WINI-LA-PU
Capitol Prima · Capitol Du · Capitol Tre · Capitol Cuatro · Capitol Sinco · Capitol Ses · Capitol Sete · Capitol Oto · Capitol Nove · Capitol Des

Capitol Nove

En cual Porceta es intera ensircada par acua

Lo pluve e lo pluve e lo pluve. Porceta dise a se ce nunca en sua vive – e ci sabe cuanto anios el ave: tre, cisa, o cuatro? – el ia vide nunca tan multe pluve. Tra dias e dias e dias.

“Si sola,” el pensa, cuando el regarda a estra tra la fenetra, “me ia ta es en la casa de Pu, o la casa de Cristofer Robin, o la casa de Coneo cuando lo ia comensa pluve, alora me ia ta ave Acompania tra tota de esta tempo, en loca de es así intera solitar, con no cosa per fa estra demanda a me cuando lo va fini.” E el imajina se con Pu e se en dise, “Esce tu ia vide un tal pluve a cualce ves, Pu?” e Pu en dise, “Esce lo no es asustante, Porceta?” e Porceta en dise, “Me demanda a me como lo vade a Cristofer Robin,” e Pu en dise, “Coneo vea povre es aora probable espulsada de sua casa par la inonda.” Parla en esta modo ia ta es felís, e vera, on ta ave no benefica en alga cosa stimulante como inondas, si on no ta pote comparti los con algun.

Car lo es alga stimulante. La fosos peti e seca en cual Porceta ia nasi tan frecuente ia deveni rietas, la rietas peti tra cual el ia plufi es aora rios, e la rio, de cual los ia jua tan felís entre sua rivas presipe, ia estende a via de sua propre leto e prende aora tan multe spasio en cada loca, ce Porceta comensa pensa a se esce lo va veni pronto en la leto de el.

“Lo es pico Ansiosa,” el dise a se, “cuando on es un Animal Multe Peti e Intera Ensircada par Acua. Cristofer Robin e Pu ta pote evade par Trepa Arbores, e Canga ta pote evade par Salta, e Coneo ta pote evade par Tuneli, e Buo ta pote evade par Vola, e I-aa ta pote evade par – par Fa un Ruido Forte Asta es Salvada, e así me es, ensircada par acua e me pote fa no cosa.”

Lo continua pluve, e a cada dia la acua leva se pico plu, e aora lo ateni cuasi la fenetra de Porceta… e ancora el no ia fa cualce cosa.

“On ave Pu,” el pensa a se. “Pu no ave multe Serebro, ma el causa nunca alga dana. El fa cosas fol ma los fini bon. On ave Buo. Buo no es vera Intelijente, ma el Sabe Cosas. El ta sabe la Cosa Coreta per Fa cuando Ensircada par Acua. On ave Coneo. El no ia Aprende par Libros, ma el pote sempre Trova un Scema Astuta. On ave Canga. El no es Astuta, Canga no es, ma el ta es tan ansiosa sur Ru ce el ta fa un Bon Ata sin pensa a lo. E alora on ave I-aa. E a cualce caso I-aa es tan misera ce el no ta cura. Ma me demanda a me cual Cristofer Robin ta fa?”

Alora subita el recorda un nareta cual Cristofer Robin ia raconta a el sur un om a un isola abandonada ci ia scrive alga cosa en un botela e ia lansa lo en la mar; e Porceta pensa ce si el scrive alga cosa en un botela e lansa lo en la acua, cisa algun va veni e salva el!

El parti de la fenetra e comensa foraje en sua casa, en tota la parte cual no es en la acua, e a fini el trova un lapís e un peso peti de paper seca, e un botela con un tapo per lo. E el scrive sur un lado de la paper:

AIDA!
PORCIT (ME)

e sur la otra lado:

ME PORCIT, AIDA AIDA!

A pos el pone la paper en la botela, tapi tan streta como posible la botela, e el apoia a estra sua fenetra a tan distante como el pote apoia sin cade, e el lansa la botela a tan distante como el pote lansa – pluf! – e pos un momento lo reapare denova sur la acua; e el regarda la botela cual flota lenta a via en la distantia, asta cuando sua oios dole de regarda, e a veses el pensa ce lo es un botela, e a veses el pensa ce lo cual el trasa es mera un ondeta sur la acua, e alora, subita, el sabe ce el va vide lo nunca denova e ce el ia fa tota cual el ia pote per salva se.

