WINI-LA-PU
Capitol Prima · Capitol Du · Capitol Tre · Capitol Cuatro · Capitol Sinco · Capitol Ses · Capitol Sete · Capitol Oto · Capitol Nove · Capitol Des

Capitol Sinco

En cual Porceta encontra un Mamufante

A un dia, cuando Cristofer Robin e Wini-la-Pu e Porceta parla tota con lunlotra, Cristofer Robin fini la pleni-boca cual el es comente e dise sin atende: “Me ia vide oji un Mamufante, Porceta.”

“Cual el ia fa?” Porceta demanda.

“El ia bondi mera a longo,” Cristofer Robin dise. “Me no crede ce el ia vide me.”

“Me ia vide un a un ves,” Porceta dise. “A la min, me pensa tal,” el dise. “Ma cisa me no ia vide.”

“Ance me,” Pu dise, demandante a se como un Mamufante ta aspeta.

“On no vide los frecuente,” Cristofer Robin dise nonatendente.

“No plu,” Porceta dise.

“No en esta tempo de anio,” Pu dise.

Alora tota de los parla sur alga otra cosas, asta cuando Pu e Porceta debe vade a casa en junta. Prima cuando los pasea lenta longo la curso cual borda la Foresta de Cuatrodes Ectares, los no dise multe a lunlotra, ma cuando los veni a la rieta, e pos aida lunlotra a traversa la petras de paso, denova capás a pasea con lado a lado tra la caluna, los comensa parla en un modo amante sur esta e acel, e Porceta dise, “Si tu comprende cual me intende, Pu,” e Pu dise, “Acel es esata lo cual me mesma pensa, Porceta,” e Porceta dise, “Ma, a la otra lado, Pu, nos debe recorda,” e Pu dise, “Intera vera, Porceta, an si me ia oblida lo per esta momento.” E alora, esata cuando los veni a la Ses Pinos, Pu regarda a sirca per vide ce nun otra escuta, e dise con un modo cuasi ritual:

“Porceta, me ia deside alga cosa.”

“Cual cosa tu ia deside, Pu?”

“Me ia deside catura un Mamufante.”

Pu acorda con testa a alga veses cuando el dise esta, e espeta ce Porceta va dise “Como?” o “Pu, tu no pote fa lo!” o alga cosa simil aidante, ma Porceta dise no cosa. La fato es ce Porceta desira ce el ia ta pensa prima a esta.

“Me va fa lo,” Pu dise pos espeta pico plu longa, “par usa un trapa. E esta debe es un Trapa Rusosa, donce tu va debe aida me, Porceta.”

“Pu,” Porceta dise, sentinte intera felis denova, “me va aida.” E alora el dise, “Como nos va fa lo?” e Pu dise, “Esata. Como?”

La idea prima de Pu es ce los ta crea un Escava Multe Profonda, e alora la Mamufante ta veni a longo e cade a su en la Escava, e —

“Percé?” Porceta dise.

“Percé cual?” Pu dise.

“Percé el ta cade a en?”

Pu rasca sua nas con sua pedeta, e dise ce la Mamufante ta pasea a longo, zumbinte un canta peti, e levante sua regarda a la sielo, demandante a se esce lo ta pluve, e tal el no ta vide la Escava Multe Profonda asta cuando el ta es a media de la via a basa, cuando lo ta es tro tarda.

Porceta dise ce esta es un Trapa bon, ma si on suposa ce lo ta pluve ja?

Pu rasca sua nas denova, e dise ce el no ia pensa a esta. E alora el refelisi, e dise ce si lo ta pluve ja, la Mamufante ta leva sua regarda a la sielo e demanda a se esce lo va clari, e tal el no ta vide la Escava Multe Profonda asta cuando el ta es a media de la via a basa… Cuando lo ta es tro tarda.

Porceta dise ce, aora cuando esta punto es clarida, el crede ce lo es un Trapa Rusosa.

Pos oia esta, Pu es multe orgulosa, e el senti ce la Mamufante es ja caturada en fato, ma ancora on ave sola un cosa cual on debe discute, e lo es esta: Do los va crea la Escava Multe Profonda?

