WINI-LA-PU
Capitol Prima · Capitol Du · Capitol Tre · Capitol Cuatro · Capitol Sinco · Capitol Ses · Capitol Sete · Capitol Oto · Capitol Nove · Capitol Des

Capitol Des

En cual Cristofer Robin dona un Selebra de Pu, e nos dise adio

A un dia cuando la sol ia reveni supra la Foresta, traente con se la parfum de maio, e tota la rietas de la Foresta tintina felís per retrova sua propre forma beleta, e la stanges peti reposa soniante a la vive cual los ia vide e a la cosas grande cual los ia fa, e en la caldia e cuietia de la Foresta la cucu proba atendente sua vose e escuta lo per sabe esce lo plase, e pijones de bosce cexa jentil a lunlotra en sua modo pigra e comfortosa ce la otra es la culpable, ma lo no es multe importante; a un dia como esta Cristofer Robin sibila en un modo spesial cual el ave, e Buo veni volante de la Foresta de Cuatrodes Ectares per vide cual es desirada.

“Buo,” Cristofer Robin dise, “me va dona un selebra.”

“Tu va, si?” Buo dise.

“E lo va es un selebra de un spesie noncomun, car nos va selebra la cosa cual Pu ia fa, cuando el ia fa lo cual el ia fa cuando el ia salva Porceta de la inonda.”

“O, acel es la razona, si?” Buo dise.

“Si. Esce tu va informa Pu tan rapida como posible, e tota la otras, car lo va aveni doman?”

“O, lo va, si?” Buo dise, ancora tan aidosa como posible.

“Donce esce tu va vade e dise a los, Buo?”

Buo atenta trova alga cosa multe saja per dise, ma el no pote, donce el vola a via per informa la otras. E la person prima a ci el dise es Pu.

“Pu,” el dise, “Cristofer Robin va dona un selebra.”

“O!” Pu dise. E a pos, vidente ce Buo espeta ce el dise alga plu, el dise, “Esce on va ave acel cosas peti tortin con glasa de zucar ros?”

Bu senti ce parla sur cosas peti tortin con glasa de zucar ros ta degrada el, donce el dise a Pu esata lo cual Cristofer Robin ia dise, e vola a via a I-aa.

“Un selebra per Me?” Pu pensa a se. “Tan grandiosa!” E el comensa demanda a se esce tota la otra animales sabe ce lo es un Selebra spesial de Pu, e esce Cristofer Robin ia dise a los sur La Urso Flotante e La Serebro de Pu e la otra barcones merveliosa cual el ia inventa e gida, e el comensa pensa como asustante lo ta es si cadun ia ta oblida esta cosas, e nun ta sabe vera perce on selebra; e plu el pensa como esta, plu la selebra deveni confusada en sua mente, como un sonia do no cosa funsiona coreta. E la sonia comensa sona en la testa de Pu asta cuando lo deveni un tipo de canta. Lo es un

CANTA DE PU ANSIOSA

3 crias per nosa amí!
(Per ci?)
Per Pu así –
(Par alga ata, si?)
Un ata plu bon ca come tota la bri:
El ia salva sua amí de la moia!
3 aclamas per la Urso!
(En acel curso?)
Si, per la Urso –
Flotante como un boia
Pu ia salva el sin convoia!
(Ma como el ia osa?)
U tan curiosa!
Me parla sur Pu, la corajosa –
(Sur cual cosa?)
Sur Pu corajosa!
(Pardona, me no ia oia!)
Pu es un Urso de Serebro Jigante –
(Estravagante?)
De serebro jigante –
(Esta es conoseda?)
Bon. El no ave multe eda,
E a veses concluis es perdeda,
Ma el ia susede naviga
a do la situa ia obliga
(Donce no intera voleda?)
Si, sur un jar vacua de comeda –
Alora, ta ce nos fa tre crias zelosa
(Ta ce nos fa tre crias de cual natur?)
E espera a el multe anios fortunosa,
E crese en ricia e sajia matur!
3 crias per nosa amí!
(Per ci?)
Per Pu así –
3 aclamas per la Urso!
(En acel curso?)
Si, per la Urso –
3 crias per Pu, stonante con sua bravata!
(Per favore dise a me – PAR CUAL ATA?)

En cuando esta continua en la interna de Pu, Buo parla a I-aa.