“Donce aora,” el pensa, “alga otras va debe fa alga cosa, e me espera ce los va ata pronto, car en otra modo me va debe nada, cual me no sabe fa, donce me espera ce los va ata pronto.” E el fa un suspira multe longa e dise, “Me desira ce Pu ta es así. Lo ta es tan multe plu amin en duple.”


Cuando la pluve comensa, Pu es dorminte. Lo pluve, e lo pluve, e lo pluve, e el dormi, e el dormi, e el dormi. El ia ave un dia fatigante. Tu recorda como el ia descovre la Palo Norde; bon, el ia es tan orgulosa par esta, ce el ia demanda a Cristofer Robin esce on ave alga plu Palos, tal ce un Urso con Poca Serebro va pote descovre.

“On ave un Palo Sude,” Cristofer Robin ia dise, “e me espeta ce on ave un Palo Este e un Palo Ueste, an si on no gusta parla sur los.”

Pu ia es multe ajitada pos oia esta, e el ia sujesta ce los va debe fa un Faxa de Splora per descovre la Palo Este, ma Cristofer Robin ia pensa a alga otra cosa per fa con Canga; donce Pu ia vade per descovre mesma la Palo Este. Me ia oblida esce el ia descovre o no ia descovre lo; ma el ia es tan fatigada cuando el ia reveni a casa ce, an en la media de sua come de sera, pos cuando el ia come tra pico plu ca un dui de ora, el ia adormi rapida en sua seja, e el ia dormi, dormi, e dormi.

Alora subita el es soniante. El es a la Palo Este, e acel es un palo multe fria con neva e jelo de la spesie la plu fria sur tota de lo. El ia trova un aberia per dormi en lo, ma lo no ave spasio per la gamas, donce el ia lasa los a estra. E Mosteles Savaje, tal cual abita a la Palo Este, veni e rode tota la pelo a via de la gamas de el per Nidi sua Jovenes. E plu multe los rode, plu fria sua gamas deveni, asta cuando el velia subita con un Au! – e alá el es, sentante en sua seja con sua pedes en la acua, e acua tota sirca el!

El pasea salpicosa a sua porte e regarda a estra…

“Esta es Seria,” Pu dise. “Me debe fa un Fuji.”

Donce el prende sua jar la plu grande, plen de miel, e fuji con lo a sur un ramo larga de sua arbor, bon supra la acua, e a pos el trepa denova a su e fuji con un otra jar … e cuando tota la Fuji es finida, on ave Pu ci senta sur sua ramo e pende sua gamas, e alá, a lado de el, on ave des jares de miel…

Pos du dias, on ave Pu ci senta sur sua ramo e pende sua gamas, e alá, a lado de el, on ave cuatro jares de miel.

Pos tre dias, on ave Pu ci senta sur sua ramo e pende sua gamas, e alá, a lado de el, on ave un jar de miel.

Pos cuatro dias, on ave Pu…

E a la matina de la dia cuatro, la botela de Porceta veni, pasante el en flota, e con un cria forte de “Miel!” Pu tufa en la acua, saisi la botela, e luta denova a sua arbor.

“Txa!” Pu dise, cuando el abri lo. “Tota la moia per no resulta. Un peso de paper, percé?”

El prende lo a estra e regarda lo.

“Lo es un Misaje,” el dise a se, “acel lo es. E acel letera es un P, e ance acel, e ance acel, e P sinifia ‘Pu’, donce lo es un Misaje multe importante a me, e me no pote leje lo. Me debe trova Cristofer Robin o Buo o Porceta, un de la Lejores Intelijente ci pote leje cosas, e los va dise a me lo cual esta misaje sinifia. An tal, me no pote nada. Txa!”

Alora un idea veni a el, e me opina ce per un Urso de Serebro Vera Poca, lo es un bon idea. El dise a se: “Si un botela pote flota, ance un jar pote flota, e si un jar flota, me pote senta sur lo, si lo es un jar multe grande.”