Porceta dise ce la plu bon ta es alga loca do un Mamufante ta es a un momento ante cuando el cade a lo, a no plu ca sirca un metre plu distante.

“Ma alora el ta vide nos cuando nos escava lo,” Pu dise.

“No, si el ta regarda la sielo.”

“El ta Suspeta,” Pu dise, “si el ta regarda acaso a su.” El pensa tra un tempo longa e alora el ajunta sombre, “Lo no es tan fasil como me ia crede. Me suposa ce acel es la causa percé on catura cuasi nunca Mamufantes.”

“Serta lo es tal,” Porceta dise.

Los suspira e sta se; e pos estrae de se alga spinas de ulex los senta se denova; e tra tota la tempo Pu dise a se, “Si sola me ta imajina alga cosa!” Car el senti serta ce un Serebro Multe Astuta ta pote catura un Mamufante si sola el ta sabe la modo conveninte per fa lo.

“Suposa,” el dise a Porceta, “ce tu ta vole catura me, como tu ta fa lo?”

“Bon,” Porceta dise, “me ta fa como esta. Me ta crea un Trapa, e me ta pone un Jar de Miel en la Trapa, e tu ta ole lo, e tu ta vade a en per lo, e —”

“E me ta vade a en per lo,” Pu dise ajitada, “an tal multe atendente per no feri me, e me ta ateni la Jar de Miel, e prima de tota me ta leca sirca la borda, finjente ce on no ta ave alga plu, tu comprende, e alora me ta vade a via e ta pensa pico a lo, e alora me ta reveni e comensa leca a la media de la jar, e alora —”

“Bon, bon, acel basta. Alá tu ta es, e alá me ta catura tu. Aora la cosa prima per pensa es: Cual la Mamufantes gusta? Me crede ce cuercas, tu acorda? Nos va colie multe de – ma Pu, velia!”

Pu, ci ia desende a un sonia felis, velia con un surprende, e dise ce Miel es un cosa multe plu trapal ca Percas. Porceta no acorda; e los vade a disputa lo, cuando Porceta recorda ce, si los pone cuercas en la Trapa, el ta debe trova la cuercas, ma si los pone miel, alora Pu ta debe abandona alga de sua propre miel, alora el dise, “Bon, alora miel,” esata cuando ance Pu recorda lo, e vade a dise, “Bon, percas.”

“Miel,” Porceta dise pensosa a se, como si la cosa ta es aora desideda. “Me va escava la caveta, en cuando tu vade e trae la miel.”

“Multe bon,” Pu dise, e el pasea lenta a via.

Pronto cuando el veni a casa, el vade a la saleta de comedas; e el sta sur un seja, e prende a su un jar multe grande de miel de sur la scafal alta. Lo ave MEL scriveda sur lo, ma, sola per sertia, el sutrae la paper covrente e regarda a en, e lo aspeta esata como miel. “Ma on pote nunca predise,” Pu dise. “Me recorda cuando mea tio ia dise a un ves ce el ia vide ceso con esata esta color.” Donce el pone sua lingua a en, e fa un leca grande. “Si,” el dise, “lo es. Sin duta de acel. E miel, me ta dise, tra tota la via asta la basa de la jar. Estra si, natural,” el dise, “algun ia pone ceso a la basa sola per broma. Cisa me debe proba pico plu … sola per caso … per caso ce Mamufantes no gusta ceso … la mesma como me … O!” E el suspira profonda. “Me ia pensa coreta. Lo es miel, asta la basa.”

Pos serti esta, el trae la jar a Porceta, e Porceta leva sua regarda de la basa de sua Escava Multe Profonda, e dise, “Tu ave lo?” e Pu dise, “Si, ma lo no es un jar intera plen,” e el lansa lo a su a Porceta, e Porceta dise, “No, lo no es! Esta es tota cual resta a tu?” e Pu dise, “Si.” Car lo es. Alora Porceta pone la jar a la basa de la Escava, e asende a estra, e los vade en junta a casa.

“Aora, bon note, Pu,” Porceta dise, cuando los ateni la casa de Pu. “E nos va reuni a matina doman a la ora ses a la Pinos, e vide cuanto Mamufantes nos ave en nosa Trapa.”

