Capitol 2

1. Cuando Jesus ia reveni a Capernaum pos alga dias, la nova ce el ia es a casa ia estende.
2. Multe ia asembla e on no ia ave spasio per los, no an ante la porte, e el ia predica la parola a los.
3. Los ia trae un paraliseda portada par cuatro omes.
4. Noncapas de prosimi a Jesus par causa de la fola, los ia abri la teto supra el e fante un buco los ia basi la portaferida con la paraliseda.
5. Cuando Jesus ia vide sua fida, el ia dise a la paraliseda: “Fio, tua pecas es pardonada.”
6. Aora alga de la scrivistes ia es sentante ala, demandante a se:
7. “Perce esta om parla tal? El es blasfemante. Ci pote pardona pecas ma sola Dio?”
8. Jesus ia sabe direta lo cua los es pensante, donce el ia dise: “Perce vos pensa tal?
9. Cua es plu fasil, dise a la paraliseda: ‘Tua pecas es pardonada’, o dise, ‘Leva, prende tua portaferida e pasea’?
10. Ma afin vos sabe ce la Fio de la Om ave autoria per pardona pecas en la tera,”
11. el ia dise a la paraliseda: “Me dise a tu, leva, prende tua portaferida, e vade a casa.”
12. El ia leva, ia prende direta sua portaferida e ia sorti estra vista de tota. Los ia es tota stonada e ia glori Dio, disente: “Nos ia vide nunca alga cosa como esta.”
13. Jesus ia sorti denova a la borda de mar. Tota la fola ia veni a el e el ia instrui los.
14. Continuante, el ia vide Levi, fio de Alfeo, sentante en la duana de impostas. El ia dise a el: “Segue me.” E el ia leva e segue el.
15. En cuando el ia es a table a casa, multe coliores de impostas e pecores ia senta con Jesus e sua disiplos, car los ia es multe ci ia segue el.
16. Alga scrivistes ci ia es fariseos ia vide ce el es comente con pecores e coliores de impostas, e ia dise a sua disiplos: “Perce el come con coliores de impostas e pecores?”
17. Jesus ia oia esta e ia dise a los: “No la sanas nesesa la mediciste, ma la maladas. Me no veni per clama a la virtuosas, ma a la pecores.”
18. La disiplos de Joan e la fariseos ia abitua a juna. La popla ia veni a el e ia protesta: “Perce la disiplos de Joan e de la fariseos juna, ma tua disiplos no juna?”
19. Jesus ia responde a los: “Esce la invitadas a la sposi pote juna cuando la sposo nova es con los? Tra cuando los es con la sposo nova, los no pote juna.
20. Ma la dias va veni cuando la sposo nova va es sutraeda de los, e alora los va juna.
21. Nun cose un peso de stofa nova en un capa vea. Si el fa tal, la peso ajuntada tira se de la vea e la rompe mali.
22. Ance, nun pone vino nova en peles de vino vea. Si el fa tal, la vino va creve la peles de vino, e ambos de la vino e la peles va es ruinada. Plu bon, vino nova es poneda en peles de vino nova.”
23. Cuando el ia es traversante un campo de gran en la dia santa, sua disiplos ia comensa fa un via recoliente la spigas.
24. Alora la fariseos ia dise a el: “Vide, perce los fa lo cual es nonlegal en la dia santa?”
25. El ia dise a los: “Esce vos ia leje nunca cua David ia fa cuando el e sua acompaniores ia debe ata car los ia fami?
26. Como el ia entra en la casa de Dio cuando Abiatar ia es la prete alta e ia come la panes de ofre cual sola la pretes ta pote come legal, e el ia comparti con sua acompaniores?”
27. Alora el ia dise a los: “La dia santa ia es fada per la om, no la om per la dia santa.
28. Donce la Fio de Om es la Senior an en la dia santa.”