Capitol Oto

A un dia bela, Pu ia pasea pesosa a alta de la Foresta per vide esce sua ami Cristofer Robin es interesada a cualce grado par Ursos. A come de esta matina (un comeda simple de marmelada, lejera aplicada sur un favo o du) el ia pensa subita a un canta nova. Lo comensa como esta:

“Canta Ho! a la vive de un Urso.”

Cuando el ia progresa tan multe, el rasca sua testa, e pensa a se, “Acel es un comensa multe bon per un canta, ma como es la linia du?” El atenta con canta “Ho,” duple o truple, ma lo no pare aida. “Cisa me ta fa plu bon,” el pensa, “si me ta canta Hai a la vive de un Urso.” Donce el canta tal… ma sin susede.

“Multe bon, alora, “el dise, “me va canta duple acel linia prima, e cisa si me canta multe rapida lo, me va trova me cantante la linias tre e cuatro ante cuando me ave tempo per pensa a los, e nos va ave un Bon Canta. Donce alora:”

Canta Ho! a la vive de un Urso!
Canta Ho! a la vive de un Urso!
Me no ansia multe esce lo pluve o neva,
Car me ave un abunda de miel sur mea bon nas nova!
Me no cura multe esce lo neva o dejela,
Car me ave un abunda de miel sur mea pedetas bela!
Canta Ho! a un Urso!
Canta Ho! a un Pu!
E me va come un pico de alga cosa pos un ora o du!

El es tan plaseda par esta canta ce el canta lo tra tota la via a alta de la Foresta, “e si me continua canta lo multe plu longa,” el pensa, “lo va es la ora de come un pico de alga cosa, e alora la linia final no va es vera.” Donce el cambia lo a un zumbi en loca.

Cristofer Robin senta ante sua porte e apone sua Botas Grande. Pronto cuando Pu vide la Botas, el sabe ce un Aventura va aveni, e el brosa la miel a via de sua nas con la retro de sua pedeta, e ordina se tan bon como posible, per pare Preparada per Cualce Cosa.

“Bon matina, Cristofer Robin,” el clama.

“Alo, Urso Pu. Me no pote apone esta bota.”

“Tan triste,” Pu dise.

“Esce tu pensa ce tu va pote multe jentil apoia contra me, car me es tan forte tirante ce me cade a retro?”

Pu senta se, escava la tera con sua pedes, e puia forte se contra la dorso de Cristofer Robin, e Cristofer Robin puia forte se contra la dorso de el, e tira e tira sua bota asta cuando el porta lo.

“E alá lo es,” Pu dise. “Cual nos va fa per seguente?”

“Tota de nos va vade en un Viaja de Esplora,” Cristofer Robin dise, cuando el sta se e brosa se. “Grasias, Pu!”

“Vade en un Faxa de Splora?” Pu dise zelosa. “Me crede ce me ia es nunca a un de los. A do nos va vade en esta Faxa de Splora?”

“Viaja de Esplora, Urso vea fol. Lo ave un ‘J’.”

“O!” Pu dise, “me comprende.” Ma el no comprende real.

“Nos va descovre la Palo Norde.”

“O!” Pu dise denova. “Cual es la Palo Norde?” el demanda.

“Lo es mera un cosa per descovre,” Cristofer Robin dise sin cura, ance mesma no esente intera serta.

“O, me comprende,” Pu dise. “Esce ursos es bon a cualce grado en descovre lo?”

“Natural los es. E Coneo e Canga e tota de vos. Lo es un Viaja de Esplora. Un Viaja de Esplora sinifia esata lo. Un linia longa de cadun. Tu va fa bon par dise a la otras ce los ta prepara se, en cuando me esamina mea fusil. E tota de nos debe prende Furnis con nos.”

“Prende cual?”

“Cosas per come.”

“O!” Pu dise felís. “Me ia crede ce tu ia dise Furnis. Me va vade e dise a los.” E el fa pasos a via.

La person prima ci el encontra es Coneo.

