WINI-LA-PU
Capitol Prima · Capitol Du · Capitol Tre · Capitol Cuatro · Capitol Sinco · Capitol Ses · Capitol Sete · Capitol Oto · Capitol Nove · Capitol Des

Capitol Prima

En cual nos es presentada a Wini-la-Pu e alga Abeas, e la naras comensa

Así es Urso Eduardo, aora desendente la scalera, pum, pum, pum, sur la retro de sua testa, pos Cristofer Robin. Lo es, cuanto el sabe, la sola modo per desende la scalera, ma a veses el senti ce on ave vera un otra modo, si sola el ta pote sesa la pum, pum, pum per un momento e pensa. E alora el senti ce cisa on no ave un otra modo. A cualce caso, así el es, a basa, e preparada per es presentada a tu. Wini-la-Pu.

Cuando me, a ves prima, ia oia sua nom, me ia dise la mesma como tu vole dise aora, “Me ia pensa ce el es un xico?”

“Ance me ia pensa tal,” Cristofer Robin ia dise.

“Alora tu no pote nomi el Wini?”

“Me no nomi el tal.”

“Ma tu ia dise —”

“El es Wini-la-Pu. Tu no sabe, cual ‘la’ sinifia?”

“O, si, aora me sabe,” me ia dise rapida; e me espera ce ance tu sabe lo, car lo es tota la esplica cual tu va reseta.

A veses Wini-la-Pu gusta un jua de alga spesie cuando el veni a basa, e a veses el gusta senta cuieta ante la foco e escuta un nara. A esta sera —

“Cisa un nara?” Cristofer Robin ia dise.

Ci fa un nara?” me ia dise.

“Esce tu ta pote nara multe dulse un fable a Wini-la-Pu?”

“Cisa me ta pote,” me ia dise. “Cual spesies de naras el gusta?”

“El gusta naras sur se. Car el es un Urso de tal spesie.”

“O, me comprende.”

“Alora, per favore, multe dulse?”

“Me va atenta,” me ia dise.

E me ia atenta:


A un ves, a un tempo multe longa ante aora, sirca a la venerdi pasada, Wini-la-Pu abita en un foresta, tota solitar su la nom Grisin.

(“Cual sinifia ‘su la nom’?” Cristofer Robin ia demanda.

“Lo sinifia ce el ave la nom con leteras de oro supra la porte, e el abita su esta nom.”

“Wini-la-Pu no ia es intera serta,” Cristofer Robin ia dise.

“Aora me es,” un vose roncin ia dise.

“Alora, me va continua.” me ia dise.)

A un dia cuando el es paseante estra casa, el veni a un loca abrida en la media de la foresta, e en la media de esta loca on ave un cuerco grande, e, de la alta de la arbor, un sona forte zumbinte veni a el.

Wini-la-Pu senta se a la pede de la arbor, pone sua testa entre la pedetas, e comensa pensa.

Prima el dise a se mesma: “Acel zumbi sinifia alga cosa. Nun reseta un zumbi como acel sin alga sinifia. Si on ave un zumbi, algun es creante la zumbi, e la sola razona cual me conose es car on es un abea.”

Alora el pensa en un plu tempo longa, e dise: “E la sola razona cual me conose per es un abea, es la prepara de miel.”

E alora el leva se e dise: “E la sola razona per prepara miel, es afin me ta pote come lo.” Donce el comensa trepa la arbor.

El
trepa
e
el
trepa,
e
cuando
el
trepa
el
fa
un
canta
peti
a
se.
Lo
vade
tal:

Bzz, bzz, multe miel
preparada per la urso,
corajosa a la siel’
el dirije sua curso.

Alora el trepa pico plu … e pico plu … e alora mera pico plu. Aora el pensa un plu canta.

Si Abeas ta es Ursos, los ta crea sua casas
no a altas de arbores, me suposa, ma a basas.
E si la mundo ta es tal (la Urso es Abea),
asende esta scala no ta es un taxe mea.

A esta tempo el comensa deveni alga fatigada, e par esta causa el fa un Canta Cexante. El es aora cuasi a la gol, e si sola el ta ateni acel ramo…

Crac!

“Ai, aida me!”, Pu dise en cuando el cade tra tre metres a su, sur un ramo.

“Si sola me no ia —” el dise rebondinte a su tra ses metres, sur la ramo seguente.

“Tu vide, cual me ia intende fa,” el esplica, cuando el volta, e colide con un otra ramo, a nove metres a su, “cual me ia intende fa —”

“Natural, lo ia es alga —” el confesa, liscante multe rapida tra la ses ramos seguente.

“Tota veni, me suposa,” el deside, cuando el dise adio a la ramo final, jira a tre veses a sirca, e vola refinada sur un arboreta de ulex, “tota veni de la fato ce me gusta miel tan multe. O, aida!”

