Capitol 12

1 El ci ama coreti ama sabe,
ma el ci odia reproxa es stupida.
2 Un bon om va oteni favore de Iaue,
ma el va condena un om con scemas vil.
3 Un om no va es fundida par malia,
ma la radis de la virtuosas no va es moveda.
4 Un fem brava es la corona de sua sposo,
ma un sposa desonorosa es como putridia en sua osos.
5 La pensas de la virtuosas es justa,
ma la consela de la viles es enganosa.
6 La parolas de la viles es sur embosce per sangue,
ma la parla de la onestas salva los.
7 La viles es suvertida e es no plu,
ma la casa de la virtuosas va sta.
8 Un om va es lodada seguente sua sajia,
ma el ci ave un mente contorseda va es despetada.
9 Plu bon es el ci es poca respetada e ave un servor,
ca el ci onora se e manca de pan.
10 Un om virtuosa respeta la vive de sua animal,
ma la compatia dulse de la viles es cruel.
11 El ci aradi sua tera va ave multe pan,
ma el ci xasa fantasias es sin comprende.
12 La vil desira la fura de omes vil,
ma la radis de la virtuosas flori.
13 Un om vil es trapida par la pecosia de labios,
ma la virtuosa va sorti de problem.
14 Un om va es sasiada con bonia par la fruta de sua boca.
La labora de la manos de un om va es recompensada a el.
15 La via de un fol es coreta en sua propre oios,
ma el ci es saja escuta consela.
16 Un fol mostra sua irita a la mesma dia,
ma un ci iniora un insulta es cauta.
17 El ci es onesta atesta onesta,
ma un atestor falsa menti.
18 On ave un ci parla fretosa como la perfora de un spada,
ma la lingua de la sajas sani.
19 Labios de veria va es fundida per sempre,
ma un lingua mentinte es mera momental.
20 Engana es en la cor de los ci scema malia,
ma joia veni a la promovores de pas.
21 No turba va aveni a la justas,
ma la viles va es plenida con malia.
22 Labios mentinte es un odiable a Iaue,
ma los ci fa la veria es sua deleta.
23 Un om cauta conserva sua sabe,
ma la cores de foles proclama folia.
24 La manos de la asiduas va rena,
ma pigria fini en labora de sclavo.
25 Ansia en la cor de un om pesa lo a su,
ma un parola amin fa lo a felis.
26 Un person virtuosa es cauta en amia,
ma la via de la viles malgida los.
27 La om pigra no rosta sua animal xasada,
ma la posesedas de omes asidua es valuada.
28 En la via de virtuosia es vive;
en sua curso on no ave mori.