,
acua corente de tua propre poso.
16 Esce tua fontes supraflue en la stradas,
rietas de acua en la plazas publica?
17 Ta ce los es per tu mesma sola,
no per stranjeres con tu.
18 Ta ce tua fonte es bondiseda.
Joia en la sposa de tua jovenia.
19 Un servo fema amante e un servo mas grasiosa –
ta ce sua senos sasia tu a tota veses.
Es sempre caturada par sua ama.
20 Car perce tu, mea fio, ta es caturada par un adulteror?
Perce abrasa la senos de un otra?
21 Car la vias de om es ante la oios de Iaue.
El esamina tota sua vias.
22 La mal atas de la malvolente marania el.
La cordas de sua peca teni el firma.
23 El va mori par manca de instrui.
En la grandia de sua folia, el va devia.