El sorti rampente de la ulex, brosi la spinas a via de sua nas, e comensa pensa denova. E la person prima a ci el pensa es Cristofer Robin.

(“Acel ia es me?”, Cristofer Robin ia dise con un vose stonada, apena osante crede lo.

“Lo ia es tu.”

Cristofer Robin dise no cosa, ma sua oios crese sempre plu grande, e sua fas deveni sempre plu ros.)

Alora Wini-la-Pu vade a sua amí Cristofer Robin, ci abita pos un porte verde en un otra parte de la foresta.

“Bon matina, Cristofer Robin,” el dise.

“Bon matina, Wini-la-Pu,” tu dise.

“Me demanda esce tu ave un tal cosa como un balon, prosima a tu?”

“Un balon?”

“Si, me veni de dise a me mesma: ‘Cisa Cristofer Robin ta ave un tal cosa como un balon, prosima a se?’ Me veni de dise lo a me mesma, pensante a balones e demandante a me.”

“Percé tu vole un balon?” tu demanda.

Wini-la-Pu regarda a sirca per vide ce nun escuta, pone sua pedeta a la boca e dise en un xuxa profonda: “Miel!

“Ma on no oteni miel par balones!”

“Si, me va oteni,” Pu dise.

Bon, lo veni de aveni ce tu, a la dia presedente, ia es a un selebra a la casa de tua amí Porceta, avente balones alá. Tu ia ave un balon grande verde, e un de la relatadas de Coneo ia ave un grande azul, e el ia abandona lo, car el es vera tro joven per selebras; e tal tu ia trae la verde e la azul a casa con tu.

“Cual de los tu ta vole?” tu demanda de Pu.

El pone sua testa entre la pedetas e pensa multe atendente.

“Esta es la situa,” el dise. “Cuando on atenta oteni miel con un balon, la cosa importante es no lasa ce la abeas sabe ce on es veninte. Aora, si on ave un balon verde, los ta pensa ce on es mera un parte de la arbor, e no persepi on. Si on ave un balon azul, los ta pensa ce on es mera un parte de la sielo, e no persepi on. La demanda es: Cual es la plu probable?”

“Esce los no ta persepi tu, su la balon?” tu demanda.

“Cisa si o cisa no,” Wini-la-Pu dise. “On pote nunca predise la abeas.” El pensa en un momento: “Me va atenta aspeta como un nube peti negra. Lo va engana los.”

“En acel caso, tu debe ave la balon azul,” tu dise, e tal la cosa es desideda.

Alora, ambos de vos vade a estra con la balon azul, e tu trae ance tua fusil con tu, sola per caso, como tu fa sempre, e Wini-la-Pu vade a un loca multe fangosa cual el sabe, e rola e rola asta cuando el es intera negra; e, pos cuando la balon ia es soflada a grandia masima, e ambos, tu e Pu, ia teni la cordeta, tu relasa rapida la cordeta, e Urso Pu flota refinada a supra en la sielo, e resta alá – a la nivel de la alta de la arbor e a sirca ses metres a via de lo.

“Urá!” tu cria.

“Lo es eselente, no?!” Wini-la-Pu clama a su a tu. “Como me aspeta?”

“Tu aspeta como un Urso teninte un balon,” tu dise.

“No —” Pu dise ansiosa, “— no como un nube peti negra en la sielo azul?”

“No vera multe.”

“Bon, cisa lo aspeta diferente de alta. E, como me ia dise, on pote nunca predise la abeas.”

No venta es soflante per colpa el a plu prosima a la arbor, donce el resta alá. El pote vide la miel, el pote ole la miel, ma el no pote vera ateni la miel.

Pos un momento peti el clama a su a tu.

“Cristofer Robin!” el dise con un xuxa forte.

“Aló!”

“Me opina ce la abeas suspeta alga cosa!”

“Un cosa de cual spesie?”

“Me no sabe. Ma alga cosa dise a me ce los es suspetosa!”

“Cisa los pensa ce tu vole oteni sua miel?”

“Cisa. On pote nunca predise la abeas.”

On ave un otra silentia peti, e alora el clama denova a tu.

“Cristofer Robin!”

“Si?”

“Tu ave un para-pluve a casa?”

“Me crede tal.”

“Me desira ce tu ta veni así con la para-pluve, e pasea así e alá con lo, e regarda me a supra aora e alora e dise ‘Ai ai, lo pare como pluve.’ Me pensa, si tu ta fa lo, lo ta aida la engana cual nos pratica sur esta abeas.”

Bon, tu rie a tu mesma, “Urso vea fol!” ma tu no dise lo a vose, car tu ama el tan multe, e tu vade a casa per trae la para-pluve.

