WINI-LA-PU
Capitol Prima · Capitol Du · Capitol Tre · Capitol Cuatro · Capitol Sinco · Capitol Ses · Capitol Sete · Capitol Oto · Capitol Nove · Capitol Des

Capitol Tre

En cual Pu e Porceta vade per xasa e catura cuasi un Mostel

La Porceta abita en un casa multe grandiosa a media de un arbor, per dise un faia, e la faia es a media de la Foresta, e Porceta abita a media de la casa. A lado de la casa on ave un peso de un plance rompeda cual ave “ENTRA PR” sur se. Cuando Cristofer Robin ia demanda de Porceta cual la testo sinifia, el ia dise ce lo es la nom de sua ava, e ce lo ia es en la familia tra un tempo longa. Cristofer Robin ia dise ce on no pote es nomida Entra Pr, e Porceta ia dise ce si, on pote, car sua ava pote, e lo es un corti de Entra Pris, cual es un corti de Entra Prisila. A sua ava du nomes ia es donada per caso ce el ta perde un – Entra seguente un tio, e Prisila seguente Entra.

“Me ave du nomes,” Cristofer Robin ia dise sin atende.

“Bon, tu vide, lo demostra la cosa,” Porceta ia dise.

En un dia invernal cuando Porceta es brosinte neva ante sua casa, el leva acaso sua regarda, e alá el vide Wini-la-Pu. Pu vade a sirca e a sirca en un sirculo, pensante alga otra cosa, e cuando Porceta clama a el, el continua sola sua vade.

“Aló!” Porceta dise, “cual tu fa?”

“Xasa,” Pu dise.

“Xasa cual?”

“Me trasa alga cosa,” Pu dise, multe misteriosa.

“Tu trasa cual?” Porceta dise e veni a plu prosima.

“Acel es esata lo cual me demanda a me. Me demanda a me, cual?”

“Como tu va responde, en tua opina?”

“Me debe espeta asta cuando me ateni lo,” Wini-la-Pu dise. “Aora, regarda alá!” El indica la tera a fronte de se. “Cual tu vide alá?”

“Trasas,” Porceta dise, “marcas de pedetas.” El fa un pia de stimula. “O-o, Pu! Esce tu pensa ce lo es un – un – un Mostel?”

“Cisa,” Pu dise. “A veses lo es, a veses lo no es. On pote nunca predise impresas de pedetas.”

Con esta poca parolas el continua trasa, e Porceta, pos regarda el tra un o du minutos, core per ateni el. Wini-la-Pu para subita, e el inclina se supra la trasas en un modo confondeda.

“Cual es la conserna?” Porceta demanda.

“Multe strana,” Urso dise, “ma lo pare ce nos ave aora du animales así. Esta – cualce-lo-ia-es – ia junta se a un otra – cualce-lo-es – e la duple de los prosegue aora en junta. Esce tu ta vole veni con me, Porceta, per caso ce los va revela se como Animales Enemin?”

Porceta rasca sua orea en un modo amable, e dise ce el ave no cosa per fa ante venerdi, e el ta es deletada par veni, per caso ce lo es vera un Mostel.

“Tu vole dise, per caso ce lo es vera du Mosteles,” Wini-la-Pu dise, e Porceta dise ce el ave an tal no cosa per fa ante venerdi. Alora los vade a via en junta.

On ave esata así un bosce peti, de larix, e lo pare como si la du Mosteles, si los es vera tal, ia vade sirca esta bosce; alora sirca esta bosce Pu e Porceta vade pos los con ce Porceta pasa tempo en raconta a Pu lo cual sua Ava, Entra Pr, ia fa per Desrijidi pos la Trasa, e como sua Ava, Entra Pr, ia sufri de Respira Corta en sua eda matur, e sur otra temas interesante, e Pu demanda a se, como la Ava ta aspeta, e esce cisa esta cual los trasa aora es Du Avas, e en tal caso, esce el es permeteda a prende un Ava a casa e manteni el, e cual Cristofer Robin ta dise. E ancora la trasas continua a fronte de los …

Subita Wini-la-Pu para, e indica stimulada a fronte de se. “Regarda!

