Capitol 11

1 Un balansa falsa es un odiable a Iaue,
ma pesas esata es sua deleta.
2 Cuando orgulo veni, alora vergonia veni,
ma con umilia veni sajia.
3 La interia de la virtuosas va gida los,
ma la pervertidia de la tradosas va destrui los.
4 Ricias no profita en la dia de coleria,
ma virtuosia libri de mori.
5 La virtuosia de la nonculpable va dirije sua via,
ma la vil va cade par sua propre vilia.
6 La virtuosia de la virtuosas va libri los,
ma la nonfidosas va es trapida par mal desiras.
7 Cuando un om malvolente mori, espera mori,
e espeta de potia veni a no cosa.
8 Un person virtuosa es librida estra turba,
e la vil prende sua loca.
9 Con sua boca la om sin dio destrui sua visina,
ma la virtuosa va es librida tra sabe.
10 Cuando lo vade bon a la virtuosas, la site joia.
Cuando la viles mori, on ave crias.
11 Par la bondise de la virtuosa, la site es altida,
ma lo es suvertida par la boca de la vil.
12 El ci despeta sua visina es sin sajia,
ma un om de comprende silenti.
13 El ci trae rumores tradi un secreta,
ma el ci ave un spirito fidable es el ci manteni un secreta.
14 Do on no ave gida saja, la nasion cade,
ma en la multia de conselores on ave vinse.
15 El ci es garantia per un stranjer va sufri per lo,
ma el ci refusa prometes de garantia es secur.
16 Un fem cortes oteni onora,
ma omes violente oteni ricias.
17 La om pardonosa fa bon a sua propre alma,
ma el ci es cruel turba sua propre carne.
18 Persones vil gania salarios enganosa,
ma el ci semi virtuosia recolie un recompensa serta.
19 El ci es vera virtuosa oteni vive.
El ci xasa malia oteni mori.
20 Los ci es pervertida en cor es un odiable a Iaue,
ma los de ci sua vias es nonculpable es sua deleta.
21 La plu serta, la om vil no va es nonpunida,
ma la seme de la virtuosa va es librida.
22 Como un anelo de oro en la beco de un porco,
es un fem bela ci manca de discretia.
23 La desira de la virtuosas es sola bon.
La espeta de la viles es coleria.
24 On ave el ci sperde, e aumenta ancora plu.
On ave el ci reteni plu ca conveninte, ma gania povria.
25 La alma jenerosa va es grasida.
El ci acui va es ance acuida el mesma.
26 On maldise algun ci reteni gran,
ma bondise va es sur la testa de el ci vende lo.
27 El ci xerca bonia con asiduia xerca favore,
ma el ci xerca malia, lo va veni a el.
28 El ci fida sua ricias va cade,
ma la virtuosa va flori como la folia verde.
29 El ci turba sua propre casa va erita la venta.
La fol va es servor a la sajas de cor.
30 La fruta de la virtuosas es un arbor de vive.
El ci es saja gania almas.
31 Vide, la virtuosas va es repaiada en la tera;
cuanto plu la vil e la pecor!