WINI-LA-PU
Capitol Prima · Capitol Du · Capitol Tre · Capitol Cuatro · Capitol Sinco · Capitol Ses · Capitol Sete · Capitol Oto · Capitol Nove · Capitol Des

Capitol Ses

En cual I-aa ave sua aniversario e reseta du donadas

I-aa, la Asino vea e gris, sta a la lado de la rieta, e regarda se sur la acua.

“Misera,” el dise. “Esata tal. Misera.”

El turna e pasea lenta a su longo la rieta per dudes metres, traversa lo salpicante, e pasea lenta denova a la otra lado. Alora el regarda se denova par la acua.

“Como me ia pensa,” el dise. “No plu bon de esta lado. Ma nun atende. Nun cura. Misera, lo es esata tal.”

On ave un ruido crepitante en la filís pos el, e Pu apare.

“Bon matina, I-aa,” Pu dise.

“Bon matina, Urso Pu,” I-aa dise sombre. “Si lo es un bon matina,” el dise. “Un cosa cual me duta,” el dise.

“Ma, cual es la conserna?”

“No cosa, Urso Pu, no cosa. Tota de nos no pote fa, e alga de nos no fa. Alá es tota.”

“No pote fa cual?” Pu dise frotante sua nas.

“Joia. Canta e dansa. Joiosa sirca un arboret’.”

“O!” Pu dise. El pensa tra un tempo longa, e a pos el demanda, “Sirca cual arboreta?”

“Bon-vole,” I-aa continua sombre. “Un parola composada cual sinifia la bon vole,” el esplica. “Me no cexa, ma Alá Lo Es.”

Pu senta sur un petra grande, e atenta pensa cual esta sinifia. La cosa pare a el como un rompe-testa, e el ia es nunca spesial bon a rompe-testas, car el es un Urso de Serebro Vera Poca. Donce el canta Trivias Nova en loca:

Trivias, Trivias Nova, ahá:
La fas rieta, ma rietas no fa.
La esplica sur lo es alá:
“Trivias, Trivias, Nova, ahá!”

Acel es la strofe un. Cuando el ia fini lo, I-aa no dise vera ce el gusta lo, donce Pu canta multe amable la strofe du a el:

Trivias, Trivias Nova, ahá:
Un avia vola a via, sin sta.
La esplica sur lo es alá:
“Trivias, Trivias, Nova, ahá!”

Ancora I-aa dise tota no cosa, donce Pu zumbi la strofe tre, cuieta a se:

Trivias, Trivias Nova, ahá:
Turbanes ta es turbante? Ba!
La esplica sur lo es alá:
“Trivias, Trivias, Nova, ahá!”

“Tu fa bon,” I-aa dise. “Canta, Tu ta vole, o no vole, entra a la dans’? Joia!”

“Me es joiante.” Pu dise.

“Algas pote,” I-aa dise.

“Ma, cual es la turba?”

“On ave alga turba?”

“Tu pare tan sombre, I-aa.”

“Sombre? Percé me ta es sombre? Oji es mea aniversario. La dia la plu felís de la anio.”

“Tua aniversario?” Pu dise, grande surprendeda.

“Natural. Esce tu no vide? Regarda tota la donadas cual me ia reseta.” El brandi un pede de lado a lado. “Regarda la torta de aniversario. Candelas e zucar ros.”

Pu regarda – prima a destra e a pos a sinistra.

“Donadas?” Pu dise. “La torta de aniversario?” Pu dise.

Do?

“Tu no pote vide los?”

“No,” Pu dise.

“Ance me no pote,” I-aa dise. “Un broma,” el esplica. “Ha, ha!”

Pu rasca sua testa, alga confondeda par tota esta.

“Ma oji es vera tua aniversario?” el demanda.

“Si.”

“O, multe felisia a tu per la dia, I-aa.”

“E multe felisia a tu, Urso Pu.”

“Ma oji no es mea aniversario.”

“No, lo es la mea.”

“Ma tu ia dise ‘Multe felisia’ —”

“Bon, percé no? Tu vole nunca es misera a mea aniversario, si?”

“O, me comprende,” Pu dise.

“Lo es ja sufisinte mal,” I-aa dise, cuasi rompente, “cuando me mesma es misera, con no donadas e no torta e no candelas, e con tota no atende real fada sur me, ma si ance cadun otra comensa es misera —”

Esta es tro multe per Pu. “Resta así!” el clama a I-aa, turnante e fretante a casa tan rapida como el pote; car el senti ce el debe trova pronto un donada de cualce spesie per I-aa, la povre, e en tota casos el va pote pensa a un donada plu conveninte a pos.