Cual?” Porceta dise con un salta. E alora, per mostra ce el no ia panica, el salta a supra e su a un o du plu veses en un modo esersin.

La trasas!” Pu dise. “Un animal tre ia junta se a la du otras!

“Pu!” Porceta esclama. “Tu pensa ce un plu Mostel?”

“No,” Pu dise, “car esta lasa impresas diferente. Nos ave o Du Mosteles e un, si cisa lo es tal, un Nustel, o du, si cisa lo es tal, Nusteles e un, si vera lo es tal, Mostel. Nos ta continua segue los.”

Alora los continua, sentinte alga ansiosa aora, per caso ce la tre animales ante los ave Intendes Enemin. E Porceta desira multe ce sua Ava E. Pr. ta es así, e no en un otra loca, e Pu pensa como dulse lo ta es, si los ta encontra Cristofer Robin, subita ma intera acaso, e sola car el ama tan multe Cristofer Robin. E alora, intera subita, Wini-la-Pu para denova e leca la apico de sua nas en un modo frinte, car el senti plu calda e ansiosa ca a cualce tempo en sua vive. Los ave cuatro animales ante se!

“Tu vide, Porceta? Regarda la trasas! Tre, si on dise tal, Mosteles, e un, si tal diseda, Nustel. Un plu Mostel ia junta se a los!

E tal lo pare. Alá es la trasas; traversante lunlotra así, miscada con lunlotra alá; ma, intera clar aora e alora, la impresas de cuatro colies de pedetas.

Me pensa,” Porceta dise, pos cuando ance el ia leca la apico de sua nas, trovante ce esta dona no multe consola, “me pensa ce me veni de recorda alga cosa cual me ia oblida fa ier e cual me no pote fa doman. Donce vera, me ta debe revade e fa lo aora.”

“Nos va fa lo a esta posmedia, e me va veni con tu,” Pu dise.

“Lo no es un tal cosa, cual on pote fa a posmedia,” Porceta dise rapida. “Lo es un cosa multe spesial de matina, cual debe es fada a matina, e, si posible, entre la oras – Pu, cual ora es aora?”

“Sirca des-du,” Pu dise regardante la sol.

“Entre, como me veni de dise, entre la ora des-du, e sinco minutos pos lo. Alora, vera, Pu vea cara, si tu pardona me – Cual es acel?

Pu leva sua regarda a la sielo, e alora, cuando el oia denova la sibila, el regarda la ramos a supra de un cuerco grande, e alora el vide un de sua amís.

“Lo es Cristofer Robin!” el dise.

“Bon, alora tu va es secur,” Porceta dise. “Tu va es intera secur con el. Asta revide,” e Porceta trota a casa tan rapida como el pote, multe felís par es denova Estra Tota Peril.

Cristofer Robin desende lenta sua arbor.

“Urso vea fol,” el dise, “cual tu ia fa? Prima, sola tu ia vade duple sirca la bosceta, alora Porceta ia core pos tu e vos ia vade en junta a sirca, e alora vos ia vade a fa un plu ronda —”

“Pausa per un minuto!” Pu dise, teninte sua pedeta a supra.

El senta se e pensa, tan profonda como el pote. Alora el cabe sua pedeta a un de la trasas … e alora el rasca duple sua nas, e sta se.

“Si,” Pu dise.

“Me vide aora,” Pu dise.

“Me ia es Fol e Iludeda,” el dise, “e me es un Urso con Tota No Serebro”.

“Tu es la Urso la Plu Bon en Tota la Mundo,” Cristofer Robin dise consolante.

“Me es?” Pu dise esperante. E alora el felísi subita.

“A cualce caso,” el dise, “aora es cuasi la Ora de Come Media.”

Donce el vade a casa per lo.

Esta paje es presentada con la lisensa CC Attribution-Share Alike 4.0 International.
Lo ia es automatada jenerada de la paje corespondente en la Vici de Elefen a 23 marto 2024 (17:15 UTC).