WINI-LA-PU
Capitol Prima · Capitol Du · Capitol Tre · Capitol Cuatro · Capitol Sinco · Capitol Ses · Capitol Sete · Capitol Oto · Capitol Nove · Capitol Des

Capitol Du

En cual Pu vade per visita e deveni fisada

A un dia, Eduardo Urso, nomida Wini-la-Pu (o corta Pu) par sua amís, pasea tra la Foresta e zumbi orgulosa a se. El ia composa un zumbi peti en acel matina, en cuando el ia fa sua Eserses de Magri ante la vitro: Tral-lal-la, tral-lal-la, cuando el estende se a tan alta como el pote, e alora tral-lal-la, tral-lal – o, aida! – la, cuando el atenta ateni sua ditos de pede. Pos la come de matina el ia dise lo denova e denova a se mesma asta cuando el ia aprende lo intera de memoria, e aora el zumbi lo a tra, coreta. Lo vade como esta:

Tral-lal-la, tral-lal-la,
Tral-lal-la, tral-lal-la,
Ran-tan-ti-li-tan-dan,
Ti-li-dan-ti-li-ran-tan,
Ti-li-dan-ti-li-ran-tan,
Ran-tan-ti-li-dan-tan.

Bon, el es zumbinte esta a se, joiosa paseante a ante, e el demanda a se, cual cadun de la otras fa aora, e como el ta senti si el ta es algun otra. Subita el veni a un colineta arenin, e en la colineta el vide un buco grande.

“Ahá!” Pu dise. (Ran-tan-ti-li-dan-tan.) “Si me sabe alga cosa sur alga cosa, acel buco sinifia Coneo,” el dise, “e Coneo sinifia Acompania,” el dise, “e Acompania sinifia Come e Escuta-mea-zumbi e tal cosas. Ran-tan-ti-li-tan-dan.

Donce el inclina a su, pone sua testa en la buco, e clama:

“Algun es a casa?”

On ave un ruido subita scaramuxin en la buco, alora un silentia.

“Cual me ia dise, es ‘Algun es a casa?’” Pu clama multe forte.

“No!” un vose dise; e a pos lo ajunta: “Tu no nesesa clama tan forte. Me ia oia tu multe bon ja a la ves prima.”

“Iritante!” Pu dise. “Esce tota nun es así?”

“Nun.”

Wini-la-Pu tira sua testa a via de la buco, e pensa un pico, e el pensa: “Algun debe es alá, car algun ia dise ‘Nun’.” Donce el pone denova sua testa en la buco, e dise:

“Aló, Coneo, esce lo no es tu?”

“No,” Coneo dise, a esta ves con un vose diferente.

“Ma, lo es la vose de Coneo, no?”

“Me no opina tal,” Coneo dise. “Lo no ia es la intende.”

“O!” Pu dise.

El tira sua testa a via de la buco, e fa un considera nova, e alora el repone sua testa, e dise:

“Esce tu pote favore me e dise jentil, do Coneo es?”

“El ia vade per visita sua amí, Urso Pu, ci es un amí eselente de el.”

“Ma acel es Me!” Urso dise, multe surprendeda.

“Me – de cual spesie?”

“Urso Pu.”

“Serta?” Coneo dise, ancora plu surprendeda.

“Intera, intera serta,” Pu dise.

“O! Bon! Entra, per favore!”

Alora Pu puia, puia e puia sua via tra la buco, e a fini el veni a en.

“Tu ia dise intera coreta,” Coneo dise, regardante el de testa a pedes. “Lo es tu. Me es felís de vide tu.”

“A ci tu ia pensa?”

“Hmm, me no ia es serta. Tu sabe como on fa en la foresta. On no pote lasa ce cualcun veni a sua casa. On debe es cauta. Posible tu vole ave un pleni-boca de alga cosa?”

Pu gusta sempre un pico de alga cosa a la ora sete a la matina, e el es multe felís par vide ce Coneo estrae platos e tasones; e cuando Coneo dise “Miel o lete densida con tua pan?” el es tan ajitada ce el dise “Ambos,” e a pos, per no pare avar, el ajunta: “Ma no disturba tu per la pan, per favore.” E tra un tempo longa pos esta el dise no cosa … asta cuando a fini, zumbinte a se con un vose alga aderente, el asende, presa amante pedetas con Coneo, e dise ce el debe continua sua viaja.

“Tu debe?” Coneo dise cortes.

“Bon,” Pu dise, “Me ta pote resta pico plu longa si lo – si tu —” e el atenta multe forte regarda en la dirije de la saleta de comedas.

“En fato,” Coneo dise, “me vade direta a sorti.”

“O, bon. Donce me continua mea viaja. Asta revide!”

“Bon. Asta revide, si tu es serta ce tu no vole ave alga plu.”

“Tu ave alga plu?” Pu demanda rapida.

Coneo leva la covre-platos a supra e dise: “No, no cosa.”

“Me ia crede ce no,” Pu dise, acordante a se.

“Bon, asta revide. Me debe continua.”