“Alo, Coneo,” el dise, “esce el es tu?”

“Ta ce nos finje ce el no es,” Coneo dise, “e vide cual va aveni.”

“Me ave un mesaje per tu.”

“Me va dona lo a el.”

“Tota de nos va vade en un Faxa de Splora con Cristofer Robin!”

“Cual lo es, cuando nos va es en lo?”

“Un spesie de barco, me crede,” Pu dise.

“O! tal spesie.”

“Si! E nos intende descovre un Palo o alga cosa. O esce lo ia es un Polo? A cualce caso nos intende descovre lo.”

“Nos intende, si?” Coneo dise.

“Si. E nos debe Fura Nix a nos. Per caso ce nos vole come lo. Aora me va desende a la casa de Porceta. Dise a Canga, si!”

El lasa Coneo e freta a su a la casa de Porceta. Porceta senta a la tera a la porte de sua casa, e sofla felís aira a un denteleon, e pensa a se esce lo va aveni en la anio presente, en la anio seguente, a alga ves, o nunca. El veni de descovre ce lo va es nunca, e atenta recorda cual la “lo” va es, e espera ce lo no va es cualce amable, cuando Pu apare.

“O! Porceta,” Pu dise ajitada, “nos va vade en un Faxa de Splora, tota de nos, con cosas per come. Per descovre alga cosa.”

“Descovre cual?”

“O! mera alga cosa.”

“No cosa ferose?”

“Cristofer Robin ia dise no cosa sur ferosia. El dise sola ce lo ave un ‘J’, no?”

“La jeno no disturba me,” Porceta dise seria. “Sola la dentes. Ma si Cristofer Robin va veni, me no cura.”

Pico plu tarda tota de los es preparada a alta de la Foresta, e la Faxa de Splora comensa. Cristofer Robin e Coneo veni prima, a pos Porceta e Pu, a pos Canga, con Ru en sua pox, e Buo; a pos I-aa; e, a la fini, en un linia longa, tota amis e relatadas de Coneo.

“Me no ia demanda a los,” Coneo esplica nonatendente. “Los ia veni mera. Los fa sempre tal. Los pote marxa a la fini, pos I-aa.”

“Cual me dise,” I-aa dise, “es ce esta es disturbante. Me no ia vole veni a esta Faxa— lo cual Pu ia dise. Me ia veni mera como un favore. Ma así me es; e si me es la fini de la Faxa— lo sur cual nos parla – donce lasa ce me es la fini. Ma si, a cada ves cuando me vole senta me per un momento de reposa, me debe brosa prima a via un dui de desduple de amis e relatadas minor de Coneo, alora esta tota no es un Faxa— cual cosa lo ta es – lo es simple un Ruido Disturbante. Esta es lo cual me dise.”

“Me comprende lo cual I-aa intende,” Buo dise. “Si tu demanda a me —”

“Me es demandante a nun,” I-aa dise. “Me es mera narante a cadun. Nos pote xerca la Palo Norde, o nos pote jua ‘Así nos vade e colie nozas’ sirca un nido de formicas. Lo es egal a me.”

Un clama veni de la comensa de la linia.

“Avansa!” Cristofer Robin cria.

“Avansa!” Pu e Porceta cria.

“Avansa!” Buo cria.

“Nos comensa,” Coneo dise, “me debe vade.” E el freta per es a la fronte de la Faxa de Splora con Cristofer Robin.

“Multe bon,” I-aa dise. “Nos vade. Ma No Culpa Me.”

Donce tota de los vade per descovre la Palo. E cuando los pasea, los parleta a lunlotra sur esta e acel, tota estra Pu, ci crea un canta.

“Esta es la strofe prima,” el dise a Porceta, cuando el ave lo preparada.

“La strofe prima de cual?”

“Mea canta.”

“Cual canta?”

“Esta.”

“Cual?”

“Bon, si tu escuta, Porceta, tu va oia lo.”

“Como tu sabe ce me no es escutante?”