Estra sua casa el trova Porceta, ci salta a supra e su, atentante ateni la bate-porte.

“Aló, Porceta,” el dise.

“Aló, Pu,” Porceta dise.

“Cual tu atenta fa?”

“Me ia atenta ateni la bate-porte,” Porceta dise. “Me ia veni asi mera —”

“Ta ce me fa lo per tu,” Pu dise amable. Alora el estende se e bateta la porte. “Me veni de visita I-aa,” el comensa, “e I-aa povre es en un State Multe Triste, car oji es sua aniversario, ma nun ia atende lo en cualce modo, e el es multe Sombre – tu sabe como I-aa es – e alá el ia es, e – Cuanto tempo la abitor, ci el ta es, nesesa per responde a la bateta.”

E el bateta denova.

“Ma Pu,” Porceta dise, “esta es tua propre casa!”

“O!” Pu dise. “Lo es tal,” el dise. “Bon, ta ce nos entra.”

Donce a en los entra. Per la fa prima, Pu vade a la armario per vide esce el ave ancora un jar alga peti de miel; e el ave, donce el prende lo a basa.

“Me va dona esta a I-aa,” el esplica, “como un donada. Cual tu va dona?”

“Esce ance me ta pote dona acel?” Porceta dise. “De ambos de nos?”

“No,” Pu dise. “Acel idea no ta es bon.”

“Alora bon. Me va dona a el un balon. Me ave un balon restante de mea selebra. Me va vade aora e trae lo, si?”

“Acel, Porceta, es un idea multe bon. Lo es esata cual I-aa vole ave per felisi se. Nun pote es nonfelisida con un balon.”

Donce Porceta trota a via; e Pu vade en la otra dirije, con sua jar de miel.

La dia es calda, e Pu ave un via longa per vade. Pos vade tra no plu ca un dui de la via, un sensa de un spesie strana comensa rampe sur tota de el. Lo comensa sur la apico de sua nas, e flue tra tota de el asta la fondos de pede. Lo es como si algun a la interna de el ta dise, “Aora, Pu, es la ora per alga come peti.”

“Ai, ai,” Pu dise, “me no ia sabe ce lo es tan tarda.” Donce el senta se e despone la covrente de sua jar de miel. “Fortunosa me ia trae esta con me,” el pensa. “On no ave multe ursos, ci, vadente a estra a un dia calda como esta, ta pensa a trae alga come peti con se.” E el comensa come.

“Bon, ta ce me recorda,” el pensa cuando el prende la leca ultima de la interna de la jar, “do me ia debe vade? O, si, I-aa.” Lenta el sta se.

E alora, subita, el recorda. El ia come la donada de aniversario de I-aa!

Txa!” Pu dise. “Cual me va fa? Me debe dona alga cosa a el.”

Tra alga tempo peti el no pote pensa a cualce cosa. A pos el pensa: “Bon, lo es un vaso multe atraosa, an si sin miel, e si me limpi lo, e fa ce algun scrive ‘Un Aniversario Felis’ sur lo, I-aa va pote reteni cosas en lo, cual va es cisa Usosa.” Donce, car el es aora pasante la Foresta de Cuatrodes Ectares, el vade a en per visita Buo, ci abita alá.

“Bon matina, Buo,” el dise.

“Bon matina, Pu,” Buo dise.

“Multe felisia a la aniversario de I-aa,” Pu dise.

“O, nos ave acel?”

“Cual tu va dona a el, Buo?”

“Cual tu va dona a el, Pu?”

“Me va dona a el un Vaso Usosa per Teni Cosas En Lo, e me ia vole demanda a tu —”

“Lo es esta?” Buo dise, e prende lo de la pedeta de Pu.

“Si, e me ia vole demanda a tu —”

“Algun ia teni miel en lo,” Buo dise.

“On pote teni cualce cosa en lo,” Pu dise seria. “En tal modo lo es Multe Usosa. E me ia vole demanda a tu —”

“Tu va debe scrive ‘Un Anversario Felis’ sur lo.”

Acel es lo cual me ia vole demanda a tu,” Pu dise. “Car mea spele es Coxeante. Lo es bon spele ma lo Coxea, e la leteras vade a locas noncoreta. Esce tu ta scrive ‘Un Aniversario Felis’ sur lo, per me?”

“Lo es un jar amable,” Buo dise regardante lo tota a sirca. “Esce ance me ta pote dona lo? De ambos de nos?”

