Capitol 4

1 Escuta, fios, a la instrui de un padre.
Atende e sabe comprende;
2 car me dona a vos bon aprende.
No abandona mea lege.
3 Car me ia es un fio a mea padre,
dulse e un enfante unica en la vista de mea madre.
4 El ia instrui me, e ia dise a me:
“Ta ce tua cor reteni mea parolas.
Oserva mea comandas, e vive.
5 Oteni sajia.
Oteni comprende.
No oblida, e no devia de la parolas de mea boca.
6 No abandona el, e el va conserva tu.
Ama el, e el va garda tu.
7 Sajia es suprema.
Oteni sajia.
Si, an si lo custa tota tua posesedas, oteni comprende.
8 Respeta el, e el va alti tu.
El va porta tu a onora, cuando tu abrasa el.
9 El va dona a tua testa un garlanda de grasia.
El va dona un corona de brilia a tu.”
10 Escuta, mea fio, e reseta mea disedas.
La anios de tua vive va es multe.
11 Me ia instrui tu en la via de sajia.
Me ia gida tu en vias reta.
12 Cuando tu vade, tua pasos no va es impedida.
Cuando tu core, tu no va tropeza.
13 Teni firma instrui.
No lasa el vade.
Conserva el, car el es tua vive.
14 No entra a en la via de la males.
No pasea en la via de omes mal.
15 Evita lo, e no pasa par lo.
Turna de lo, e pasa a ante.
16 Car los no dormi sin fa mal.
Lor dormi es sutraeda si los no fa ce algun cade.
17 Car los come la pan de malia,
e bevi la vino de violentia.
18 Ma la via de la virtuosas es como la lus matininte,
cual brilia plu e plu asta la dia perfeta.
19 La via de la males es como oscuria.
Los no sabe sur cual los tropeza.
20 Mea fio, atende a mea parolas.
Turna tua orea a mea disedas.
21 No lasa los parti de tua oios.
Conserva los en la media de tua cor.
22 Car los es vive a los ci trova los,
e sania a lor corpo intera.
23 Garda tua cor con tota asiduia,
car de lo es la fonte de vive.
24 Pone a via de tu mesma un boca pervertida.
Pone labios malida distante de tu.
25 Tua oios regarda reta a ante.
Fisa tua regarda direta ante tu.
26 Fa la via de tua pedes a plana.
Fa ce tota tua vias es securida.
27 No turna a la mano destra no a la sinistra.
Sutrae tua pede de mal.