“A la ora ses, Porceta. E esce tu ave alga cordeta?”

“No, percé tu vole un cordeta?”

“Per gida los a casa.”

“O! … Me crede ce Mamufantes segue la sibila.”

“Alga si, alga no. On pote nunca predise la Mamufantes. Aora, bon note!”

“Bon note!” E Porceta trota a via a sua casa ENTRA PR, e Pu prepara se a dormi.

A alga oras plu tarda, esata cuando la note vade a fuji furtiva, Pu velia subita con un senti de afonda. El ia ave acel senti de afonda ance ante aora, e el sabe cual lo sinifia. El es fame. Donce el vade a la saleta de comeda, e el sta sur la seja e estende sua mano a supra a la scafal alta, e trova – no cosa.

“Esta es strana,” el pensa. “Me sabe ce me ave alá un jar de miel. Un jar plen, plen de miel asta la alta, e lo ia ave MEL scriveda sur lo, afin me ta sabe ce lo ia es miel. Esta es multe merveliosa.” E alora el comensa pasea de así a alá, e demandante a se do lo es e murmurante un murmura a se. Como esta:

Surprendente, multe strana!
Serta poca plu temprana
Me ia leje sur la jar
Sua testo MEL.
Ma aora, en la note,
Me no trova an un bote.
Me es iritada par
Manca de miel!

El ia murmura ja esta a se a tre veses en un modo cantante, cuando el recorda subita. El ia pone lo en la Trapa Rusosa per catura la Mamufante.

“Txa!” Pu dise. “Tota esta sola per atenta es jentil a Mamufantes.” E el vade denova en leto.

Ma el no pote dormi. Plu el atenta, plu el no pote. El atenta Conta Oveas, cual es a veses un bon metodo per dormi, e, car esta no aida, el atenta conta Mamufantes. Ma lo es an plu mal. Car cada Mamufante contada marxa direta a la miel de Pu, e come tota de lo. Tra alga minutos el reposa en miseria, ma cuando la Mamufante sincosento-otodes-sete es lecante sua mandibulas, e disente a se, “Esta es miel multe bon, me no recorda cuando me ia proba miel plu bon,” Pu no pote tolera plu. El salta a via de la leto, el core a estra la casa, e el core direta a la Ses Pinos.

La Sol es ancora en leto, ma on ave un lus prima en la sielo supra la Foresta de Cuatrodes Ectares, cual cosa pare mostra ce lo es veliante e pos corta va pedi la covre-letos a via. En la duilus la Pinos aspeta fria e solitar, e la Escava Multe Profonda pare plu profonda ca lo es, e la jar de miel de Pu a la basa es como alga cosa misteriosa, mera como un forma. Ma cuando el veni plu prosima a lo, sua nas informa el ce lo es vera miel, e sua lingua sorti e comensa brilia sua boca, preparada a lo.

“Txa!” Pu dise, cuando el pone sua lingua en la jar. “Un Mamufante ia come lo!” E alora el pensa pico e dise, “O, no, me ia come, me ia oblida.”

Vera el ia come la plu de lo. Ma on ave un pico restante a la basa ultima, e el puxa sua testa direta a en, e comensa leca …

Pos un tempo Porceta velia. Pronto cuando el es veliada el dise a se, “O!” Alora el dise corajosa, “Si,” e alora ancora plu corajosa, “Intera tal.” Ma el no senti multe corajosa, car la parola cual dansa un jiga sirca sua serebro es “Mamufantes”.

Como un Mamufante aspeta?

Esce el es Ferose?

Esce el ta veni cuando on sibila? E como el ta veni?

Esce el Ama Porcos a cualce grado?

Si el Ama Porcos, esce la spesie de la Porco fa un difere?

Suposante ce el es Ferose a Porcos, esce lo ta fa alga difere si la Porco ta ave un ava nomida ENTRA PRISILA?

El no sabe la responde a cualce de esta demandas … e el vade a vide sua Mamufante prima a sirca un ora pos aora!

