Capitol 11

1. Cuando los ia prosimi Ieruxalim, a Betfage e Betania sur la Monte de Olivos, el ia envia du de sua disiplos
2. e ia dise a los: “Vade a la vileta ante vos, e direta pos entra a lo, vos va trova un cavaleta liada, ci nun ia monta ja. Deslia lo e trae lo asi.
3. Si algun demanda a vos: ‘Perce vos fa esta?’, responde: ‘La Mestre nesesa lo e va redona direta lo’.”
4. Los ia vade e ia trova la cavaleta liada a un porte en via, e los ia deslia lo.
5. Alga oservores ia demanda a los: “Cua vos fa, desliante la cavaleta?”
6. Los ia responde como Jesus ia dise a los e nun ia disturba los.
7. Los ia trae la cavaleta a Jesus e ia pone sua capas sur lo. E el ia senta sur lo.
8. Multe persones ia estende sua capas sur la via, otras ia estende ramos foliosa cual los ia corti de la campo.
9. Los presedente el, como ance los seguente el, ia clama:
   “Hosanna!
   Bondiseda es el ci veni en la nom de la Senior!
10. Bondiseda es la rena de nosa padre David, la rena cual va veni!
    Hosanna en la plu alta!”
11. El ia entra a Ieruxalim e ia vade a la corte de la templo. El ia regarda tota a sirca e, como lo ia es tarda, el ia vade a Betania con la Des-du.
12. A la dia seguente, cuando los ia sorti de Betania, Jesus ia fami.
13. Vidente un figo distante con folias, el ia vade per vide esce el pote trova un fruta sur lo. Cuando el ia ariva, el ia vide sola folias; lo no ia es la tempo per figas.
14. E el ia dise a lo: “Ta ce nun come tua frutas denova!” E sua disiplos ia escuta lo.
15. Los ia veni a Ieruxalim, e entrante a la corte de la templo, el ia comensa espulsa los vendente e comprante ala. El ia inversa la tables de la intercambiores de mone e la sejas de la vendores de pijones.
16. El no ia permete ce on porta cualce cosa tra la corte de la tempo.
17. Alora el ia instrui los disente: “Esce lo no ia es scriveda:
    ‘Mea casa debe es nomida un casa de prea per tota la nasiones’?
    Ma vos ia converti lo a un cava de furores.”
18. Cuando la pretes xef e la scrivistes ia escuta esta, los ia xerca un modo de mata el, car los ia teme el car la tota la popla ia mervelia a sua ensenia.
19. Cuando la sera ia veni, los ia sorti de la site.
20. Temprana en la matina, cuando los ia vide la figo, cual ia seci asta sua radises.
21. Pedro ia recorda e ia dise a el: “Mestre, vide! La figo cual tu ia maldise ia seci.”
22. Jesus ia dise a los: “Ave fida en Dio.
23. Car me dise a vos, cualcun ci dise a esta monte: ‘Sorti de ala e lansa tu a la mar’ e no duta en sua cor, ma crede ce lo cual el dise va aveni, lo va es fada per el.
24. Donce me dise a vos, tota cual vos va demanda en prea, crede ce vos va resta lo e lo va es vosa.
25. Cuando vos sta preante, si vos ave alga cosa contra cualcun, pardona el,
26. afin vosa Padre sielal pardona a vos vosa violes.”
27. Los ia reveni denova a Ieruxalim. Cuando los ia es paseante en la corte de la templo, la pretes xef, la scrivistes e la veas ia prosimi a el
28. e los ia dise a el: “Con cual autoria tu fa esta cosas? O ci ia dona a tu esta autoria per fa los?”
29. Jesus ia dise a los: “Me va fa un demanda a vos. Responde a me, e me va dise a vos con cual autoria me fa esta cosas.
30. Esce la batiza de Joan ia es de orijina sielal o umana? Responde a me.”
31. Los ia discute esta entre se e ia dise: “Si nos dise: ‘De orijina sielal’, el va dise: ‘Perce vos no ia crede el?’
32. Esce nos va dise: ‘De orijina umana’?” – los ia teme la fola, car tota de los ia pensa ce Joan ia es vera un profeta.
33. Donce los ia responde a Jesus: “Nos no sabe.” Alora Jesus ia dise a los: “Ance me no va dise a vos con cual autoria me fa esta cosas.”