“I-aa,” Buo dise, “Cristofer Robin va dona un selebra.”

“Multe interesante,” I-aa dise. “Me suposa ce los va envia a me la dejetadas cual on ia crase su pede. Amable e Pensosa. Sin problem, no grasia nos!”

“Me ave un Invita per tu.”

“Como lo sabori?”

“Un Invita!”

“Si, me ia oia tu. Ci ia cade lo?”

“Esta no es per come, lo demanda ce tu veni a la selebra. Doman.”

I-aa nega lenta con testa.

“Tu intende Porceta. La joven peti con oreas stimulada. Acel es Porceta. Me va dise a el.”

“No, no,” Buo dise, ja alga esijente. “Lo intende tu!”

“Tu es serta?”

“Natural me es serta. Cristofer Robin ia dise ‘Tota de los! Dise a tota de los.’”

“Tota de los, con eseta de I-aa?”

“Tota de los,” Buo dise malumorosa.

“A!” I-aa dise. “Un era, sin duta, ma an tal, me va veni. Ma no culpa me, si lo pluve.”

Ma lo no pluve. Cristofer Robin ia crea un table longa de alga pesos longa de lenio, e tota de los senta sirca lo. Cristofer Robin senta a un fini, e Pu senta a la otra fini, e entre los Buo, I-aa e Porceta senta a un lado, e Coneo, Ru e Canga a la otra lado. E tota la amís e relatadas de Coneo sperde se a sirca sur la erba, e es esperosa espetante per caso ce algun parla a los o cade alga cosa o demanda a los sur la ora.

Per Ru esta es la selebra prima de sempre, e el es vera stimulada. Pronto cuando los ia senta se, el comensa parla.

“Alo, Pu!” el pipi.

“Alo, Ru!” Pu dise.

Ru salta a supra e su sur sua seja per un pico de tempo, e a pos el comensa denova.

“Alo, Porceta!” el pipi.

Porceta saluta con pedeta, car el es tro ocupada per dise alga cosa.

“Alo, I-aa!” Ru dise.

I-aa acorda sombre con testa. “Lo va pluve pos corta, como tu va vide si tu espeta pico,” el dise.

Ru espeta pico, ma el no vide, donce el dise “Alo, Buo!” – e Buo dise “Alo, mea camerada peti,” en un modo jentil, e continua sua nara a Cristofer Robin sur un asidente cual ia aveni cuasi a un ami ci Cristofer Robin no conose, e Canga dise a Ru, “Bevi prima tua lete, cara, e parla a pos.” Alora Ru, ci es bevinte sua lete, atenta dise ce el pote fa ambos cosas simultan… e debe es colpetada sur la dorso e secida per un tempo alga longa a pos.

Cuando tota de los ia come cuasi sufisinte, Cristofer Robin bateta la table con sua culier, e cadun para sua parla e es multe cuieta, con eseta de Ru ci veni de fini un ataca forte de ica e atenta finje ce la icor es un de la relatadas de Coneo.

“Esta selebra,” Cristofer Robin dise, “es un selebra per un cosa cual algun ia fa, e tota de nos sabe ci el es, e esta selebra pertine a el, par lo cual el ia fa, e me ave un donada per el, e lo es así.” Alora el xerca pico a sirca e xuxa, “Do es lo?”

En cuando el es xercante, I-aa fa un tose impresante e comensa parla.

“Amis,” el dise, “incluinte stranjeres, lo es un plaser grande, o cisa me ta debe dise ce lo ia es un plaser asta aora, ce me vide vos a mea selebra. Lo cual me ia fa ia es no cosa. Cualcun de vos – con esetas de Coneo e Buo e Canga – ia ta fa la mesma. O, e Pu. Natural mea comentas no pertine a Porceta e Ru, car los es tro peti. Cualcun de vos ia ta fa la mesma. Ma acaso lo ia es Me. Lo no ia es, me nesesa apena dise, con un intende de oteni la cosa cual Cristofer Robin es aora xercante” – e el pone sua pede fronte sur sua boca e dise con un xuxa forte, “Proba su la table” – “ce me ia fa lo cual me ia fa – ma car me senti ce tota de nos debe fa lo cual nos pote per aida, me senti ce tota de nos debe —”

“I-ic!” Ru dise acaso.

“Ru, cara!” Canga dise reproxante.

