Capitol 8

1. En acel dias cuando ance on ia ave un fola sin nada per come, el ia clama sua disiplos e ia dise:
2. “Mea cor es moveda con compatia per la fola, car los ia es aora con me per tre dias e ave no cosa per come.
3. Si me envia los a via famida a sua casas, los va colasa en via, e alga de los ia veni de distante.”
4. Sua disiplos ia responde a el: “Do pote algun trova pan per los en esta deserto?”
5. El ia demanda los: “Cuanto panes vos ave?” “Sete,” los ia responde.
6. A pos el ia comanda a la fola senta se en la solo. Pos alora, prendente la sete panes el ia dona grasias, ia parte los e ia dona los a sua disiplos per distribui, e los ia distribui los a la fola.
7. Los ance ia ave alga pexes. El ia bondise los e ia comanda ance distribui los.
8. Los ia come e ia es sasiada. Los ia colie sete sestos de cual ia resta.
9. Los ia es sirca cuatro mil persones.
   El ia envia los a via.
10. e ia asende a un barco con sua disiplos e ia veni a la rejion de Dalmanuta.
11. La fariseos ia veni e ia comensa disputa con el, xercante un sinia de la sielo per proba el.
12. El ia suspira de la profonda de sua spirito el ia dise “Perce esta jenera xerca un sinia? Me dise a vos ce no sinia va es donada a esta jenera.”
13. E abandonante los, el ia asende a la barco denova, e ia vade a la otra riva.
14. Los ia oblida trae pan e los ia ave sola un con los en la barco.
15. Jesus ia recomenda los: “Es vijilante e cura vos contra la fermentante de la fariseos e la fermentante de Herode.”
16. Los ia conclui entre los memes ce lo ia es car los no ia ave pan.
17. Cuando el ia reali esta el ia dise a los: “Perce vos conclui ce los es car vos no ave pan? Esce vos no comprende? Esce vos es nonempatica?
18. Esce vos ave oios e no vide, oreas e no oia? E esce vos no memori,
19. cuando me ia rompe la sinco panes per la sinco mil, cuanto sestos de bastetas plenida con restas vos ia recolie?“ Los ia responde a el “Des-du“.
20. “Cuando me ia rompe la sete panes per la cuatro mil, cuanto sestos plenida de restas vos ia recolie.” Los ia responde “Sete.”
21. El ia dise a los: “Esce vos an no comprende?”
22. Cuando los ia ariva a Betsaida, los ia trae a el un om sieca e ia suplica el a toca el.
23. El ia prende la sieca de la mano e ia gida el estra la vileta. A pos el ia pone saliva en sua oios e ia pone sua manos sur el, el ia demanda: “Esce tu vide alga cosa?”
24. La sieca, ci ia comensa vide, ia responde: “Me vide omes, como si los es arbores paseante.”
25. A pos, el ia pone sua manos sur sua oios un ves dus e el ia vide clar; sua vide ia es reponeda e el ia pote vide tota con claria.
26. Pos alora, el ia envia el a casa e ia dise: “No an vade a la vileta.”
27. Aora Jesus e sua disiplos ia sorti a la viletas de Sesarea de Filipo. Longo la via, el ia demanda a sua disiplos: “Ci dise la popla ce me es?.”
28. Los ia responde: “Joan la Batiste, otras Elija, an otras un de la profetas.”
29. E el demanda los: “Ma ci vos dise ce me es?” Pedro ia responde: “Tu es la Maxia.”
30. A pos el ia averti los no dise a nun sur el.
31. El ia comensa ensenia los ce la Fio de la Om debe sufri multe e es rejetada par la veas, la pretes xef, e la scrivistes, e es matada, e revive pos tre dias.
32. El ia dise esta sin asconde. A pos Pedro ia porta el a lado e ia comensa reproxa el.
33. Ma Jesus, reversante e regardante a sua disiplos, el ia reproxa Pedro e ia dise: “Vade retro de me, Satan. Tu no pensa como Dio fa, ma como la omes.”
34. El ia clama la fola con sua disiplos e ia dise a los: “Cualcun ci vole segue me, debe nega se mesma, prende sua crus e segue me.
35. Car cualcun ci desira salva sua vive va perde lo, ma cualcun ci perde sua per me e la Nova Bon va salva lo.
36. Cual profita ave acel ci per gania tota la mundo va perde sua vive?
37. Cual on ta pote dona par intercambia per sua vive?
38. Car si cualcun es vergoniada per me o de mea parolas en esta jenera adultera e pecor, la Fio de Om va es vergoniada cuando el va veni en la gloria de sua Padre con la anjeles santa.”