Capitol 16

1. Cuando las sabado ia fini, Maria Magdalena, Maria, la madre de Jacobo, e Salome ia compra spises per vade e unje el.
2. Multe temprana cuando la sol ia leva, en la dia prima de la semana, los ia vade a la tumba.
3. Lo ia es disente lunlotra: “Ci va move la petra de la entra a la tumba per nos?”
4. Cuando los ia ariva, los ia vide ce la petra ia es moveda; lo ia es multe grande.
5. A pos entra a la tumba los ia vide un om joven sentada a la lado destra, vesteda con un roba blanca, e los ia es asoluta merveliada.
6. El ia dise a los: “No es stonada! Vos xerca Jesus de Nazaret, la crusida. El ia revive, el no es asi. Regarda la loca do los ia posa el.
7. Ma vade e dise a sua disiples e a Pedro: “El va antes vos a Galilea; ala el va vide vos, como el ia dise vos.”
8. Alora los ia sorti corente de la tumba, car los ia es tremante e confondeda. Los ia dise no cosa a nun, car los ia es temosa.
9. Jesus, ci ia revive ja temprana en la dia prima de la semana, ia apare prima a Maria Magdalena, de ci el ia espulsa sete demones.
10. Ela ia vade e ia dise a los ci sempre ia acompania el, ci ia es lamentante e plorante.
11. Cuando los ia oia ce el ia es vivente e ia es videda par ela, los no ia crede.
12. Pos esta el ia apare en otra forma a du de los caminante longo sua via a un vileta.
13. Los ia reveni e ia nara a la otras; ma los ance no ia crede a los.
14. Ma plu tarda, el ia apare a la des-un en cuando los ia es comente, e el ia reproxa los sua noncredosia e sua ostina car los no ia crede a ci ia vide ja el reviveda.
15. El ia dise a los: “Vade a la tota mundo e proclama la evanjelio a tota vivente.
16. Cualcun ci crede e es batizada va es salvada; cualcun ci no crede va es condenada.
17. Esta sinias va acompania aceles ci crede: en mea nom los va espulsa demones, los va parla linguas nova.
18. Los va pote prende serpentes con sua manos, e si los bevi cualce cosa matante, lo no va feri los. Los va pone sua manos sur la maladas, e los va sani los.”
19. Alora la Senior Jesus, pos el parla con los, el ia es portada a la sielo e ia prende sua seja a la destra de Dio.
20. E los ia sorti per predica en tota loca, en cuando la Senior ia aida los e ia confirma sua parola con la miracles cual ia acompania lo.