Capitol 10

1. El ia sorti de ala e ia vade a la distrito de Judea (e) tra la Rio Jordan. Denova folas ia asembla sirca el e, longo sua abitua, el ia instrui los denova.
2. La fariseos ia prosimi e ia demanda: “Esce lo es legal ce un sposo divorsa sua sposa?” Los ia es probante el.
3. El ia responde a los: “Cua Moxe ia comanda a vos?”
4. Los ia dise: “Moxe ia permete scrive un declara de divorsa e divorsa de ela.”
5. Ma Jesus ia responde: “Par causa de vosa cores noncompatiosa el ia scrive esta comanda a vos.
6. Ma de la comensa de la crea ‘Dio ia fa los om e fem.
7. Par esta, la om va lasa sua padre e madre,
8. e ambos va deveni un carne’. Donce los no es ja du, ma un carne.
9. Tal, ta ce la om no separa lo cual Dio ia junta.”
10. En la casa la disiplos ia demanda a el denova sur esta.
11. El ia dise a los: “Cualcun ci divorsa sua fem e sposi un otra adultera contra ela;
12. e si ela divorsa sua sposo e sposa un otra, ela adultera.”
13. E la popla ia es traente enfantes a el afin el toca los, ma la disiplos ia reproxa los.
14. Cuando Jesus ia vide esta, el ia coleri e ia dise a los: “Lasa ce la enfantes veni a me; no impedi los, car la rena de Dio parteni a tales como estas.
15. Me dise a vos, cualcun ci no aseta la rena de Dio como un enfante no va entra a lo.”
16. Alora el ia abrasa los e ia bondise los, ponente sua manos sur los.
17. Cuando el ia sorti per sua viaja, un om ia core a el, ia ajena ante el, demandante a el: “Bon mestre, cua me debe fa per erita la vive eterna?”
18. Jesus ia responde a el: “Perce tu nomi me bon? Nun es bon, con eseta sola de Dio.
19. Tu conose la comandas: ‘Tu no va mata, tu no va adultera, tu va no fura, tu va no atesta falsa, tu va no froda, onora tua padre e tua madre’.”
20. El ia responde e ia dise a el: “Mestre, me oserva ja tota de esta de mea jovenia.”
21. Jesus, regardante el con ama, dise a el: “Tu manca sola un cosa. Vade, vende tota cual tu ave, e dona lo a la povres e tu va ave un tesoro en la sielo; alora, veni, segue me.”
22. Cuando el ia oia esta, el ia tristi e ia vade triste, car el ia ave multe posesedas.
23. Jesus ia regarda a sirca e ia dise a sua disiplos: “Lo es tan difisil ce los ci ave ricia entra a la rena de Dio!”
24. La disiplos ia es stonada par sua parolas ma Jesus ia dise denova: “Enfantes, lo es tan difisil ce on entra en la rena de Dio!
25. Lo es plu fasil ce un camel pasa tra la oio de un ago ca ce un person rica entra a la rena de Dio.”
26. Los ia es plu stonada e ia dise entre se: “Alora, ci pote es salvada?”
27. Jesus ia regarda los e ia dise: “Per umanas lo es nonposible, ma no per Dio. Tota cosas es posible per Dio.”
28. Pedro ia comensa dise a el: “Tu sabe ce nos ia lasa tota e ia segue tu.”
29. Jesus ia dise: “Me dise a vos, on ave nun ci ia lasa o casa o fratres o sorores o madre o padre o enfantes o teras per me e la evanjelio
30. ci no va reseta multiplida par sento plu aora en esta eda presente: casas e fratres e sorores e madres e enfantes e teras, con persegues, e vive eterna en la eda veninte.
31. Ma multe ci es prima, va es ultima, e la ultima va es la prima.”
32. Los ia es en via, asendente a Ieruxalim, e Jesus ia vade ante los. Los ia mervelia, e los ci ia segue ia teme. Prendente la Des-du a lado de nova, el ia comensa dise a los cua va aveni a el.
33. “Regarda, nos es vadente a Ieruxalim, e la Fio de Om va es traeda a la pretes xef e la scrivistes, e los va condena el a mori e trae el a la noniudis
34. ci va burla el, sputa sur el, tormenta el, e mata el, ma pos tre dias el va revive.”
35. Alora Jacobo e Joan, la fios de Zebedeo, ia veni a el e ia dise a el: “Mestre, nos vole ce tu fa per nos lo cual nos va demanda de tu.”
36. El ia responde: “Cua vos desira ce me fa per vos?”
37. Los ia responde: “Permete ce en tua gloria nos pote senta, la un a tua destra e la otra a tua sinistra.”
38. Jesus ia dise a los: “Vos no sabe cua vos es demandante. Esce vos pote bevi la copa cual me bevi o es batizada con la batiza con cual me es batizada?”
39. Los ia responde a el: “Nos pote.” Jesus ia dise a los: “La copa cual me bevi, vos va bevi, e con la batiza con cual me es batizada, vos va es batizada;
40. ma ce on senta a mea destra o a mea sinistra, no me pote dona esta, ma los per ci lo ia es ja preparada.”
41. Cuando la des ia oia esta, los ia coleri contra Jacobo e Joan.
42. Jesus ia clama los e ia dise a los: “Vos sabe ce los ci es reconoseda como gidores de la noniudis domina los, e la grandes fa ce los senti sua autoria.
43. Ma lo no debe es tal entre vos. Plu bon, cualcun ci vole es grande entre vos va es vosa servor;
44. cualcun ci vole es la prima entre vos debe es la sclavo de tota.
45. Car la Fio de Om no veni per es servida ma per servi e per dona sua vive como rescata per multe.”
46. Los ia ariva a Jerico. E cuando el ia es partinte de Jerico con sua disiplos e un fola grande, Bartimeo, un om sieca, la fio de Timeo, ia senta a lado de la via, suplicante: “Jesus, fio de David, ave compatia sur me.”
47. Cuando el ia oia ce esta es Jesus de Nazaret, el ia comensa clama: “Jesus, fio de David, ave compatia sur me.”
48. E multe ia reproxa el a silenti, ma el ia clama plu forte: “Fio de David, ave compatia sur me.”
49. Jesus ia para e ia dise: “Clama el.” Donce los ia clama la om sieca, disente a el: “Felisi, leva, el es clamante tu.”
50. El ia lansa sua capa a via, ia salta a sur sua pedes e ia vade a Jesus.
51. Jesus ia dise a el: “Cua tu vole ce me fa per tu?” La om sieca ia responde a el: “Mestre, me vole vide.”
52. Jesus ia dise el: “Vade, tua fida ia salva tu.” Aora el ia reseta sua vide e ia segue el en via.