Donce el prende la jar la plu grande e tapi lo.

“Tota barcos debe ave un nom,” el dise, “donce me va nomi la mea La Urso Flotante.” E con esta parolas el lasa ce sua barco cade en la acua, e el salta a en pos lo.

Per alga tempo Pu e La Urso Flotante no es serta ci de los debe es a alta, ma pos proba un o du posas diferente, los calmi con La Urso Flotante a basa e Pu montante lo como vinsor, enerjiosa reminte con sua pedes.


Cristofer Robin ia abita a la loca la plu alta de la Foresta. Lo ia pluve, e lo ia pluve, e lo ia pluve, ma la acua no ia ateni la casa de el. Regarda a su en la vale e vide la acua tota sirca se ia es felis, ma lo ia pluve tan forte ce el ia resta en casa tra la plu tempo, e ia pensa a cosas. A cada matina el ia sorti con sua para-pluve e ia pone un basteta en la loca a cual la acua ia leva, e a cada matina seguente el ia sorti e no ia pote vide ancora sua basteta, donce el ia pone un otra basteta en la loca a cual la acua ia leva, e a pos el ia pasea denova a casa, e a cada matina el ia pasea tra un distantia plu corta ca el ia fa a la matina presedente. A la matina de la dia sinco el ia vide la acua tota sirca se, e el ia sabe ce a la ves prima en sua vive el ia es sur un isola vera. Esta ia es multe stimulante.

Lo ia es a esta matina cuando Buo veni volante supra la acua e dise “Bon dia!” a sua ami Cristofer Robin.

“Alo, Buo,” Cristofer Robin dise, “esce lo no es divertinte? Me es sur un isola!”

“La states atmosferal ia es resente multe nonfavorente,” Buo dise.

“La cual?”

“Lo ia pluve,” Buo esplica.

“Si,” Cristofer Robin dise. “Lo ia fa.”

“La nivel de inonda ia ateni un altia nonpresededa.”

“La ci?”

“On ave multe acua a sirca,” Buo esplica.

“Si,” Cristofer Robin dise, “on ave.”

“An tal, la prevides deveni rapida plu favorente. Pos corta —”

“Tu ia vide Pu?”

“No. Pos corta —”

“Me espera ce el vade bon,” Cristofer Robin dise. “Me ia es demandante a me sur el. Me espeta ce Porceta es con el. Esce tu pensa ce los vade bon, Buo?”

“Me espeta tal. Ma, pos corta —”

“Per favore, vade e regarda, Buo! Car Pu no ave multe serebro, e el va pote fa alga cosa fol, e me ama el tan multe, Buo. Tu comprende, Buo?”

“Multe bon,” Buo dise. “Me va vade, e va reveni direta.” E el vola a via.

Pos un tempo corta el ia reveni.

“Pu no es alá,” el dise.

“No alá?”

“El ia es alá. El ia senta sur la ramo de sua arbor estra sua casa con nove jares de miel. Ma aora el no es alá.”

“O, Pu!” Cristofer Robin cria. “Do tu es?”

“Me es así,” un vose roncinte dise pos los.

“Pu!”

Los freta a la brasos de lunlotra.

“Como tu ia veni así, Pu?” Cristofer Robin demanda, cuando el es preparada per parla denova.

“Sur mea barco,” Pu dise orgulosa. “Me ia reseta un Misaje Multe Importante, enviada a me en un botela, e car me ia ave acua en mea oios, me no ia pote leje lo, donce me ia trae lo a tu. Sur mea barco.”

Con esta parolas orgulosa el dona la misaje a Cristofer Robin.

“Ma esta es de Porceta!” Cristofer Robin cria pos leje lo.

“Lo conteni no cosa sur Pu?” Urso dise, regardante supra la spalas de Cristofer Robin.

Cristofer Robin leje la mesaje a vose.

“O, esce acel Ps es Porcetas? Me ia pensa ce los es Pus.”

“Nos debe salva el instante! Me ia crede ce el es con tu, Pu. Buo, esce tu pote salva el sur tua dorso?”