“O, alá tu es!” Wini-la-Pu clama a su, pronto cuando tu veni denova sirca la arbor. “Me ia es deveninte ansiosa. Me ia descovre ce la abeas es aora vera Suspetosa.”

“Esce me ta abri mea para-pluve?” tu dise.

“Si, ma para per un momento! Nos debe es pratical. La abea importante per engana es la Rea de Abeas. Esce tu pote vide, de su, cual abea es la Rea?”

“No.”

“Triste. Bon, aora, si tu vade así e alá con tua para-pluve, disente ‘Ai ai, lo pare como pluve,’ me va fa lo cual me pote: fa un canta peti, Canta de Nube, tal como un nube ta canta cisa … Vade!”

Alora, en cuando tu pasea así e alá demandante a tu esce lo va pluve, Wini-la-Pu canta tal:

Tan dulse esta Nube
Flota en Azul!
Car cada nube peti
canta par regul’.
“Tan dulse esta Nube
Flota en Azul!”
Car esta Nube peti
Senti con orgul’.

La abeas continua zumbi tan suspetosa como sempre. Algas de los, vera, ia sorti de sua nido e ia vola sirca tota la nube cuando lo comensa la strofe du de esta canta, e un abea senta se sur la nas de la nube per un momento, e alora lo vola denova a supra.

“Cristofer – au! – Robin,” la nube cria.

“Si?”

“Me veni de pensa, e me ia ateni un deside multe importante. Esta abeas es de un tipo noncoreta.

“Los es?”

“Un tipo intera noncoreta. Alora me crede ce los ta prepara la tipo noncoreta de miel, como tu crede?”

“Los fa?”

“Si, tal me crede. Me va veni a su.”

“En cual modo?” tu demanda.

Wini-la-Pu no ia pensa a esta. Si el ta desteni la cordeta, el ta cade – pum – e el no gusta acel idea. Tal el pensa en un tempo longa, e alora el dise:

“Cristofer Robin, tu debe spara la balon con tua fusil. Esce tu ave tua fusil?”

“Natural me ave,” tu dise. “Ma si me fa lo, la balon va deveni danada,” tu dise.

“Ma si tu no fa lo,” Pu dise, “me debe desteni, e lo va dana me.”

Cuando el dise esta, tu vide como la cosa es, e tu punta multe atendente a la balon, e spara.

Au!” Pu dise.

“Esce me ia fali colpa?” tu demanda.

“Tu no ia fali esata colpa,” Pu dise, “ma tu ia fali colpa la balon.”

“Pardona,” tu dise e spara denova, e a esta ves tu colpa la balon, e la aira veni lenta a estra, e Wini-la-Pu flota a su sur la tera.

Ma sua brasos ia es tan rijida pos teni la cordeta en un tempo tan longa ce los ia resta a alta per plu multe ca un semana, e sempre cuando un mosca ia veni e reposa sur la nas de Pu, el ia debe sofla lo a via. E me crede – ma no es intera serta – ce esta es percé el ia es sempre nomida Pu.


“Esta es la fini de la nara?” Cristofer Robin ia demanda.

“Esta es la fini de acel. On ave otras.”

“Sur Pu e Me?”

“E sur Porceta e Coneo e tota de vos. Esce tu no recorda?”

“Me recorda, ma alora cuando me atenta recorda, me oblida.”

“Acel dia, cuando Pu e Porceta ia atenta catura la Mamufante —”

“Los no ia catura lo, si?”

“No.”

“Pu no ia pote, car el no ave un serebro. Esce me ia catura lo?”

“Bon, acel cosa va veni en la nara.”

Cristofer Robin ia acorda con testa.

“Me recorda bon,” el ia dise. “Ma Pu no recorda lo multe bon, e par acel causa el vole oia lo denova. Car en acel modo lo es un nara vera e no sola un recorda.”

“Lo es esata como me senti,” me ia dise.

Cristofer Robin ia dona un suspira profonda, ia prende sua urso a la gama, e ia pasea a la porte, tirante Pu pos se. A la porte el ia turna e dise: “Tu va veni per regarda mea bani?”

“Cisa,” me ia dise.

“Me no ia dole el cuando me ia fusili, no?”

“An no pico.”

El ia acorda con testa, e sorti, e pos un momento me ia oia Wini-la-Pu – pum, pum, pum – asendente la scalera pos el.

La cantas “Si Abeas ta es Ursos” e “Tan dulse esta Nube” ia es traduida par Simon Davies.

Esta paje es presentada con la lisensa CC Attribution-Share Alike 4.0 International.
Lo ia es automatada jenerada de la paje corespondente en la Vici de Elefen a 28 marto 2022 (10:41 UTC).