Pu no pote responde a esta, donce el comensa canta.

Los vade per descovre la Palo diseda,
Buo e Porceta e Coneo e tota;
Esta Palo (o Polo?) es nonconoseda
par Buo e Porceta e Coneo e tota.
I-aa, Cristofer Robin e la Urso
E la relatadas de Coneo, en mesma curso,
Vade ajitada, cuasi en concurso.
Urá! a Buo e Coneo e tota!

“Silenti!” Cristofer Robin dise, turnante a Pu, “nos es a punto de veni a un Loca Perilosa.”

“Silenti!” Pu dise, rapida turnante a Porceta.

“Silenti!” Porceta dise a Canga.

“Silenti!” Canga dise a Buo, en cuando Ru dise multe cuieta “Silenti!” a alga veses a se.

“Silenti!” Buo dise a I-aa.

“Silenti!” I-aa dise con un vose asustante a tota la amis e relatadas de Coneo, e los dise fretante “Silenti!” a lunlotra tra la linia, asta cuando la diseda ateni la ultima de los. E la ultima e plu peti de la amis e relatadas es tan ajitada par crede ce la “Silenti!” de tota la Faxa de Splora es diseda a el, ce el entera se, con la testa a basa, en un fesur en la tera, e el va resta alá tra du dias asta cuando la peril va es a via, e alora el va vade a casa en un freta grande per vive cuieta con sua Tia sempre a pos. La nom de la peti es Alesandro Scarabe.

Los ia veni a un rieta cual serpenti e rola entre rivas alta e rocosa, e Cristofer Robin oserva subita como perilosa lo es.

“Esta es un loca perfeta,” el esplica, “per un Embosce.”

“Cual spesie de bosce?” Pu xuxa a Porceta. “Un bosce de ulex?”

“Pu, mea cara,” Buo dise en sua modo superior, “tu no sabe, cual un Embosce es?”

“Buo,” Porceta dise e turna seria sua regarda a el, “la xuxa de Pu ia es un xuxa perfeta privata, e on ia ave no nesesa —”

“Un Embosce,” Buo dise, “es un spesie de Surprende.”

“Un bosce de ulex es ance tal a veses,” Pu dise.

“Un Embosce, como me ia vade a esplica a Pu,” Porceta dise, “es un spesie de Surprende.”

“Si algun salta subita sur un otra, acel es un Embosce,” Buo dise.

“Un Embosce es, Pu, cuando algun salta subita sur un otra,” Porceta esplica.

Pu, ci sabe aora cual un Embosce es, dise ce un bosce de ulex ia salta subita sur el a un dia cuando el ia cade de un arbor, e el ia nesesa ses dias per estrae tota la spinas de se.

“Nos no es parlante sur bosces de ulex,” Buo dise pico nonpasiente.

“Me es,” Pu dise.

Aora los asende multe cauta la rieta, paseante de roca a roca, e pos vade pico, los veni a un loca do la rivas largi a cada lado, en tal modo ce a cada lado de la rieta on ave un banda plana de erba sur cual los pote senta e reposa. Pronto cuando Cristofer Robin vide esta, el clama “Para!” e tota de los senta se e reposa.

“Me pensa,” Cristofer Robin dise, “ce nos ta debe come aora tota de nosa Furnis, afin nos no va ave tan multe per porta.”

“Come tota de nosa cual?” Pu dise.

“Tota de lo cual nos ia trae,” Porceta dise comensante la labora.

“Un bon idea!” Pu dise, e ance el comensa la labora.

“Esce tota de vos ave alga cosa?” Cristofer Robin dise con sua boca plen.

“Tota estra me,” I-aa dise. “como Normal.” El turna sua regarda a los en sua modo melancolica. “Me suposa ce nun de vos es acaso sentante sur un cardo?”

“Me crede ce me es,” Pu dise. “Au!” El sta se e regarda pos se. “Si, me ia es, me ia pensa ja tal.”