Alora el comensa asende per sorti de la buco. El tira con sua pedetas fronte, e el puia con sua pedetas retro, e pos un momento sua nas es denova su sielo, en libria … e alora sua oreas … e alora sua pedetas fronte … e alora sua spalas … e alora —

“O, aida!” Pu dise. “Me ta debe vade a retro.”

“O, iritante!” Pu dise. “Me debe vade a fronte.”

“Me no pote fa la un o la otra!” Pu dise. “O, iritante!”

A esta tempo ance Coneo vole sorti per un pasea, e cuando el vide ce la porte fronte es plenida, el sorti tra la porte retro, e veni a sirca a Pu, e regarda el.

“Aló, tu es fisada?” el demanda.

“N-no,” Pu dise sin atende. “Me es mera reposante e pensante e zumbinte a me.”

“Así, dona a me un pedeta.”

Urso Pu estende un pedeta, e Coneo tira e tira e tira …

A-uu!” Pu esclama. “Tu dole me!”

“La fato es,” Coneo dise, “ce tu es fisada.”

“La causa es,” Pu dise criticante, “ce on no ave portes fronte sufisinte grande.”

“La causa es,” Coneo dise sever, “ce on come tro multe. Me ia pensa lo alora,” Coneo dise. “Ma me no ia vole vosi,” Coneo dise, “ce un de nos come tro multe,” Coneo dise, “e me ia sabe ce la un no es me,” el dise. “Bon, bon. Me va vade e trae Cristofer Robin.”

Cristofer Robin abita en la otra fini de la Foresta, e cuando el veni con Coneo e vide la dui fronte de Pu, el dise: “Urso vea fol,” en un vose tan amante ce cadun senti intera esperosa denova.

“Me ia vade a pensa,” Urso dise, pico ensoflante, “ce Coneo va pote cisa nunca usa sua porte fronte denova. E me ta odia lo,” el dise.

“Tal ance me,” Coneo dise.

“Usa sua porte fronte denova?” Cristofer Robin dise. “Natural el va usa sua porte fronte denova.”

“Bon,” Coneo dise.

“Si nos no pote tira tu a estra, Pu, cisa nos pote puia tu a en.”

Coneo rasca pensosa sua vibrisas, e razona ce si Pu ta es puiada retro a en, el ta es alá, e natural, nun otra ta es plu felís par vide Pu ca el, ma an tal, algunes abita en arbores e algunes abita su la tera, e —

“Tu vole dise ce me ta vade nunca a estra?” Pu dise.

“Me vole dise,” Coneo dise, “ce pos ateni tan multe, dejeta lo ta es triste.”

Cristofer Robin acorda.

“Donce on ave sola un cosa per fa,” el dise. “Nos debe espeta asta cuando tu deveni magra denova.”

“Cuanto tempo lo prende?” Pu demanda ansiosa.

“Sirca un semana, me ta pensa.”

“Ma me no pote resta así tra un semana!”

“Tu pote bon resta así, Urso vea fol. Estrae tu es lo cual es tan difisil.”

“Nos va leje a tu,” Coneo dise bonumorosa.

“E me desira ce lo no va neva,” el ajunta. “Sabe, camerada cara, tu prende aora un spasio grande en mea casa – esce tu aproba ce me usa tua pedetas retro como porta-tela? Car, me vole dise, los es alá – e los fa no cosa – e pende la telas sur los ta es multe pratical.”

“Un semana!” Pu dise sombre. “Ma la comedas?

“No comedas, me teme,” Cristofer Robin dise, “per magri plu rapida. Ma nos va leje a tu.”

Urso comensa suspira, ma el trova ce lo es nonposible, car el es tan streta fisada; e un larma rola a su de la oio de la urso, cuando esta dise:

“Alora, per favore, leje un Libro Sustante, un libro cual pote aida e consola un urso Fisada en un Stretia Grande!”

Donce tra un semana Cristofer Robin leje un libro de tal spesie a la fini norde de Pu, e Coneo pende sua lavadas a la fini sude … e a entre Urso senti ce el deveni plu magra, plu magra. E a la fini de la semana Cristofer Robin dise, “Aora!

Alora el saisi la pedetas fronte de Pu, e Coneo saisi Cristofer Robin, e tota amís e relatadas de Coneo saisi Coneo, e tota de los tira en junta …

E tra un tempo longa Pu dise sola “Au!” …

E “O!” …

E alora, intera subita, el dise “Plop!” esata como si un tapo ta sorti de un botela.

E Cristofer Robin e Coneo e tota amís e relatadas de Coneo cade voltante a retro … e Wini-la-Pu cade sur los – libre!

Alora, inclinante sua testa per grasia sua amís, el continua sua viaja tra la foresta, orgulosa zumbinte a se. Ma Cristofer Robin regarda amante pos el, e dise a se: “Urso vea fol!”

Esta paje es presentada con la lisensa CC Attribution-Share Alike 4.0 International.
Lo ia es automatada jenerada de la paje corespondente en la Vici de Elefen a 28 marto 2022 (10:41 UTC).