“Lo ia es me?” Ru demanda, pico surprendeda.

“Sur cual I-aa es parlante?” Porceta xuxa a Pu.

“Me no sabe,” Pu dise alga despiritida.

“Me ia crede ce esta es tua selebra.”

“Me ia crede tal a un ves pasada. Ma me suposa ce lo no es.”

“Me ta prefere la tua ca lo de I-aa,” Porceta dise.

“Ance me,” Pu dise.

“I-ic!” Ru dise denova.

“COMO – ME – VENI – DE – DISE,” I-aa dise forte e sever, “como me veni de dise cuando me ia es interompeda par Sonas Forte diversa, me senti ce —”

“Así lo es!” Cristofer Robin cria stimulada. “Dona lo a Pu vea fol. Lo es per Pu.”

“Per Pu?” I-aa dise.

“Natural lo es. La urso la plu bon en tota la mundo.”

“Me ia ta debe sabe,” I-aa dise. “Pos tota, me no pote cexa. Me ave mea amís. Algun ia parla a me tan resente como ier. E cisa en la semana presedente o en la semana a ante Coneo ia colpa me e ia dise ‘Txa!’ La Ronda Sosial. Sempre alga cosa aveni.”

Nun escuta, car tota de los es disente, “Abri lo, Pu!” “Cual lo es, Pu?” “Me sabe cual lo es,” “No, tu no sabe,” e otra comentas aidosa de tal spesie. E natural Pu abri lo tan rapida como posible sin rompe la cordeta, car on sabe nunca cuando un pico de cordeta va es Usosa. A fini lo es abrida.

Cuando Pu vide cual lo es, el cade cuasi, car el es tan plaseda. Lo es un Porta-lapis Spesial. On ave lapises indicada con “B” (Brava), e lapises indicada con “HB” (He, Brava), e lapises indicada con “BB” (Bon Barcor). On ave un cotel per agi la lapises, e un goma per cansela cualce cosa cual on ia spele noncoreta, e un regla per regli la linias sur cual la parolas pote pasea, e sentimetres indicada sur la regla per caso ce on va vole sabe cuanto sentimetres alga cosa ave, e Lapises Blu e Lapises Roja e Lapises Verde per dise cosas spesial en blu e en roja e en verde. E tota esta cosas encantante es en sua propre poxes peti en un Caxa Spesial cual clui con un clica cuando on clica lo. E tota de los es per Pu.

“O!” Pu dise.

“O, Pu!” cadun dise, con eseta de I-aa.

“Grasias!” Pu ronci.

Ma I-aa dise a se, “Esta eserse de scrive. Lapises e ci-sabe-cual. Supravaluada, si on demanda de me. Fol. No sustantia.”

Plu tarda, cuando tota de los ia dise “Asta revide” e “Grasias” a Cristofer Robin, Pu e Porceta pasea pensosa a junta a casa en la sera oro, e tra un tempo longa los es cuieta.

“A tua velia a matina, Pu,” Porceta dise final, “cual es la cosa prima cual tu dise a tu?”

“Cual on ave per come de matina?” Pu dise. “Cual tu dise, Porceta?”

“Me dise: cual cosa stimulante va aveni oji?” Porceta dise.

Pu acorda pensosa con testa.

“Acel es la mesma cosa,” el dise.


“E cual ia aveni?” Cristofer Robin ia demanda.

“Cuando?”

“A la matina seguente.”

“Me no sabe.”

“Esce tu ta pote pensa, e raconta a me e Pu a alga ves?”

“Si tu ta desira lo vera multe.”

“Pu desira,” Cristofer Robin dise.

El ia fa un suspira profonda, ia prende sua urso a la gama e ia pasea a via a la porte, tirante Wini-la-Pu pos se. A la porte el ia turna e dise, “Esce tu veni per regarda mea bani?”

“Cisa,” me ia dise.

“Esce la caxa de lapises de Pu ia es plu bon ca la mea?”

“Lo ia es esata la mesma,” me ia dise.

El ia acorda con testa, e ia sorti, … e pos un momento me ia oia Wini-la-Pu – pum, pum, pum – asendente la scalera pos el.

Esta paje es presentada con la lisensa CC Attribution-Share Alike 4.0 International.
Lo ia es automatada jenerada de la paje corespondente en la Vici de Elefen a 28 marto 2022 (10:41 UTC).