“Grasias, Pu. Si tu ia fini intera lo.” El traversa a la loca de Pu e comensa come.

“La senta sur los, tu sabe, no Benefica los,” el continua, masticante en leva sua regarda. “Lo estrae tota la vive de los. Recorda acel a un otra ves, tota de vos! Un pico de Considera, un pico de Pensa a la otras, lo cambia tota.”

Pronto cuando Cristofer Robin ia fini sua come media, el xuxa a Coneo, e Coneo dise “Si, si, natural,” e los pasea en junta tra un distantia corta asendente la rieta.

“Me no ia vole ce la otras va oia,” Cristofer Robin dise.

“Esata tal,” Coneo dise, parente importante.

“Lo es – me ia pensa a me – lo es mera – Coneo, me suposa ce tu no sabe. Como la Palo Norde aspeta?”

“Bon,” Coneo dise rascante sua vibrisas. “Acel es un bon demanda.”

“Me ia sabe a un ves, ma me ia oblida en alga modo,” Cristofer Robin dise sin cura.

“Lo es un cosa divertinte,” Coneo dise, “ma ance me ia oblida en alga modo, an si me ia sabe a un ves.”

“Me suposa ce lo es mera un palo, fisada en la tera?”

“Serta lo es un palo,” Coneo dise, “car si no, lo no ta ave un nom tan simil, e si lo es vera un palo, lo debe es fisada en la tera, car on ave no otra loca per fisa lo.”

“Si, acel es como me ia pensa.”

“La sola cosa,” Coneo dise, “es, do lo es fisada?”

“Acel es lo cual nos es xercante,” Cristofer Robin dise.

Los revade a la otras. Porceta reclina sur sua dorso, e es pasosa dorminte. Ru lava sua fas e pedetas en la rieta, en cuando Canga esplica orgulosa a tota ce esta es la ves prima cuando Ru lava mesma sua fas, e Buo nara a Canga un Raconta Interesante, plen de parolas longa como Ensiclopedia e Rododendro, cual Canga no escuta.

“Me no acorda con tota esta lava,” I-aa cexeta. “Esta asurda moderna de Pos-la-Oreas. Como tu pensa, Pu?”

“Bon,” Pu dise, “me pensa —”

Ma nos va sabe nunca cual Pu ia pensa, car un pip subita veni de Ru, e un pluf, e un cria forte alarmada de Canga.

“Un basta de lava!” I-aa dise.

“Ru ia cade a en!” Coneo cria, e el e Cristofer Robin freta a su per salva.

“Regarda como me nada!” Ru pipi de media de sua stangeta, e es fretada longo un cascade a la stangeta seguente.

“Esce tota es bon, Ru cara?” Canga clama ansiosa.

“Si!” Ru dise. Regarda como me na—” e el vade longo la cascade seguente a un otra stangeta.

Cadun fa alga cosa per aida. Porceta, subita intera veliada, salta a supra e su, e fa ruidos como “U, ai, ai”; Buo esplica ce en un caso de Sumerji Subita e Tempora, la Cosa la plu Importante es teni la Testa Supra la Acua; Canga salta longo la riva, disente “Tu es serta ce tota es bon, Ru cara?” a cual Ru, de cualce stangeta do el es per la presente, responde “Regarda como me nada!” I-aa ia turna se e el suspende sua coda supra la stangeta prima a en cual Ru ia cade, e con sua dorso en dirije a la asidente, cexeta cuieta a se, “Tan multe lavas; ma per favore, saisi mea coda, Ru peti, e tu va es secur”; e Cristofer Robin e Coneo veni corente e pasa I-aa, e clama a la otras ante se.

“Tota es bon, Ru, me veni,” Cristofer Robin cria.

“Pone alga cosa tra la rieta plu basa, alga de vos,” Coneo cria.

Ma Pu es ja ponente alga cosa. A du stangetas su Ru el sta con un palo longa en sua manos, e Canga veni e prende un fini de lo, e los teni lo entre se tra la parte plu basa de la stangeta; e Ru, ancora orgulosa bolante, “Regarda como me nada,” flota contra lo e trepa a estra.

