Capitol 1

1 La proverbos de Solomon, la fio de David, re de Israel:

2 per sabe sajia e instrui;
per distingui la parolas de comprende;
3 per reseta instrui en condui saja,
en virtuosia, justia e egalia;
4 per dona cautia a la simples,
sabe e discretia a la joven:
5 afin la saja oia, e crese en aprende;
afin la om de comprende ateni consela sana:
6 per comprende un proverbo e parabolas,
la parolas e enigmas de la sajas.
7 La teme de Iaue es la comensa de sabe;
ma la foles despeta sajia e instrui.
8 Mea fio, escuta la instrui de tua padre,
e no abandona la instrui de tua madre:
9 car los va es un garlanda grasiosa per tua testa,
e cadenas sirca tua colo.
10 Mea fio, si pecores tenta tu, no acorda.
11 Si los dise, “Veni con nos,
ta ce nos embosce per sangue;
ta ce nos espeta furtiva per la inosentes sin causa;
12 ta ce nos engoli los vivente como Xeol,
e intera, como los ci desende a en la poso.
13 Nos va trova tota ricia valuosa.
Nos va pleni nosa casas con furada.
14 Tu va partisipa entre nos.
Nos va tota ave un sola bolsa.”
15 Mea fio, no pasea en la via con los.
Teni tua pede de sua via,
16 car sua pedes core a malia.
Los freta per versa sangue.
17 Car on estende futil la rede en la vista de cualce avia:
18 ma estas embosce per sua propre sangue.
Los espeta furtiva per sua propre vives.
19 Tal es la vias de cadun ci es avar per profita.
Lo sutrae la vive de sua posesores.
20 Sajia clama a vose en la strada.
El espresa sua vose en la plazas publica.
21 El clama a la testa de locas ruidosa.
A la entra de la portones de site, el espresa sua parolas:
22 “Cuanto tempo, vos simples, vos va ama simplia?
Cuanto tempo burlores va deleta se en burla,
e foles odia sabe?
23 Turna a mea reproxa.
Vide, me va versa mea spirito sur vos.
Me va fa mea parolas a conoseda a vos.
24 Car me ia clama, e vos ia refusa;
me ia estende mea mano, e nun ia atende;
25 ma vos ia iniora tota mea consela,
e no ia vole mea reproxa;
26 Me va rie ance a vosa desastre.
Me va burla cuando desastre veni;
27 cuando teme veni como un tempesta,
cuando vosa desastre veni como un vortis de venta;
cuando angusa e turba veni sur vos.
28 Alora los va clama a me, ma me no va responde.
Los va xerca me asidua, ma los no va trova me;
29 car los ia odia sabe,
e no ia eleje la teme de Iaue.
30 Los no ia vole mea consela.
Los ia despeta tota mea reproxa.
31 Donce los va come de la fruta de sua propre via,
e va es plenida con sua propre scemas.
32 Car la retrosede de la simples va mata los.
La noncura fasil de foles va destrui los.
33 Ma ci escuta a me va abita secur,
e va es calma, sin teme de dana.”