“Me no crede tal,” Buo dise pos pensa seria. “Lo es dutable esce la musculos dorsal nesesada —”

“Alora esce tu va vola instante a el e dise ce la Salva va Veni? E Pu e me va pensa per un Salva e veni tan rapida como posible. O, no parla, Buo, vade rapida! E, ancora pensante a alga cosa per dise, Buo vola a via.

“Bon alora, Pu,” Cristofer Robin dise, “do es tua barco?”

“Me ta debe dise,” Pu esplica en cuando los pasea a su a la costa de la isola, “ce acel no es mera un barco de la spesie normal. A alga veses lo es un Barco, e a alga veses lo es un Asidente. Lo depende intera.”

“Depende de cual?”

“Sur esce me es a sur o a su.”

“O! Bon, do lo es?”

“Alá!” Pu dise, orgulosa indicante La Urso Flotante.

Lo no es como Cristofer Robin ia espeta, e plu el regarda lo, plu el pensa ce Pu es un Urso tan Corajosa e Intelijente, e plu Cristofer Robin pensa a esta, plu Pu basi modesta sua regarda a la nas e atenta finje ce el no es tal.

“Ma lo es tro peti per du de nos,” Cristofer Robin dise triste.

“Tre de nos con Porceta.”

“Acel fa ce lo es an plu peti. O, Urso Pu, cual nos va fa?”

E alora esta Urso, Urso Pu, Wini-la-Pu, A.D.P. (Ami de Porceta), C.D.C. (Camerada de Coneo), D.D.P. (Descovror de Palo), C.D.I. e T.D.C. (Comfortor de I-aa e Trovor de Coda) – en fato Pu mesma – dise alga cosa tan intelijente ce Cristofer Robin pote sola regarda el con boca abrida e oios fisada a el, demandante a se esce esta es vera la Urso de Serebro Vera Poca, ci el ia conose e ama tan longa.

“Nos ta pote vade en tua para-pluve,” Pu dise.

”?”

“Nos ta pote vade en tua para-pluve,” Pu dise.

”??”

“Nos ta pote vade en tua para-pluve,” Pu dise.

”!!!!!!”

Car Cristofer Robin comprende subita ce los ta pote. El abri sua para-pluve e fa ce lo flota inversada sur la acua. Lo flota ma bambola. Pu entra. El es a punto de dise ce tota vade aora bon, cuando el trova ce lo no vade tal, donce pos un bevi peti, cual el no ia desira real, el revada a Cristofer Robin. A pos ambos de los entra en junta, e lo no bambola plu.

“Me va nomi esta barco La Serebro de Pu,” Cristofer Robin dise, e La Serebro de Pu comensa direta naviga en un dirije sude-ueste, fasil jirante.

On pote imajina la joia de Porceta cuando, a fini, la barco ia veni en sua vista. En la anios a pos, el ia gusta pensa ce el ia es en un Peril Multe Grande en la Inonda Asustante, ma la sola peril, en cual el ia es vera, ia es la dui-de-ora final de sua prisoni, cuando Buo, pronto pos sua ariva, ia senta sur un ramo de la arbor de Porceta per consola el, e ia fa a el un nara multe longa sur un tia ci ia pone acaso un ovo de un gavota, e la nara ia continua e continua, a alga grado como esta frase, asta cuando Porceta, ci ia escuta de sua fenetra sin multe espera, ia comensa dormi cuieta e natural, lenta liscante a estra la fenetra en dirije a la acua asta cuando el ia pende par sola sua ditos de pede, a cual momento, fortunosa, un cria forte e subita par Buo – en fato un parte de la nara, un cosa cual la tia dise – ia velia Porceta, donante a el tempo per aranca se a la securia denova e dise, “Tan interesante, esce el ia fa?” cuando – bon, on pote imajina la joia de Porceta, cuando el vide final la bon barco, La Serebro de Pu (Capitan, C. Robin; Ofisior prima, W. Pu) cual ia veni sur la mar per salva el…

E car esta es vera la fini de la nara, e me es multe fatigada pos acel frase ultima, me pensa ce me va para así.

Esta paje es presentada con la lisensa CC Attribution-Share Alike 4.0 International.
Lo ia es automatada jenerada de la paje corespondente en la Vici de Elefen a 28 marto 2022 (10:41 UTC).