“No,” Pu dise. “Acel no ta es un bon idea. Aora, prima me va limpi mera lo, e a pos tu pote scrive sur lo.”

Bon, el limpi la jar, e seci lo, en cuando Buo leca la apico de sua lapís, e demanda a se como on spele ‘aniversario’.

“Esce tu pote leje, Pu?” el demanda alga ansiosa. “Estra mea porte on ave un nota sur bateta e sona, cual Cristofer Robin ia scrive. Tu ia pote leje lo?”

“Cristofer Robin ia informa me sur lo cual lo dise, e alora me ia pote.”

“Bon, me va informa tu sur lo cual esta dise, e alora tu va pote.”

Alora Buo scrive… e esta es la scriveda:

ARNIR VER FELLESAFE UNLISO.

Pu regarda amirante.

“Me dise sola ‘Un Aniversario Felis’,” Buo dise sin atende.

“Lo es amable longa,” Pu dise multe impresada par lo.

“Bon, en fato, natural, me dise ‘Un Aniversario Multe Felis con amia de Pu.’ Natural, dise un cosa longa como esta consuma alga multe de lapís.”

“O, me comprende,” Pu dise.

En cuando tota de esta aveni, Porceta ia reveni a sua propre casa per trae la balon de I-aa. El abrasa multe streta lo, afin lo no va sofla a via, e el core tan rapida como el pote per ateni I-aa ante Pu; car el pensa ce el vole es la prima ci dona un donada, esata como si el ia ta pensa a lo sin avisa de cualcun. E corente a longo e pensante como plaseda I-aa va es, el no atende do el vade … e subita el pone sua pedeta en un buco de coneo, e cade plata a basa sur sua fas.

PUM!!!???***!!!

Porceta reclina alá, demandante a se cual ia aveni. Prima el pensa ce tota la mundo ia esplode; e a pos el pensa ce cisa la esplodeda es sola la parte cual conteni la Foresta; e alora el pensa ce lo es sola el mesma, e el es aora solitar sur la luna o en alga loca, e va vide nunca Cristofer Robin o Pu o I-aa denova. E alora el pensa, “Bon, an si me es sur la luna, me no nesesa ave mea fas a basa tra tota la tempo,” e pos acel el sta cauta se e regarda sirca se.

El es ancora en la Foresta!

“O, acel es comica,” el pensa. “Me demanda a me cual la pum ia es. Me no ia pote crea un tal ruido mera par cade. E do es mea balon? E cual acel peso peti de trapo umida fa?”

Lo es la balon!

“Ai, ai!” Porceta dise. “Ai, ai, ai-eli-ai! Ma, aora lo es tro tarda, me no pote revade, e me no ave un otra balon, e cisa I-aa no gusta balones tan vera multe.”

Alora el continua trota, aora alga triste, e el desende acel lado de la rio do I-aa es, e clama a el.

“Bon matina, I-aa,” Porceta cria.

“Bon matina, Porceta Peti,” I-aa dise. “Si lo es un bon matina,” el dise. “Un cosa cual me duta,” el dise. “No car lo ta importa,” el dise.

“Multe felisia a tu per la dia,” Porceta dise, veninte a plu prosima.

I-aa para regarda se sur la rieta, e turna per fisa Porceta par sua oios.

“Per favore, dise lo denova,” el dise.

“Multe fel—”

“Un momento!”

Ecuilibrante sur tre pedes, el comensa leva multe cauta sua pede cuatro a sua orea. “Me ia fa esta ier,” el esplica, cuando el cade a la ves tre. “Lo es intera fasil. Afin me va oia plu bon… Bon, acel ia fa lo! Aora, cual tu ia vade a dise?” El presa sua orea a ante con sua ungula.

“Multe felisia a tu per la dia,” Porceta dise denova.

“Lo sinifia me?”

“Natural, I-aa.”

“Mea aniversario?”

“Si.”

“Me ave un aniversario real?”

“Si, I-aa, e me ia porta un donada a tu.”

I-aa prende sua ungula destra a basa de sua orea destra, turna se, e con difisilia grande el leva sua ungula sinistra.

“Me debe oia lo ance con la otra orea,” el dise. “Bon, aora.”

“Un donada,” Porceta dise multe forte.

“Sinifiante me denova?”

“Si.”

“Mea aniversario ancora?”

“Natural, I-aa.”

“Me ave ancora un aniversario real?”

“Si, I-aa, e me ia porta a tu un balon.”