Natural Pu va es con el, e esente en duple los ta senti multe plu Amin. Ma suposa ce Mamufantes es Multe Ferose a Porcos e Ursos? Esce el no ta fa la plu bon par finje un dole de testa cual preveni vade a la Ses Pinos a esta matina? Ma alora suposa ce la matina ta es multe bela, e on ta ave no Mamufante en la trapa, así el ta resta, en leto tra tota la matina, simple perinte sua tempo per no cosa. Cual el ta debe fa?

E alora el trova un Idea Astuta. El ta vade aora multe cuieta a la Ses Pinos, regardeta multe cauta a en la Trapa, e vide esce un Mamufante es alá. E si lo ta es tal, el ta vade denova a leto, e si no, el no ta vade.

Donce el parti. Prima el pensa ce no Mamufante va es en la Trapa, e alora el pensa ce un va es, e cuando el prosimi plu el es serta ce un es alá, car el pote oia ce lo mamufa savaje de así a alá.

“Ai-ai, ai-ai, ai-ai!” Porceta dise a se. E el vole core a via. Ma en alga modo, car el ia veni ja tan prosima, el senti ce el debe vide a la min como un Mamufante aspeta. Donce el rampe sur la lado de la Trapa e regarda a en…

E tra tota la tempo Pu ia atenta desfisa la jar de miel a via de sua testa. Plu el secute lo, plu forte lo adere. “Txa!” el dise, en la jar, e “O, aida!” e, la plu frecuente, “Au!” E el atenta par pumi lo contra ojetos, ma car el no vide contra cual el es puminte lo, esta ata no aida el; e el atenta asende a via de la Trapa, ma car el pote vide sola la jar, e an no multe de acel, el no pote trova sua via. Donce final el leva sua testa, con la jar e tota, e fa un sona forte de Tristia e Despera … e esata alora Porceta regarda a su.

“Aida, aida!” Porceta cria, “un Mamufante, un Mamufante Asustante!” e el freta a via tan rapida como el pote, ancora criante, “Aida, aida, un Masusfante Amutante! Famu, Famu, un Afusmante Samutante! Ai, Dai, un Fatumante Sasutante!” E el no pausa sua cria e freta ante cuando el ateni la casa de Cristofer Robin.

“Cual de mundo ia aveni, Porceta?” Cristofer Robin dise. El es en curso de leva se.

“Mamu,” Porceta dise, tan forte respirante ce el pote apena parla, “un Mamu – un Mamu – un Mamufante.”

“Do?”

“Alá,” Porceta dise, brandinte sua pedeta.

“Como el ia aspeta?”

“Como – como – El ia ave la testa la plu grande cual me ia vide a cualce ves, Cristofer Robin. Un cosa vera grande, como – como no cosa. Un cosa enorme grande – bon, como un – me no sabe – como un no cosa enorme grande. Como un jar.”

“Donce,” Cristofer Robin dise, aponente sua sapatos, “me va vade alá e vide lo. Veni con me!”

Porceta no teme si el ta ave Cristofer Robin con se, donce los parti …

“Me pote oia lo, esce tu no?” Porceta dise ansiosa, cuando los vade a prosima.

“Me pote oia alga cosa,” Cristofer Robin dise.

Lo es Pu puminte sua testa contra un radis de arbor cual el ia trova.

“Alá!” Porceta dise. “Esce lo no es asustante?” E el teni forte la mano de Cristofer Robin.

Subita Cristofer Robin comensa rie … e el rie … e el rie … e el rie. E cuando el es ancora riente – Crac! la testa de la Mamufante pumi contra la radis de la arbor. La jar frati, e la testa de Pu veni denova a estra…

Aora Porceta vide como fol el ia es, e el vergonia tan multe ce el core direta a casa e vade a leto con dole de testa. Ma Cristofer Robin e Pu vade a casa per la come de matina en junta.

“O, Urso!” Cristofer Robin dise. “Me ama tu tan multe!”

“Me ance,” Pu dise.

Esta paje es presentada con la lisensa CC Attribution-Share Alike 4.0 International.
Lo ia es automatada jenerada de la paje corespondente en la Vici de Elefen a 28 marto 2022 (10:41 UTC).