Capitol 5

1. Los ia veni a la otra lado de la mar, a la teritorio de la Gerasenas.
2. Cuando el ia sorti de la barco, direta un om de la tombas ci ia ave un spirito nonpur ia encontra el.
3. La om ia abita entre la tombas, e nun ia pote freni el plu, an con un cadena.
4. En fato, el frecuente ia es liada con securitalos e cadenas, mas la cadenas ia es rompeda par el e la securitalos craseda, e nun ia es bastante forte per domina el.
5. Dia e note entre la tombas e en la montes el ia vaga criante e ferinte se con petras.
6. Cuando el ia vide a Jesus a distantia, el ia core e ia proni ante el,
7. criante forte: “Cual tu vole de me, Jesus, Fio de Dio, la Plu Alta? Me recomenda forte tu par Dio, no tormenta me!”
8. (Car Jesus ia dise el: “Sorti de esta om, spirito nonpur!”)
9. El ia demanda el: “Cual es tua nom?” El ia responde: “Legion es mea nom. On ave multe de nos.”
10. E el ia demanda insistente el no espulsa el de acel teritorio.
11. Aora un manada grande de porcos ia es comente ala en la monte.
12. E los ia suplica el: “Envia nos a la porcos afin nos entra en los.”
13. E el ia laso los, e la spiritos nonpur ia sorti e ia entra en la porcos. La manada de sirca du mil animales ia freta de la presipe a la mar e ia afoca.
14. La porcores ia fuji e ia reporta la aveni en la vileta e tra la campania. E la popla ia sorti per vide ce ia aveni.
15. E los ia prosimi Jesus, los ia vide a la om ci ia es poseseda par Legion, sentada ala vestida e en sua mental sana. E los ia asusta.
16. Aceles ci ia atesta la aveni ia esplica a los cual ia aveni a la om poseseda e a la porcos.
17. Los ia comensa suplica el abandona sua distrito.
18. En cuando el ia es embarcante, la om ci ia es poseseda ia suplica resta con el.
19. Ma el no ia permete el ma en loca ia dise el: “Vade a casa a tua familia e anunsia a los tota cual la Senior ia fa per tu cuando ia compatia tu.”
20. La om ia vade e ia comensa proclama en la rejion de Decapoli cual Jesus ia fa per el, e tota ia es merveliada.
21. Cuando Jesus ia crusa denova (en la barco) a la otra lado, un fola grande ia reuni ensircante el, e el ia resta prosima la mar.
22. Un de la ofisiores de la sinagoga, nomida Jairo, ia veni e vidente el, ia cade a sua pedes
23. e la suplica el, disente: “Mea fia es morinte. Per favore, veni pone tua manos sur el afin el sani e vive.”
24. El ia vade con el, e un fola grande ia segue el e ia presa sur el.
25. On ia ave un fem con emoraje per des-du anios.
26. El ia sufri multe en la manos de multe dotores medical e ia spende tota cual el ia ave sin resulta ma ancora el sola ia mali.
27. El ia oia sur Jesus e el ia veni a retro de el en la fola e ia toca sua capa.
28. El ia dise: “Si me sola toca sua vestes, me va cura.”
29. Direta sua emoraje ia para e el ia senti en sua corpo ce el ia es curada de sua dole.
30. Jesus, sentinte aora ce un potia ia sorti de el, ia reversa en la fola a ia demanda: “Ci ia toca mea vestes?”
31. Ma sua disiplos ia dise a el: “Tu vide como la fola es presante sur tu, e ancora tu demanda ‘Ci ia toca me?’”
32. E el ia regarda a sirca per vide ci ia fa lo.
33. La fem, realinte cual ia aveni a el, ia prosimi temosa e tremante. El ia cade ante Jesus e ia conta el tota la veria.
34. El ia dise a el: “Fia, tua fida ia salva tu. Vade en pas a es curada de tua dole.”
35. En cuando el ia es ancora parlante, persones de la casa de la ofisior de la sinagoga ia ariva e ia dise: “Tua fia ia mori, perce ajita la Mestre plu?.”
36. Iniorante la mesaje, Jesus ia dise a la ofisior de la sinagoga: “No es temosa, sola ave fida.”
37. El no ia permete algun acompania el a interna eseta Petro, Jacobo e Joan, la frato de Jacobo.
38. Cuando los ia ariva a la casa de la ofisior de la sinagoga, el ia vide la disturba, persones plorante e ululante forte.
39. Tal el ia entra e ia dise a los: “Perce vos plora e ulula? La xica no es morida ma dormida.”
40. Los ia burla el. Alora el ia espulsa a tota e ia prende a la padre e la madre de la xica e aceles ci ia es con el e ia entra en la sala do la xica ia es.
41. El ia prende la mano de la xica el ia dise a el: “Talita cum,” cual sinifia “Xica peti, me dise tu, leva!”
42. La xica, un enfante de des-du, ia leva direta e ia comensa pasea. Alora los ia es asoluta stonada.
43. El ia dona ordinas seria ce nun debe sabe esta e ia dise a el debe es donada alga per come.