Balon?” I-aa dise. “Tu ia dise balon? Un de la cosas, grande e colorosa, cual on pleni con aira? Joia, canta e dansa de así a alá?”

“Si, ma me teme – me es multe triste, I-aa – ma cuando me ia es corente a longo per porta lo a tu, me ia cade.”

“O, tan nonfortunosa! Tu ia core tro rapida, me suposa. Tu no ia feri tu, Porceta Peti?”

“No, ma me – me – o, I-aa, me ia esplode la balon!”

On ave un silentia vera longa.

“Mea balon?” I-aa dise a fini.

Porceta acorda con testa.

“Mea balon de aniversario?”

“Si, I-aa,” Porceta dise pico ensoflante. “Lo es así. Multe – multe felisia a tu per la dia.” E el dona a I-aa la peso peti de trapo umida.

“Lo es esta?” I-aa dise, pico surprendeda.

Porceta acorda con testa.

“Mea donada?”

Porceta acorda denova.

“La balon?”

“Si.”

“Grasias, Porceta,” I-aa dise. “Me espera ce tu no desaproba mea demanda,” el continua, “ma cual color esta balon ia ave cuando lo – cuando lo ia es un balon?”

“Roja.”

“Me ia demanda mera a me… Roja,” el murmura a se. “Mea color favoreda… Como grande lo ia es?”

“Sirca tan grande como me.”

“Me ia demanda mera a me… Sirca tan grande como Porceta,” el dise triste a se. “Mea grandia favoreda. Bon, bon.”

Porceta senti multe misera, e el sabe no cosa per dise. El es ancora abrinte sua boca per dise alga cosa, e alora desidente ce dise acel no ta es bon, cuando el oia un cria de la otra lado de la rio, e alá es Pu.

“Multe felisia a tu per la dia,” Pu clama, oblidante ce el ia dise ja lo.

“Grasias, Pu, me esperia lo,” I-aa dise sombre.

“Me ia porta a tu un donada peti,” Pu dise ajitada.

“Me ave ja,” I-aa dise.

Pu ia salpica aora tra la rieta a I-aa, e Porceta senta pico distante con sua testa en la pedetas, ensoflante a se.

“Lo es un Vaso Usosa,” Pu dise. “Lo es así. E lo ave ‘Un Aniversario Multe Felis con amia de Pu’ scriveda sur se. Acel es lo cual tota la scriveda es. E lo es per pone cosas en lo. Alá!”

Cuando I-aa vide la vaso, el deveni multe stimulada.

“Bon!”, el dise. “Me crede ce mea balon cabe esata a acel Vaso!”

“O, no, I-aa,” Pu dise. “Balones es multe tro grande per vade en Vasos. La ata cual on fa con un balon, es ce on teni la balon —”

“No la mea,” I-aa dise orgulosa. “Regarda, Porceta!” E cuando Porceta regarda triste a sirca, I-aa prende la balon par sua dentes, e pone lo atendente en la vaso; prende lo a estra e pone lo sur la tera; e a pos el prende lo denova e pone atendente lo a en.

“Tal lo fa!” Pu dise. “Lo vade a en!”

“Tal lo fa!” Porceta dise. “E lo veni a estra!”

“Vera, no?” I-aa dise. “Lo vade a en e veni a estra como la cosa la plu bon.”

“Me es multe contente,” Pu dise felís, “car me ia pensa a dona a tu un Vaso Usosa per pone cosas en lo.”

“Me es multe contente,” Porceta dise felís, “car me ia pensa a dona a tu Alga Cosa per pone en un Vaso Usosa.”

Ma I-aa no escuta. El prende la balon a estra, e pone lo a en denova, tan felís como posible…


“E me no ia dona cualce cosa a el?” Cristofer Robin ia demanda sombre.

“Natural tu ia fa lo,” me ia dise. “Tu ia dona a el – esce tu no recorda – un cosa peti – peti —”

“Me ia dona a el un caxa de pintas con cual el ta depinta cosas.”

“Lo ia es acel.”

“Percé me no ia dona lo a el a la matina?”

“Tu ia es tan ocupada par fini la prepara de sua selebra. El ia ave un torta con glasa a supra, e tre candelas, e sua nom en zucar ros, e —”

“Si, me recorda,” Cristofer Robin ia dise.

Esta paje es presentada con la lisensa CC Attribution-Share Alike 4.0 International.
Lo ia es automatada jenerada de la paje corespondente en la Vici de Elefen a 28 marto 2022 (10:41 UTC).