“Esce vos ia vide como me ia nada?” Ru pipi ajitada, en cuando Canga reproxa el e frota el. “Pu, esce tu ia vide como me ia nada? Lo es nomida nada, cual me ia fa. Coneo, esce tu ia vide cual me ia fa? Nada. Alo, Porceta! Me dise, Porceta! Cual tu pensa ce me ia fa! Nada! Cristofer Robin, esce tu ia vide cual —”

Ma Cristofer Robin no escuta. El regarda Pu.

“Pu, do tu ia trova acel palo?”

Pu regarda la palo en sua manos.

“Me ia trova mera lo,” el dise. “Me ia pensa ce lo pote es usosa, e me ia prende lo.”

“Pu,” Cristofer Robin dise rituin, “la Viaja de Esplora es completida. Tu ia trova la Palo Norde!”

“O!” Pu dise.

I-aa ia es ja sentante con sua coda en la acua, cuando tota de los veni a el.

“Dise a Ru, algun de vos, ce el debe freta,” I-aa dise. “Mea coda comensa fri. Me no vole dise lo, ma me dise lo. Me no vole cexa ma la cosa es tal. Mea coda es fria.”

“Así me es!” Ru pipi.

“O, alá tu es.”

“Esce tu ia vide como me ia nada?”

I-aa prende sua coda a estra la acua, e colpa con lo de lado a lado.

“Como me ia espeta,” el dise. “Tota la sensa es perdeda. Lo ia deveni nonsensosa. Esata tal, nonsensosa. Bon, tan longa cuando nun cura, me suposa ce tota es bon.”

“I-aa vea nonfortunosa! Me va seci lo per tu,” Cristofer Robin dise, e el sutrae sua teleta e comensa frota.

“Grasias, Cristofer Robin. Tu es la sola ci pare comprende sur codas. Alga de la otras no pensa – acel es la problem con alga de la otras. Los ave no imajina. Un coda no es un coda a los. Lo es mera un Ajuntada Peti a la dorso.”

“No conserna, I-aa,” Cristofer Robin dise, tan forte frotante como posible. “Esce acel es plu bon?”

“Lo ave cisa plu la sensa de un coda. Lo Parteni denova, si tu comprende mea intende.”

“Alo, I-aa,” Pu dise cuando el veni a los con sua palo.

“Alo, Pu. Grasias per tua demanda, ma me va pote usa lo denova pos un dia o du.”

“Usa cual?” Pu dise.

“Sur lo cual nos parla.”

“Me no ia parla sur alga cosa,” Pu dise parente confondeda.

“Mea era denova. Me ia crede ce tu ia dise como triste tu es par mea coda, cual es nonsensosa, e esce tu pote fa alga cosa per aida.”

“No,” Pu dise. “Acel no ia es me,” el dise. El pensa pico, e a pos el sujesta aidosa: “Cisa el ia es algun otra.”

“Bon. Grasia el per me cuando tu vide el!”

Pu regarda ansiosa Cristofer Robin.

“Pu ia trova la Palo Norde,” Cristofer Robin dise. “Lo es encantante, no?”

Pu basi umil sua regarda.

“Acel es lo?” I-aa dise.

“Si,” Cristofer Robin dise.

“Acel es lo cual nos ia xerca?”

“Si,” Pu dise.

“O!” I-aa dise. “Bon, a cualce caso – lo no ia pluve,” el dise.

Los fisa la palo en la tera, e Cristofer Robin lia un mesaje sur lo:

PLO NorDE
DICsoverDA
Par PU
Pu IA TroVA LO

Alora tota de los ia revade a casa. E me crede, an si me no es intera serta, ce Ru ia fa un bani calda e ia vade direta a leto. Ma Pu ia revade a sua propre casa, e car el ia senti multe orgulosa par sua fada, el ia come un pico de alga cosa per revive se.